អគ្គិភ័យ​ឆាប​ឆេះ​លំនៅ​ឋាន​23​ខ្នង​កណ្តាល​រាត្រី


រាជធានីភ្នំពេញ ៖ ​លំនៅឋាន​ប្រជាពល​រដ្ឋ​ចំនួន​២៣​ខ្នង​នៅខាងត្បូងផ្សារឆេ​កូ​ ខាង​លិច​ស្ថានីយ​ទូរទស្សន៍​ស៊ីធីអីន ស្ថិត​នៅ​ភូមិ​ក្រោល​គោ សង្កាត់​គីឡូ​ម៉ែត្រ​លេខ៦ ខណ្ឌ​ឫស្សីកែវ ត្រូវ​អគ្គិភ័យ​ឆាបឆេះ កាលពីវេលា​ម៉ោង​១១​និង​៤០​នាទីយប់ថ្ងៃទី១២ មករា នៅ​ពេល​ដែល​ប្រជា​ពល​រដ្ឋកំពុងដេកលង់​លក់​ក្នុង​​ដំណេក​ ។ ការ​​ឆាប​ឆេះ​​នេះអស់រយៈ​ពេល​ប្រមាណ​ជិត​២​ម៉ោង​ និង​ធ្វើ​ឱ្យ​មានការភ្ញាក់ផ្អើលកណ្តាល​យប់​ ហើយប្រជាពលរដ្ឋ​បាន​ក្រោក​ពី​ដំណេក​នាំគ្នា​ជញ្ជូន​អីវ៉ាន់​ទាំងព្រលឹង​ចុងសក់​ ។ ទោះ​បី​​ជា​បែប​​ណា​មិន​មាន​មនុស្ស​ណា​ម្នាក់​រង​របួស​ឡើយ ។   

ទាក់ទិនការកើតមានអគ្គិភ័យនេះសមត្ថកិច្ច​ឱ្យ​ដឹងថា ពុំទាន់ដឹងពីមូល​​ហេតុ​ច្បាស់​លាស់​ឡើយ ។ បើតាមការអះអាង​របស់​អ្នក​រង​គ្រោះ​ខ្លះ​​គឺ​សង្ស័យ​​មក​ពី​ទុស្សេ​​ចរន្ត​អគ្គិសនី​ដែល​ឆេះ​ចេញ​ពី​ផ្ទះ​ឈ្មោះគុយ សុខុម ភេទ​ប្រុស អាយុ​៥៣​ឆ្នាំ ជា​ជន​ពិការ​ភ្នែក​ទាំងពីរ ហើយ​ភ្លើង​បាន​ឆេះ​រាល​ដាល​យ៉ាង​ឆាប់រហ័សទៅលំនៅឋាន​ដែល​នៅ​ក្បែរ​នោះ​ធ្វើអំពី​ឈើ​ប្រក់​សង្ក័សី ។ រថយន្ត​ពន្លត់​អគ្គិភ័យ​ចំនួន​២០​គ្រឿង​បាន​ទៅ​ជួយ​អន្តរាគមន៍​ដែលក្នុងនោះ​រថយន្តពន្លត់​អគ្គិភ័យ​របស់​ស្នង​ការ​ដ្ឋាននគរ​បាលរាជ​ធានី​ភ្នំ​ពេញ​ចំនួន១៥គ្រឿង បាញ់​អស់​ទឹក​៣០​គ្រឿង ​។ រថយន្តអង្គភាពង៧០ ចំនួន​២​គ្រឿង រថយន្ត​កង​រាជ​អាវុធ​ហត្ថ​ចំនួន​២​គ្រឿង និងរថយន្ត​អាកាស​យាន​​ដ្ឋាន​អន្តរ​ជាតិ​ភ្នំពេញ ចំនួន​១​គ្រឿង ។ ទោះ​បី​​ជា​យ៉ាង​ណា លំនៅឋាន​គ្មាន​របៀប​រៀប​រយ​ចំនួន​២៣ខ្នងត្រូវ​ភ្លើង​ឆាប​ឆេះ​​យ៉ាង​សន្ធោ​សន្ធៅ​​នេះ​​មាន​រយៈ​ពេល​ជិត​២​ម៉ោង គឺ​នៅ​វេលា​ម៉ោង​១​និង​៣០នាទី​រំលង​អធ្រាត្រ​ទើប​ភ្លើង​រលត់ ។
នៅយប់នោះគេឃើញលោកជា ពិសី អភិ​បាល​រងខណ្ឌឫស្សីកែវបានដឹកនាំកម្លាំង​សណ្តាប់​ធ្នាប់​ខណ្ឌ​ និងលោកអធិការខណ្ឌ កង​រាជ​អាវុធ​ហត្ថ​​ខណ្ឌ​បានចុះទៅជួយសម្រួលចរាចរណ៍ និង​សហការ​ជាមួយរថយន្ត​ពន្លត់អគ្គិភ័យ​ជួយ​អន្តរា​គមន៍​យ៉ាង​មមា​ញឹក​ តែ​ដោយ​សារ​​ផ្លូវ​តូច​ចង្អៀត​ទើប​​រថយន្ត​មាន​ការពិបាកចេញចូល​​និង​មិនអាច​ជួយ​​សង្គ្រោះបានទាន់ពេល ។

