បន្ទាយមានជ័យ ៖ ជនរងគ្រោះ២នាក់ ក្នុងករណីលង់លិចបាត់ ក្នុងទឹកនៅអាងអូរខៃដន ភូមិកូនដំរី សង្កាត់និមិត្ត កាលពីរសៀលម្សិលមិញ(ថ្ងៃទី១៧ ខែមិថុនា) សង្ស័យឆ.ក់ចរន្តអគ្គិសនី នៅខ្យូសយីហោ «យក្សធំ ម្ហូបឆ្ងាញ់» បង្កការភ្ញាក់ផ្អើល ។
ជាក់ស្តែងនៅព្រឹកថ្ងៃទី១៨ ខែមិថុនានេះ នៅបន្តរុករក ខណៈជនរងគ្រោះម្នាក់រកឃើញ កាលពីល្ងាចថ្ងៃកើតហេតុ ។ ជនរងគ្រោះដែលបានរកឃើញឈ្មោះ សែម លឹម ហៀង ហៅពេជ្រ ភេទប្រុស អាយុ២០ឆ្នាំ មានទីលំនៅភូមិទួលពង្រ សង្កាត់ផ្សារកណ្តាល ក្រុងប៉ោយប៉ែត ។
តាមប្រភពថា ការពិនិត្យលើជនរងគ្រោះមានស្នាមឆ.ក់ចំណុចបាតជើងទាំង២ ។ ដោយឡែកជនរងគ្រោះឈ្មោះ ឡេះ ស៊ីណាន ភេទប្រុស អាយុ២៦ឆ្នាំ ជាបុគ្គលិកកាស៊ីណូ និងមានទីលំនៅភូមិទំនប់ក៥ សង្កាត់ប៉ោយប៉ែត នៅមិនទាន់រកឃើញ នៅឡើយទេ មកទល់ព្រឹកថ្ងៃទី១៨ មិថុនា២០២២ ។
មន្ត្រីម្នាក់និយាយថា ប្រតិបត្តិការរុករកជនរងគ្រោះខាងលើ កាលពីល្ងាចម្សិលមិញក្រៅពីមន្ត្រី និងសមត្ថកិច្ចនៅក្រុងប៉ោយប៉ែតក៏មានក្រុមអ្នកមុជទឹកថៃ ចំនួន១១នាក់ បានមកចូលរួមរុករកផងដែរ ប៉ុន្តែពួកគេបានវិលត្រឡប់ទៅថៃវិញ ព្រោះទ្វារព្រំដែនត្រូវបិទតាមម៉ោងកំណត់ ។
មន្ត្រីនិយាយថា ក្រុមអ្នកមុជទឹកថៃ និងវិលមកជាថ្មី ដើម្បីជួយរុករកជនរងគ្រោះម្នាក់ទៀត នៅព្រឹកថ្ងៃ១៨ មិថុនានេះ ។
ពាក់ព័ន្ធករណីសង្ស័យឆ.ក់ចរន្តនេះ ប្រភពថា ម្ចាស់ខ្យូសបានគេចខ្លួនបាត់មិនអាចទាក់ទងសុំការបំភ្លឺបានទែ ។ ដោយឡែកលោកវរសេនីយ៍ព្រំ ពិសិដ្ឋ អធិការរង ទទួលផែនព្រហ្មទណ្ឌនៃអធិការដ្ឋាននគរបាលក្រុងប៉ោយប៉ែត ដែលបានចុះដល់កន្លែងកើតហេតុផ្ទាល់ មិនអាចទាក់ទងសុំកាអត្ថាធិប្បាយលម្អិតបានទេដោយទូរស័ព្ទចុចមិនចូល ។
គួរបញ្ជាក់ថា នៅចំណុចខ្យូសកើតហេតុគេឃើញមានខ្សែភ្លើងដែលតភ្ជាប់ចេញពីព្រីភ្លើងមួយខ្សែ ស្ថិតនៅក្នុងទឹកដែលករណីនេះ អ្នកស្រុកលើកឡើងថា ជាអំពើធ្វេសប្រហែសរបស់ម្ចាស់ខ្យូស ទើបបណ្តាលឲ្យមានករណីគ្រោះថ្នាក់នេះកើតឡើង ។
គួរបញ្ជាក់ថា ចំណុចអាងអូរខៃដនហាក់ ដូចមានជើងកប ព្រោះមានអ្នករងគ្រោះលង់ទឹកស្លា.ប់ជាបន្តបន្ទាប់ជិត១០នាក់មកហើយៗ មុនសម័យកូវីដនៅចំណុចខ្យូសមួយខាងកើតកន្លែងកើតក៏មានបុរស២នាក់លង់ទឹកស្លា.ប់ក្នុងកន្លែងតែ១ដូចករណីខាងលើដែរ ៕
ចែករំលែកព័តមាននេះ