ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី២៣ ខែមិថុនា ឆ្នាំ២០២២នេះ បានប្រកាសអំពីកាលវិភាគនៃការចរចាប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតស្បែកជើង និងផលិតផលិត​ផលធ្វើដំណើរ និងកាបូប នៅក្នុងប្រទេសកម្ពុជា សម្រាប់ឆ្នាំ២០២៣។ ដំណើរការចរចានេះ នឹងចាប់ផ្តើម​នៅខែកក្កដា ឆ្នាំ២០២២ ហើយការចរចាចុងក្រោយ នឹងធ្វើឡើងនៅខែកញ្ញា ឆ្នាំ២០២២។ ចំណែកប្រាក់ខែថ្មី សម្រាប់កម្មករកាត់ដេរ នឹងចាប់អនុវត្តពីថ្ងៃទី១ ខែមករា ឆ្នាំ២០២៣។​

សូមរម្លឹកថា នៅឆ្នាំ២០២២ នេះ ប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតស្បែកជើង និងផលិតផលិត​ផលធ្វើដំណើរ និងកាបូប នៅក្នុងប្រទេសកម្ពុជា មានចំនួន ១៩៤ដុល្លារ។

ទោះយ៉ាងណា ក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់​ថា បូករួមទាំង​ប្រាក់អត្ថប្រយោជន៍ផ្សេងៗ ដែលកម្មករ​និយោជិត ធ្លាប់ទទួលបានកន្លងទៅ គឺ​ធ្វើឲ្យឱ្យកម្មករនិយោជិតម្នាក់ ក្នុងវិស័យកាត់ដេរ អាចទទួលបានប្រាក់បៀវត្ស ជាមធ្យមពី ២១១ដុល្លារ ទៅ ២២២ដុល្លារ ក្នុងមួយខែ៕