ខេត្តស្ទឹងត្រែង ៖ លោក សរ សុពុត្រា អភិបាលខេត្តស្ទឹងត្រែង នៅព្រឹកថ្ងៃទី៩ ខែមករា ឆ្នាំ២០២៦ បានថ្លែងនូវការណែនាំយ៉ាងមុតស្រួចទៅកាន់អភិបាលក្រុង.ស្រុកទាំង៤រូប…
ខេត្តស្ទឹងត្រែង ៖ លោក សរ សុពុត្រា អភិបាលខេត្តស្ទឹងត្រែង នៅព្រឹកថ្ងៃទី៩ ខែមករា ឆ្នាំ២០២៦ បានថ្លែងនូវការណែនាំយ៉ាងមុតស្រួចទៅកាន់អភិបាលក្រុង.ស្រុកទាំង៤រូប ដែលទើបតែប្រកាសចូលកាន់មុខតំណែង ដោយបានគូសបញ្ជាក់ពីសារសំខាន់នៃ «មនសិការជាតិ និងការបម្រើប្រជាជន» ជាធំ។ លោកបានហាមដាច់ខាតមិនឱ្យមន្ត្រីរូបណាម្នាក់ «យកផលប្រយោជន៍ទៅប្តូរជាមួយមនសិការជាតិ និងការបម្រើប្រជាជន» ឡើយ។
លោកអភិបាលខេត្តបានសង្កត់ធ្ងន់ដោយបានលើកឡើងថា៖ «យើងត្រូវរួមគ្នាកម្ចាត់ចោលអ្នកដែលធ្វើការយកជើងរាទឹក មិនត្រូវទុកមន្ត្រីអាក្រក់ទាំងនោះឱ្យនៅក្នុងជួរមន្ត្រីល្អរបស់យើងឡើយ» ដើម្បីនាំនាវាខេត្តស្ទឹងត្រែងឆ្ពោះទៅរកភាពរីកចម្រើនពិតប្រាកដ។យើងទាំងអស់គ្នាត្រូវយក សាមគ្គីភាពផ្ទៃក្នុង ជាកត្តាកំណត់ក្នុងការដឹកនាំការងារឱ្យមានប្រសិទ្ធភាព និង តម្លាភាព ប្រកបដោយភាពទទួលខុសត្រូវខ្ពស់។ ត្រូវផ្តល់សេវាសាធារណៈជូនប្រជាពលរដ្ឋដោយ ឥតរើសអើង និង មិនប្រកាន់និន្នាការនយោបាយ ណាមួយឡើយ។ត្រូវជៀសវាងឱ្យបានដាច់ខាតពីបទល្មើស និងកិច្ចអន្តរាគមន៍ខុសច្បាប់នានា ហើយត្រូវរស់នៅប្រកបដោយសេចក្តីថ្លៃថ្នូរ ដោយយកប្រយោជន៍ជាតិ និងប្រជាជនជាធំ។
លោកអភិបាលបានលើកឡើងទៀតថា៖ ក្នុងនាមជាថ្នាក់ដឹកនាំ ត្រូវរក្សា កិត្តិយសរយៈពេលវែង ក្នុងការបម្រើប្រជាជន ដើម្បីឱ្យពេលចូលនិវត្តន៍អាចនាំយកកិត្តិយសនិងសេចក្តីថ្លៃថ្នូរទុកប្រាប់ដល់កូនចៅ។
ឆ្លៀតក្នុងឱកាសនោះដែរ លោកក៏បានណែនាំទៅដល់អាជ្ញាធរឃុំ.សង្កាត់ និងមន្ត្រីផ្នែកអប់រំក្រុង.ស្រុក ឱ្យពិនិត្យមើលការលក់ដូរទំនិញនៅតាមសាលារៀនឱ្យបានហ្មត់ចត់ ដើម្បីលើកកម្ពស់ផ្នែក សុខភាពរបស់កុមារ ដែលជាទំពាំងស្នងឫស្សីសម្រាប់ប្រទេសជាតិ។លោកថ្លែងបែបនេះបន្ទាប់រកឃើញនៅក្នុងសាលានិងក្រៅរបងសាលាលក់ចំណីអាហារហាមឃាត់ជាច្រើនដែលបង្កផលប៉ះពាល់ដល់សុខភាពកុមារ។
លោក លី មីណា អភិបាលក្រុងស្ទឹងត្រែងដែលទើបចូលកាន់តំណែងថ្មី បានប្តេជ្ញាអនុវត្តយ៉ាងម៉ឺងម៉ាត់តាមការណែនាំរបស់លោកអភិបាលខេត្ត។ លោកនឹងខិតខំបំពេញការងារតាមរចនាសម្ព័ន្ធ គ្រប់គ្រង និងការទទួលខុសត្រូវ ដើម្បីឆ្លើយតបនឹងតួនាទីជាសេនាធិការរបស់ក្រសួងមហាផ្ទៃ និងរដ្ឋបាលខេត្ត។
ការប្រកាសចូលកាន់មុខតំណែងជាអភិបាលក្រុង.ស្រុកនោះដោយ៖លោក សាយ កុសល អភិបាលក្រុងស្ទឹងត្រែង ទៅជាអភិបាលស្រុកថាឡាបរិវ៉ាត់។លោក លី មីណា អភិបាលស្រុកបុរីអូរស្វាយសែនជ័យ មកជាអភិបាលក្រុងស្ទឹងត្រែង។លោក សន សារឿន អភិបាលស្រុកថាឡាបរិវ៉ាត់ ទីជាអភិបាលស្រុកសៀមប៉ាង។
លោក ផាន់ យុត អភិបាលស្រុកសៀមប៉ាង មកជាអភិបាលស្រុកបុរីអូរស្វាយសែនជ័យ៕
ចែករំលែកព័តមាននេះ