រាជធានីភ្នំពេញ ៖ ក្រុមហ៊ុន ម៉ៅ លីហ្គើស៊ី ឯ.ក របស់កម្ពុជា បានចុះអនុស្សរណៈនៃការយោគយល់គ្នា (MOU) ជាមួយក្រុមហ៊ុន HYUNDAI INDOCHINA PTE., LTD. របស់កូរ៉េខាងត្បូង ស្ដីពីសហប្រតិបតិ្តការអាជីវកម្មលើការនាំផ្លែស្វាយស្រស់ពីកម្ពុជាទៅកាន់កូរ៉េខាងត្បូង និងបណ្ដាប្រទេសផ្សេងៗ ។ ពិធីនេះបានរៀបចំឡើងកាលពីថ្ងៃទី២១ វិច្ឆិកា កន្លងទៅនៅសណ្ឋាគារសូហ្វីតែល ភ្នំពេញ ភូគីត្រា ។
ការចុះហត្ថលេខានេះ នឹងធ្វើឲ្យសុបិនក្លាយជាការពិតនៃក្តីប្រាថ្នារបស់រាជរដ្ឋាភិបាល និងប្រជាជនកម្ពុជា-កូរ៉េដែលចង់បាននោះ គឺការនាំចេញផ្លែស្វាយ និងផ្លែឈើផ្សេងៗទៀតទៅកាន់កូរ៉េ និងបណ្តាប្រទេសផ្សេងៗក្នុងពិភពលោក ។
ក្រុមហ៊ុន HYUNDAI INDOCHINA PTE., LTD. នឹងអាចនាំផ្លែស្វាយ និងផ្លែឈើផ្សេងៗទៀតរបស់កម្ពុជាទៅកាន់ទីផ្សារបានច្រើន ដើម្បីចូលរួមលើកស្ទួយសេដ្ឋកិច្ចជាតិ និងប្រជាកសិករកម្ពុជាឲ្យកាន់តែមានជីវភាពធូរធាមួយកម្រិតថែមទៀត ។
លោក ម៉ៅ គន្ធពិសី នាយកប្រតិបត្តិក្រុមហ៊ុនម៉ៅ លីហ្គើស៊ី ឯ.ក និយាយថា ៖ «ជំហានដំបូង ក្រុមហ៊ុនរបស់លោកនឹងនាំចេញផ្លែស្វាយស្រស់ប្រហែលជា៦ពាន់ទៅ១ម៉ឺនតោនតាមយន្តហោះ ព្រោះសក្ដានុពលស្វាយមានច្រើន។ ចម្ការរបស់ក្រុមហ៊ុនខ្ញុំ មានជាង៤០០ហិកតា ដែលមានស្វាយស្រាប់ ប៉ុន្តែយើងនឹងវិនិយោគទិញ និងដាំខ្លួនឯងបន្ថែមពី៥០០ទៅ១ពាន់ហិកតាទៀត » ។
លោកបន្ថែមថា ក្រុមហ៊ុនលោកនឹងនាំចេញស្វាយចំនួន៤ប្រភេទនៅជំហានដំបូង រួមមាន ស្វាយកែវរមៀត ស្វាយប៉ម ស្វាយខុសរដូវ និងស្វាយកែវចិន ។ ចំណែកភាគីកូរ៉េនឹងជួយផ្នែកបច្ចេកទេស និងរក្សាលំនឹងទីផ្សារតម្លៃស្វាយឲ្យកម្ពុជា ៕
ចែករំលែកព័តមាននេះ