រាជធានីភ្នំពេញ ៖ បន្ទាប់ពីមានការចង់ឲ្យបង្ហាញពីបណ្តាញសង្គមហ្វេសប៊ុក ចង់ដឹងពីការសម្រេចរបស់សម្តេចតេជោនាយករដ្ឋមន្ត្រី ហ៊ុន សែន ពាក់ព័ន្ធនឹងផែនទីខ្នាត ១/៥០.០០០ ថាដើម្បីងាយស្រួលវាស់វែង និងបោះបង្គោលព្រំដែននោះ សម្តេចតេជោបានអះអាងជាថ្មីថា ផែនទីខ្នាត១/១០០.០០០នៅតែផែនទីផ្លូវការ ។
សម្តេចតេជោបញ្ជាក់ថា «នេះមិនមែនបង្កើតផែនទីថ្មីទ គឺចម្លងផែនទីពីផែនទីខ្នាត១/១០០.០០០ មកខ្នាត១/៥០.០០០ ដើម្បីងាយស្រួលវាស់វែងនិងបោះបង្គោល ។ ផែនទីខ្នាត១/១០០.០០០នៅតែជាផែនទីផ្លូវការ ។ ក្នុងករណីមានការយល់ខុសគ្នា ត្រូវយកផែនទីខ្នាត១/១០០.០០០ មកធ្វើជាមូលដា្ឋនក្នុងការដោះស្រាយដដែល ។ និយាយរួម ការផ្ទេរផែនទីឬចម្លងផែនទីត្រូវតែធានាភាពត្រឹមត្រូវតាមផែនទីដើម និងដើម្បីយកមកធ្វើការវាស់វែងបោះបង្គោលព្រំដែនឱ្យបានត្រឹមត្រូវ ។ យើងសុំជំនាញការបារាំង អាស្រ័យដោយបារាំងជាអ្នកផលិតផែនទីនេះពេលបារាំងដាក់អាណានិគមលើប្រទេសកម្ពុជា វៀតណាម និងឡាវ» ។
ឆ្លើយតបទៅនឹងសំណួររបស់អ្នកសួរតាមបណ្តាញទំនាក់ទំនងសង្គមហ្វេសប៊ុក ឈ្មោះ Seangmeng Chhe សម្តេចតេជោ ហ៊ុន សែន បានឆ្លើយតបនៅថ្ងៃទី២៦ ខែវិច្ឆិកា ថា មូលហេតុដែលរាជរដ្ឋាភិបាលត្រូវការបម្លែងខ្នាតផែនទីឱ្យបានកាន់តែធំនេះ គឺដើម្បីកុំឱ្យពិបាកក្នុងការកំណត់បោះបង្គោលព្រំដែនរវាងកម្ពុជានិងវៀតណាម ។
សម្តេចតេជោនាយករដ្ឋមន្ត្រី បានបង្ហោះនៅក្នុងបណ្តាញទំនាក់ទំនងសង្គមរបស់សម្តេចថា ខ្នាតផែនទី១/១០០.០០០ គឺលំបាករកចំណុចដើម្បីបោះបង្គោលព្រំដែន ព្រោះវាតូចពេក ។ ដូចនេះ ត្រូវផ្ទេរមកផែនទី យូ.ធី.អឹម (UTM)ខ្នាត១/៥០.០០០វិញ ទើបងាយស្រួលវាស់វែង និងរកចំណុចដើម្បីបោះបង្គោលព្រំដែន ។ សម្តេចបញ្ជាក់ថា ដើម្បីធានាភាពត្រឹមត្រូវ ទើបភាគីកម្ពុជានិងវៀតណាម ឯកភាពសរសេរលិខិតរួមគ្នាសុំជំនាញការរបស់បារាំង មកជួយផ្ទេរខ្នាតផែនទីនេះ ។
សម្តេចតេជោ បានបញ្ជាក់ថា រដ្ឋាភិបាលបារាំងបានយល់ព្រមតាមសំណើសុំរបស់សម្តេចហើយ ប៉ុន្តែត្រូវរង់ចាំការឆ្លើយតបជាផ្លូវការប៉ុណ្ណោះ ។ លើសពីនេះទៀត សម្តេចតេជោ បានពន្យល់យ៉ាងពិស្តារនៅលើហ្វេសប៊ុករបស់សម្តេច ពីរបៀបនៃការបង្រួញខ្នាតផែនទីដែលគេអាចផ្ទេរខ្នាតផែនទីនេះរហូតដល់១/១០.០០០ក៏មានដែរ ។ ការពង្រីកផែនទីឱ្យកាន់តែធំនេះ គឺដើម្បីងាយស្រួលក្នុងការកំណត់ទីតាំងបោះបង្គោលព្រំដែន ។
ទាក់ទងនឹងរឿងនេះដែរ មេដឹកនាំគណបក្សសង្គ្រោះជាតិ លោក សម រង្ស៊ី កាលពីថ្ងៃទី២៥ ខែវិច្ឆិកា បានថ្លែងគាំទ្រគំនិតរបស់សម្តេចតេជោនាយករដ្ឋមន្ត្រី ហ៊ុន សែន ដែលលើកឡើង ថាជាគឺបំណងប្រាថ្នាដែលលោកតែងតែគិតចង់បានដែរ ។
សូមរឭកថា កាលពីថ្ងៃទី២៦ ខែវិច្ឆិកាកន្លងទៅ សម្ដេចតេជោនាយករដ្ឋមន្ត្រី ហ៊ុន សែន បានគូសបញ្ជាក់ថា ការប្រើប្រាស់ផែនទីបោនខ្នាត១/១០០.០០០ គឺលំបាករកចំណុចដើម្បីបោះបង្គោលព្រំដែន ព្រោះវាតូចពេក ។ ដូច្នេះត្រូវផ្ទេរមកផែនទី UTM ខ្នាត១/៥០.០០០វិញទើបងាយស្រួល ។
សម្ដេចតេជោ ហ៊ុន សែន បានបញ្ជាក់ថា «យើងប្រើផែនទីបោនខ្នាត១/១០០.០០០នេះជាទីដើម ដែលរដ្ឋធម្មនុញ្ញទទួលស្គាល់។ ខ្នាត១/១០០.០០០គឺលំបាករកចំណុចដើម្បីបោះបង្គោលព្រំដែនព្រោះវាតូចពេក ។ ដូចនេះត្រូវផ្ទេរមកផែនទី UTM ខ្នាត១/៥០.០០០វិញទើបងាយស្រួលវាស់វែង និងរកចំណុចដើម្បី បោះបង្គោលព្រំដែន» ។
គួររំឭកថា សម្តេចតេជោនាយករដ្ឋមន្ត្រី ហ៊ុន សែន និងនាយករដ្ឋមន្ត្រីវៀតណាម លោក ង្វៀន សួនហ្វ៊ុក កាលពីថ្ងៃទី២៣ ខែវិច្ឆិកា កន្លងទៅ ក្នុងអំឡុងពេលអញ្ជើញចូលរួមកិច្ចប្រជុំ កម្ពុជា-ឡាវ-វៀតណាម(CLV) លើកទី៩ ស្តីពីតំបន់ត្រីកោណអភិវឌ្ឍន៍ នៅខេត្តសៀមរាប បានឯកភាពរួមគ្នាធ្វើលិខិតទៅរដ្ឋាភិបាល បារាំង ស្នើសុំអ្នកឯកទេសមកជួយធ្វើផែនទីពីផែនទីខ្នាត១/១០០.០០០ ទៅផែនទីខ្នាត១/៥០.០០០វិញ ៕
ចែករំលែកព័តមាននេះ