ទីក្រុងម៉ានីឡា៖ ថ្ងៃនេះ ប្រទេសហ្វ៊ីលីពីនរៀបចំការបោះឆ្នោតនៅតំបន់ភាគខាងត្បូងដែលមានសាសនិកឥស្លាមរស់នៅភាគច្រើន។ ការបោះឆ្នោតនេះរៀបចំឡើងក្រោមការរឹតបន្តឹងសន្តិសុខយ៉ាងខ្លាំងបន្ទាប់ពីមានអំពើហិង្សាកើតឡើងបណ្ដាលឱ្យស្លាប់មនុស្សបីនាក់ និងរបួស១៥នាក់មុនថ្ងៃបោះឆ្នោត។ ការបោះឆ្នោតលើកនេះគឺជាវិញ្ញាសាកល្បងដ៏សំខាន់មួយនៃកិច្ចខិតខំប្រឹងប្រែងរបស់រដ្ឋាភិបាលដើម្បីនាំយកនូវសន្តិភាព និងការអភិវឌ្ឍប្រកបដោយចីរភាពសម្រាប់តំបន់ដែលធ្លាប់ហែកហួរដោយជម្លោះប្រដាប់អាវុធដើម្បីផ្ដាច់ទឹកដី និងចលនាជ្រុលនិយម។
ជម្លោះនេះឡើងកម្ដៅខ្ពស់បំផុតកាលពីឆ្នាំ២០១៧នៅពេលពួកផ្ដាច់ខ្លួនដែលមានទំនាក់ទំនងជាមួយក្រុមអាយស៊ីសចូលកាន់កាប់ទីក្រុងម៉ារ៉ាវី (Marawi)។ គណៈកម្មការរៀបចំការបោះឆ្នោតបានដាក់ទីក្រុងកូតាបាតូ (Cotabato) ក្រោមការគ្រប់គ្រងរបស់ខ្លួនបន្ទាប់ពីមានអំពើហិង្សាកាលពីថ្ងៃអាទិត្យនៅពេលមានជម្លោះទាស់ទែងគ្នានៅមណ្ឌលបោះឆ្នោតឈានដល់ការផ្ទុះអាវុធ។ នេះបើយោងតាមការផ្សាយរបស់សារព័ត៌មានក្នុងស្រុក។ គណៈកម្មការខាងលើនេះថ្លែងថាការបោះឆ្នោតដំណើរការដោយរលូននៅទូទាំងតំបន់ស្វយ័តបាំងសាម៉ូរ៉ូ (Bangsamoro) នៃកោះមីនដាណាវ (Mindanao) (BRAMM)។ គណៈកម្មការសង្ឃឹមថានឹងមិនមានភាពរំជើបរំជួលកើតឡើងនោះទេដោយសារមានការដាក់ប៉ុស្តិ៍ឆែកឆេរជាច្រើនកន្លែង និងការដាក់ពង្រាយកម្លាំងសន្តិសុខយ៉ាងច្រើនសន្ធឹកសន្ធាប់។
ការបោះឆ្នោតលើកនេះក៏មានបញ្ហាចម្រូងចម្រាសផងដែរពាក់ព័ន្ធនឹងការដឹកជញ្ជូនសន្លឹកឆ្នោត។ គេរកឃើញសន្លឹកឆ្នោតគូសរួចជាស្រេចនៅមណ្ឌលបាស៊ីឡាន។ ដូច្នេះធ្វើឱ្យពន្យារពេលការបោះឆ្នោតព្រោះត្រូវបោះពុម្ពសន្លឹកឆ្នោតឡើងវិញ។ នេះបើយោងតាមអ្នកនាំពាក្យគណៈកម្មការរៀបចំការបោះឆ្នោត លោកចន រ៉ិច ឡូឌីយ៉ាំងកូ (John Rex Laudiangco)។ នៅក្នុងការបោះឆ្នោតលើកនេះមានអ្នកចុះឈ្មោះជិត២,៤លាននាក់។ ក្រុមប្រទេសជាដៃគូ និងក្រុមអ្នកឃ្លាំមើលចាត់ទុកថាការបោះឆ្នោតលើកនេះជាការធ្វើតេស្តចង់ដឹងថាតើតំបន់ស្វយ័តមួយនេះដែលបង្កើតឡើងក្រោមកិច្ចព្រមព្រៀងសន្តិភាពឆ្នាំ២០១៤រវាងរដ្ឋាភិបាលទីក្រុងម៉ានីឡា និងក្រុមផ្ដាច់ខ្លួនមូស្លីមអាចនឹងរក្សាឱ្យគង់វង្សតាមរយៈការបោះឆ្នោតនេះឬយ៉ាងណា។
ការប្រគល់ស្វ័យភាពនេះក្នុងគោលបំណងបញ្ចប់ជម្លោះដែលសម្លាប់មនុស្សជាង១,២សែននាក់, បង្ខំឱ្យមនុស្ស២លាននាក់ផ្លាស់ប្ដូរទីលំនៅរបស់ខ្លួន និងធ្វើឱ្យក្រុមជ្រុលនិយមមានទីតាំងឈរជើងយ៉ាងរឹងមាំ។ ប្រធានាធិបតីហ្វ៊ីលីពីន លោកហ្វ៊ែឌីណង់ ម៉ាកូសថ្លែងថាការបោះឆ្នោតនេះជាគោលចារឹកដ៏សំខាន់មួយដើម្បីបន្តដំណើររបស់ BRAMM ឆ្ពោះទៅរកសន្តិភាពជាអចិន្ត្រៃយ៍ អភិបាលកិច្ចបែបប្រជាធិបតេយ្យ និងការសម្រេចជោគវាសនាដោយខ្លួនឯង។ លោកសូមជំរុញឱ្យក្រុមអ្នកដែលមានសិទ្ធិបោះឆ្នោតចូលរួមឱ្យបានគ្រប់ៗគ្នានៅក្នុងអ្វីដែលលោកហៅថាជាព្រឹត្តិការណ៍សំខាន់សម្រាប់តំបន់ដែលពួកគេរស់នៅ និងសម្រាប់ប្រទេសជាតិ៕ ប្រភព៖ Reuters
ចែករំលែកព័តមាននេះ