មកមើលផ្ទាល់នៅវត្តថាន់ទើបដឹងថា លោកតាលក់ចម្ពាមកៅស៊ូ ជីវិតឯកោកម្សត់បែបណា
រាជធានីភ្នំពេញ ៖ តែមួយប៉ប្រិចភ្នែកសោះរឿងលោកតាលក់ចម្ពាមកៅស៊ូត្រូវបានគេដឹងឮគ្រប់ៗគ្នា នៅក្នុងព្រះរាជពិធីបុណ្យអុំទូកកន្លងទៅថ្មីៗនេះ
រាជធានីភ្នំពេញ ៖ តែមួយប៉ប្រិចភ្នែកសោះរឿងលោកតាលក់ចម្ពាមកៅស៊ូត្រូវបានគេដឹងឮគ្រប់ៗគ្នា នៅក្នុងព្រះរាជពិធីបុណ្យអុំទូកកន្លងទៅថ្មីៗនេះ ។ ទោះបីជាបែបណា ការលក់ចម្ពាមកៅស៊ូបាញ់សត្វរបស់លោកតា ទំនងជាមិនបានគិតទៅដល់បាតុភាពដែលអាចកើតមានឡើង ដោយការប្រើចម្ពាមនេះទេ ទើបលោកតាយកទៅអង្គុយលក់ដែលចម្ពាម១ថ្លៃ៣០០០រៀល ។
ក្រោយពេលកម្លាំងមានសមត្ថកិច្ចការពារក្នុងព្រះរាជពិធីបុណ្យអុំទូក នៅថ្ងៃទី ១៤ វិច្ឆិកា កន្លងមកថ្មីៗនេះ បានបញ្ឈប់លោកតាមិនឱ្យលក់ចម្ពាមកៅស៊ូដែលអាចបង្កគ្រោះថ្នាក់ជាយថាហេតុតទៅទៀតនោះ ហើយលោកតាក៏យល់ព្រមទៅនឹងការស្នើសុំនេះផងដែរ។ សមត្ថកិច្ចបានដកហូតចម្ពាមកៅស៊ូរបស់គាត់អស់ចំនួន ២២ចម្ពាម និងបានផ្តល់ប្រាក់មកឱ្យគាត់ចំនួន៥ម៉ឺនរៀលផងដែរ ជាថ្នូរនិងការដកហូតនោះ ។ នេះបើយោងតាមការរៀបរាប់ប្រាប់អ្នកយកព័ត៌មាន កោះសន្តិភាពកាលពីរសៀលថ្ងៃទី ១៨ វិច្ឆិកា នៅកន្លែងស្នាក់នៅរបស់គាត់ក្នុងវត្តថាន់ ដែលមានទីតាំងនៅតាមបណ្តោយផ្លូវព្រះនរោត្តម សង្កាត់ទន្លេបាសាក់ ខណ្ឌចំការមន ។
លោកតាឈ្មោះ នង សាម៉ុន មានអាយុ៧០ឆ្នាំទៅហើយ បានរៀបរាប់ថា លោកតាជាបុរសពោះម៉ាយ មានកូនប្រុសស្រីចំនួន៥នាក់់នៅក្នុងបន្ទុក ហើយសព្វថ្ងៃលោកតាមកស្នាក់ក្នុងវត្តថាន់ ប្រកបមុខរបរជាអ្នកសំលៀងកាំបិត លក់ដងកាំបិត ដងពូថៅ ខ្នូសកោសដូង សេនកោសខ្យល់ និងចម្ពាមកៅស៊ូជាដើម មានស្រុកកំណើតនៅភូមិ សំបូរ ឃុំសំបូរ ស្រុកសំបូរ ខេត្តក្រចេះ ។
លោកតារំលឹកថា កាលពីថ្ងៃទី១៤ វិច្ឆិកា កន្លងមកនេះ គាត់ត្រូវបានកម្លាំងមានសមត្ថកិច្ចដែលមានតួនាទីការពារសុវត្ថិភាពនៅក្នុងព្រះរាជពិធីបុណ្យអុំទូក ក្នុងថ្ងៃទីពីរនោះបានធ្វើការឃាត់ខ្លួនគាត់ ខណៈពេលដែលគាត់ជិះកង់ដើរសំលៀងកាំបិត និងមានលក់របស់របរមួយចំនួនរួមទាំងចម្ពាមកៅស៊ូផងដែរ ។
