រាជធានីភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ប្រកាសជាផ្លូវការថា តុលាការកែតម្រូវថ្ងៃ-ខែ-ឆ្នាំកំណើតរបស់សម្តេចហើយ ។ ជាមួយគ្នានោះ សម្តេចតេជោ ក៏បានផ្ញើសារជូនថ្នាក់ដឹកនាំស្ថាប័នកំពូលៗ និងជនរួមជាតិឱ្យបានដឹងអំពីការកែប្រែនេះផងដែរ ។
តាមរយៈលិខិតជូនដំណឹងដល់ សម្តេច ហេង សំរិន ប្រធានរដ្ឋសភា, សម្តេច សាយ ឈុំ ប្រធានព្រឹទ្ធសភានិងសម្តេច ស ខេង រដ្ឋមន្ត្រីក្រសួងមហាផ្ទៃ សម្តេចបានបញ្ជាក់ថាអំពីការសម្រេចរបស់តុលាការកែតម្រូវថ្ងៃ-ខែ-ឆ្នាំកំណើតពីថ្ងៃទី៤ ខែមេសា ឆ្នាំ១៩៥១ ទៅជាថ្ងៃ-ខែ-ឆ្នាំកំណើតពិត ថ្ងៃទី៥ ខែសីហា ឆ្នាំ១៩៥២ ។
នៅក្នុងសារលិខិតរបស់ សម្តេច ហ៊ុន សែន ផ្ញើជនរួមជាតិខ្មែរ អំពីការទើបកែតម្រូវថ្ងៃខែឆ្នាំកំណើត មកថ្ងៃពិតប្រាដក នៅថ្ងៃទី៥ ខែសីហា ឆ្នាំ១៩៥២ សម្តេចនាយករដ្ឋមន្ត្រីបានថ្វាយបង្គំ សម្តេចព្រះមហាសង្ឃរាជទាំងពីរគណៈ និងជនរួមជាតិខ្មែរថា ផ្អែកតាមដីកាសម្រេចលេខ ៧៣៨ “ក” ដ.ម ចុះថ្ងៃទី២០ ខែមិថុនា ឆ្នាំ២០២២ របស់សាលាដំបូងរាជធានីភ្នំពេញ ថ្ងៃ-ខែ-ឆ្នាំកំណើត របស់ទូលព្រះបង្គំ ខ្ញុំព្រះករុណា ខ្ញុំ ត្រូវបានកែតម្រូវពីថ្ងៃទី០៤ ខែមេសា ឆ្នាំ១៩៥១ ទៅជាថ្ងៃ-ខែ-ឆ្នាំកំណើតពិតប្រាកដវិញ គឺថ្ងៃទី០៥ ខែសីហា ឆ្នាំ១៩៥២ ត្រូវនឹងថ្ងៃអង្គារ ១៥កើត ខែស្រាពណ៍ ឆ្នាំរោង ចត្វាស័ក ពុទ្ធសករាជ ២៤៩៦។
៉ទូលព្រះបង្គំ ខ្ញុំព្រះករុណា ខ្ញុំ សូមទូលប្រគេន និងជម្រាបជូន ជនរួមជាតិ ជ្រាបថា តបតាមសេចក្តី អំពាវនាវរបស់ ព្រះវររាជបិតាជាតិ សម្តេចព្រះមហាវីរក្សត្រ នរោត្ដម សីហនុ ព្រះបរមរតនកោដ្ឋ នាអំឡុងឆ្នាំ ១៩៧០ ទូលព្រះបង្គំ ខ្ញុំព្រះករុណា ខ្ញុំបានចូលព្រៃម៉ាគី ដើម្បីតស៊ូប្រឆាំងនឹងក្រុមធ្វើរដ្ឋប្រហារខុសច្បាប់ និងការឈ្លានពានរបស់បរទេស»។ នេះជាការបញ្ជាក់របស់សម្តេចតេជោ។
សម្តេចតេជោ ហ៊ុន សែន បានបន្តថា «ក្នុងសម័យកាលសង្គ្រាមនោះ ទូលព្រះបង្គំជាខ្ញុំ បានកំណត់យកថ្ងៃដែលទូលព្រះបង្គំ ជាខ្ញុំចូលតស៊ូ ធ្វើជាថ្ងៃកំណើត គឺថ្ងៃទី០៤ ខែមេសា ឆ្នាំ១៩៥១ និងបានប្រើប្រាស់នាពេលកន្លងមក។ ការកែតម្រូវនេះមានភាពចាំបាច់ដើម្បីកំណត់យក ថ្ងៃ-ខែ-ឆ្នាំកំណើតរបស់ទូលព្រះបង្គំ ខ្ញុំព្រះករុណា ខ្ញុំ ឱ្យបានត្រឹមត្រូវតាមថ្ងៃ-ខែ-ឆ្នាំកំណើតពិត គឺថ្ងៃទី០៥ ខែសីហា ឆ្នាំ១៩៥២ ត្រូវនឹងថ្ងៃអង្គារ ១៥កើត ខែស្រាពណ៍ ឆ្នាំរោង ចត្វាស័ក ពុទ្ធសករាជ ២៤៩៦ និងដើម្បីជៀសវាងនូវការភាន់ច្រឡំពីសំណាក់ឥស្សរជនជាតិ និងអន្តរជាតិ ប្រជាពលរដ្ឋ ព្រមទាំងមហាជនទូទៅ ដែលបានផ្ញើសារលិខិតជូនពរថ្ងៃចម្រើនជន្មាយុរបស់ទូលព្រះបង្គំ ខ្ញុំព្រះករុណា ខ្ញុំ ដល់ទៅពីរដងក្នុងមួយឆ្នាំ»៕
ចែករំលែកព័តមាននេះ