Elon Musk ថារោងចក្រថ្មីរបស់ Tesla ខាតបង់លុយរាប់ពាន់លានដុល្លារ
អាមេរិក ៖ រោងចក្រថ្មីរបស់ក្រុមហ៊ុនផលិតរថយន្តអគ្គិសនី Tesla Inc នៅក្នុងរដ្ឋ Texas និងទីក្រុង
អាមេរិក ៖ រោងចក្រថ្មីរបស់ក្រុមហ៊ុនផលិតរថយន្តអគ្គិសនី Tesla Inc នៅក្នុងរដ្ឋ Texas និងទីក្រុង Berlin ប្រទេសអាឡឺម៉ង់ ខាតបង់លុយអស់រាប់ពាន់លានដុល្លារ ខណៈដែលរោងចក្រទាំងនោះជួបបញ្ហាលើការបង្កើនការផលិត ដោយសារតែខ្វះអាគុយ និងបញ្ហាកំពុងផែននៅចិន។ នេះបើយោងតាមនាយកប្រតិបត្តិ Elon Musk និយាយក្នុងកិច្ចសម្ភាសន៍មួយដែលបានចេញផ្សាយកាលពីថ្ងៃពុធ ទី ២២ ខែមិថុនា។
មហាសេដ្ឋីលេខ ១ពិភពលោករូបនេះថ្លែងថា «រោងចក្រទាំងនៅក្រុង Berlin និង Austin គឺជាឡដុតលុយដ៏ធំសម្បើមឥឡូវនេះ។ វាពិតជាដូចជាសំឡេងគ្រហឹមដ៏ធំ ដែលជាសំឡេងនៃការឆេះលុយ»។
លោកនិយាយទៀតថា រោងចក្រ Tesla នៅរដ្ឋ Texas ផលិតបានរថយន្តចំនួនតិចតួចប៉ុណ្ណោះដោយសារបញ្ហាប្រឈមជាច្រើនក្នុងការបង្កើនការផលិតអាគុយថ្មីប្រភេទ ៤៦៨០ ហើយឧបករណ៍សម្រាប់ធ្វើអាគុយប្រភេទ ២១៧០ ជាប់គាំងនៅកំពង់ផែប្រទេសចិន។
«អ្វីៗទាំងអស់នឹងត្រូវដោះស្រាយឲ្យបានឆាប់រហ័ស ប៉ុន្តែវាត្រូវការការយកចិត្តទុកដាក់ខ្លាំង»។
លោកថ្លែងថា រោងចក្រនៅក្រុង Berlin ស្ថិតក្នុងស្ថានភាពប្រសើរជាងបន្តិចដោយសារវាចាប់ផ្តើមប្រើប្រាសអាគុយប្រភេទ ២១៧០សម្រាប់ផលិតរថយន្តនៅទីនោះ។
លោកក៏បានលើកឡើងទៀតថា ការបិទខ្ទប់ដោយសារកូវីដក្នុងទីក្រុង Shanghai ពិតជាលំបាកខ្លាំងណាស់។ ការបិទខ្ទប់នោះប៉ះពាល់ដល់ការផលិតរថយន្តមិនត្រឹមតែនៅរោងចក្រ Shanghai នោះទេតែក៏ប៉ះពាល់ដល់រោងចក្រនៅរដ្ឋ California ផងដែរដែលនៅទីនោះប្រើប្រាស់គ្រឿងបន្លាស់ផលិតក្នុងប្រទេសចិន៕ (យោងតាមប្រភព៖ Reuters)
ចែករំលែកព័តមាននេះ