ការឃាត់ខ្លួននោះដែរ គឺបានធ្វើឡើងនៅចំណុចម្តុំផ្សារតាប៉ាង ដោយសមត្ថកិច្ចក្នុងឯកសណ្ឋានស៊ីវិលចំនួនពីរនាក់ បានជិះរថយន្តមួយគ្រឿងមកធ្វើការហាមឃាត់មិនឱ្យលក់តទៅទៀត ហើយក៏បាននាំគាត់រួមទាំងលើកកង់ដាក់ទៅលើរថយន្តនាំយកទៅកាន់ទីស្នាក់ការកណ្តាលការពាបុណ្យអុំទុកនៅម្តុំវាលព្រះមេរុ៍ ។
លោកតាបានរៀបរាប់ទៀតថា ខណៈពេលនោះកម្លាំងមានសមត្ថកិច្ចក៏បានណែនាំដល់គាត់កុំឱ្យបន្តលក់ចម្ពាមកៅស៊ូទៀត «ព្រោះខ្លាចធ្លាក់ទៅដល់ដៃសមាសភាពមិនល្អយកទៅប្រើប្រាស់បង្កឱ្យមានគ្រោះថ្នាក់ដល់បងប្អូនប្រជាពលរដ្ឋ ដែលមកចូលរួមនៅក្នុងពិធីបុណ្យ» នេះ ។ ពេលនោះលោកតាក៏យល់ព្រមទៅតាមការស្នើសុំនោះ ហើយកម្លាំងមានសមត្ថកិច្ចក៏បានដកហូតចំពាមកៅស៊ូចំនួន២២ និងផ្តល់ប្រាក់ជាថ្នូរនឹងការដកហូតចម្ពាមកៅស៊ូទាំងនោះ យកទៅរក្សាទុក ដោយបានធ្វើកិច្ចសន្យាបញ្ឈប់នូវការលក់នោះជាបន្តទៅទៀត និងឱ្យលោកតាមានសេរីភាពវិញ ។ ចម្ពាមកៅស៊ូដែលបានដកហូតមាន២២ ក្នុងចំណោមចម្ពាមកៅស៊ូដែលលោកតាមានសរុបរហូតទៅដល់ចំនួន ៤២ ដោយបានលក់អស់ចំនួន២០ចម្ពាមទៅហើយទៅឱ្យអ្នកទិញមួយចំនួន ភាគច្រើនជាអ្នកមានរថយន្តជិះ និងអ្នករត់រ៉ឺម៉កមួយចំនួនផងដែរ ដោយមួយតម្លៃ៥ពាន់រៀល ។ ហើយប្រាក់ដែលកម្លាំងមានសមត្ថកិច្ចឱ្យក្នុងតម្លៃជាថ្នូរដកហូតតែពាក់កណ្តាលទេ ហើយលោកតាក៏មិនមានការអាក់អន់ស្រពន់ចិត្តអ្វីដែរ ។
លោកតា នង សាម៉ុន បានរៀបរាប់ប្រាប់ពីដំណើរជិវិតរបស់គាត់ថា កាលពីអំឡុងឆ្នាំ ១៩៧៤-១៩៧៥ ខណៈពេលដែលលោកតាមានអាយុ៣០ឆ្នាំ បានរៀបការជាមួយនឹងប្រពន្ធរបស់គាត់មានឈ្មោះ សុខ រឿន អាយុប្រហែលជាជាង២០ឆ្នាំដែរ ដោយបានរួមរស់ជាមួយគ្នាបានកូនប្រុសស្រីចំនួន៥នាក់(ស្រី៤នាក់ ប្រុស១នាក់)នៅក្នុងបន្ទុករហូតមកដល់ឆ្នាំ ១៩៩៣ ដោយសារតែការស់នៅមិនចុះសម្រុងនឹងគ្នាពួកគាត់ទាំងពីរនាក់ក៏បានលែងលះគ្នាទៅ ។
ក្រោយពេលដែលបែកគ្នាជាមួយនឹងប្រពន្ធមក លោកតាក៏បានចេញពីស្រុកកំណើតមករស់នៅភ្នំពេញ ដោយប្រកបមុខរបរចិញ្ចឹមជីវិតជាអ្នករត់ម៉ូតូឌុបតែម្នាក់ឯង ដើម្បីបានប្រាក់យកទៅ ជួយចិញ្ចឹមកូនប្រុស ស្រីរបស់លោកតាដែលនៅឯស្រុកកំណើតជាមួយនិងប្រពន្ធរបស់លោកតា ។ លុះមួយរយៈក្រោយមក ដោយសារតែខ្លួនលោកតាកាន់តែចាស់ និងភ្នែកមើលមិនសូវឃើញ ខ្លាចមានគ្រោះថ្នាក់នោះ លោកតាក៏ឈប់រត់ម៉ូតូឌុប បានប្តូរមកដើរសំលៀងកាំបិត ដើម្បីយកប្រាក់មកចិញ្ចឹមជីវិតម្តង ។
ការដើរសំលៀងកាំបិតនេះលោកតាមិនមានផ្ទះស្នាក់នៅទេ គឺទៅស្នាក់នៅក្នុងវត្តស្វាយពពែបានប្រហែលកន្លះឆ្នាំ ក៏បានជួបនិងបុរសម្នាក់ឈ្មោះ តាបាក់ អាយុប្រមាណជាជាង៥០ឆ្នាំ បានហៅគាត់ឱ្យទៅស្នាក់នៅក្នុងវត្តថាន់ ជាមួយគាត់វិញ គ្រាន់បានជាគ្នា ព្រោះគាត់សុទ្ធតែគ្មានផ្ទះសម្បែងដូចគ្នាដែរ ។
លោកតាក៏បានប្រាប់បន្តទៀតថា ក្នុងរយៈពេលជាង៥ឆ្នាំ ដែលលោកតាបានមកស្នាក់នៅក្នុងវត្តថាន់ គឺស្នាក់នៅដោយដាក់កូនគ្រែតូចមួយចងកៅស៊ូតង់ ស្នាក់នៅដើម្បីប្រកបរបរចិញ្ចឹមជីវិតដោយដើរសំលៀងកាំបិត និងលក់ដងពូថៅ ដងកាំបិត ខ្នូសកោសដូង និងសេនកោសខ្យល់ ។
ទាក់ទិននឹងការលក់ចំពាមកៅស៊ូ លោកតាបានឱ្យដឹងថា ដងចំពាមចំនួន៤២ ដែលគាត់យកមកចងធ្វើជាចំពាមនេះគឺបានមកពីការទៅលេងស្រុក បានទិញពីអ្នកស្រុក ហើយបានទិញកៅស៊ូពីផ្សារអូរឫស្សីមកក្រងធ្វើជាខ្សែចំពាម ។
ជាចុងក្រោយលោកតា នង សាម៉ុន ក៏បានសុំថ្លែងអំណរគុណទៅដល់កម្លាំងមានសមត្ថកិច្ចដែលធ្វើការដកហូតយកចំពាមកៅស៊ូពីរូបគាត់ ដូចជួយទិញម៉ៅយកទាំងអស់ក្នុងថ្ងៃបុណ្យអុំទូកនោះ ។ លោកតាបញ្ជាក់ថា អត់ដឹងថាវាមានរឿងរ៉ាវយ៉ាងនេះទេ បើដឹងក៏លោកតាមិនលក់ដែរ ។ ដោយសារតែរឿងរ៉ាវលក់ចំពាមនេះ បានធ្វើឱ្យរូបលោកតាទទួលបានការចាប់អារម្មរណ៍យ៉ាងខ្លាំង ពីសំណាក់ប្រជាពលរដ្ឋ ក្រោយពីមានចុះផ្សាយទៅតាមប្រព័ន្ធផ្សព្វផ្សាយ និងបណ្តាញសង្គមហ្វេសប៊ុក ដោយមានសប្បុរសជនជាច្រើននាក់ ដែលបានមករកលោកតាដល់វត្តថាន់ ដោយបានផ្តល់នូវថវិកា អង្ករ ទឹកសុទ្ធ ជូនដល់រូបលោកតាបានក្រាស់ក្រែលដែរ ដែលលោកតាមិនធ្លាប់បានអំណោយបែបនេះទេ ។
ក្នុងឆាកជីវិតដ៏កម្សត់របស់បុរសពោះម៉ាយឯកោវ័យចំណាស់ដូច រូបលោកតានេះ ត្រូវបានគាត់បន្លុយថា ជីវិតរបស់លោកតានៅតែបន្តស្នាក់នៅក្នុងវត្តថាន់នេះដដែល ព្រោះគ្មានកន្លែងណាដែលសមរម្យជាងនេះទេ ៕
ចែករំលែកព័តមាននេះ