​ឈ្មោះគុយ សុខុម ភេទ​ប្រុស អាយុ​៥៣​ឆ្នាំ ជាជនពិការ​ដែល​​សង្ស័យ​ថា​ជា​ម្ចាស់​ផ្ទះ​ដើម​ហេតុ​បាន​ឱ្យ​ដឹងថា ការ​កើត​មាន​អគ្គិភ័យ បណ្តាល​​មក​ពី​ទុស្សេ​ខ្សែភ្លើង​ចេញពីផ្ទះ​របស់​គាត់ ។ នៅយប់នោះពេលដែល​កំពុង​ដេក​ ស្រាប់តែឮ​សូរ​ផ្ទុះ​​នៅ​លើ​ពិតាន ហើយ​គាត់​ក៏​បាន​ក្រោក​ឡើង​ទៅ​បិទ​បារ៉ែត​ ។ ក្រោយ​មក​ធុំ​ក្លិន​ឈ្ងៀម ​​​ទើប​ភ្លើង​ចាប់​ផ្តើម​ឆេះ​ឡើង​ហើយ​គាត់​ត្រូវ​អ្នកភូមិនាំគ្នាជួយនាំ​ចេញ​ដោយ​ពុំ​យក​អ្វី​បាន​​បន្តិច​ឡើយ ។ បុរសពិការបាន​និយាយ​​ទាំងទឹក​ភ្នែក​​នៅចំពោះមុខប៉ូលិស​ថា​ប្រាក់​របស់គាត់​ចំនួន​ជិត​១ម៉ឺនដុល្លារ​ដែល​ទើប​តែ​​ប្រមូល​តុងទីន​បាន​​ប្រមាណ​១​សប្តាហ៍​ត្រូវ​ភ្លើង​ឆេះ​គ្មានសល់​រួម​ជាមួយ​ទ្រព្យសម្បត្តិ​ផង ។

តាមមន្ត្រី​សមត្ថកិច្ច និង​អាជ្ញាធរ​មូល​ដ្ឋាន​បាន​ឱ្យ​ដឹង​នៅ​ព្រឹក​ថ្ងៃទី​១៣ មករា ឆ្នាំ២០១៣​​ថា លំនៅឋានចំនួន២៣ខ្នងស្ថិតនៅក្រុមទី៧ ភូមិ​ក្រោលគោ សង្កាត់គីឡូម៉ែត្រលេខ៦ ត្រូវ​អគ្គិភ័យ​ឆាបឆេះ​ ដែល​ក្នុងនោះ​លំនៅឋាន​ធ្វើអំពី​ឈើ​ចំនួន១៣​ខ្នង​ត្រូវ​ឆេះ​​ហ្មត់​ទាំងស្រុង ​និង​១០​ខ្នង​ដែល​ជា​ផ្ទះ​ថ្ម​​ត្រូវ​ឆេះ​រោលៗ​ខ្លោច​ខ្មៅ ។ សរុប​​មាន​ប្រជា​ពល​រដ្ឋ​ចំនួន៤៩គ្រូសារ​បាន​រង​គ្រោះ​ ដែល​ក្នុង​នោះ​​​អ្នក​ស្នាក់​នៅអចិន្រៃ្តយ៍​ចំនួន​​៣៤គ្រួសារ ​អ្នក​ស្នាក់​នៅ​បណ្តោះ​អាសន្នចំនួន​១៥​​គ្រួសារ និង​កម្មករ​ចំនួន​១០​នាក់​​ក៏​ជួល​ស្នាក់​នៅ​​ដែរ ។ ទោះបីជាយ៉ាងណា​គេពុំដឹងថា ​ទំហំ​ការ​​ខូច​ខាត​​​គ​ិត​ជា​ប្រាក់អស់ប៉ុន្មាន​នោះ​ឡើយ ។

គួរបញ្ជាក់ថាទីតាំងដែលកើតមានអគ្គិភ័យ​​នេះ​មាន​​​ស្ថាន​ភាព​ផ្លូវតូចចង្អៀត​​ជា​តំបន់​សង់​ផ្ទះ​គ្មាន​របៀប​រៀប​រយ​ ដែល​ជាហេតុ​ធ្វើ​ឱ្យ​រថ​យន្ត​ពន្លត់​អគ្គិភ័យ​ចេញ​ចូល​មាន​ការ​លំបាក និង​ពុំ​អាច​ចូលទៅ​សង្គ្រោះ​ទាន់​​ពេល​​វេលា​បាន ។ ជា​ហេតុ​ធ្វើ​ឱ្យ​អគ្គិភ័យ​ឆាប​ឆេះ​តាម​ចិត្ត​គឺឆេះអស់​ផ្ទះ​ធ្វើអំពីឈើដែល​ឡោមព័ទ្ធ​ទៅ​ដោយ​ផ្ទះថ្ម​អស់​​រយៈ​ពេល​ជិត​២​ម៉ោង​ទើប​ភ្លើង​អស់​អំណាច ។

តាមព័ត៌មាន​ឱ្យ​ដឹងថា ម្ចាស់ផ្ទះ​ត្រូវ​បាន​ប៉ូលិស​​​ខណ្ឌឫស្សីកែវ​នាំខ្លួន​ទៅសាក​សួរ​ ព្រម​ទាំង​​​ធ្វើការ​ស្រាវ​ជ្រាវ​ជុំវិញ​ការ​កើត​មាន​អគ្គិ​ភ័យ​នេះ ។ ​ដើម​ឆ្នាំ​២០១៣​នៅ​ក្នុង​រាជធានី​ភ្នំពេញ​ត្រូវ​​គេរាយការណ៍ថា មាន​អគ្គិភ័យឆាបឆេះ​ចំនួន​៧​លើក​គិត​ទាំងលើក​នេះ​ផង ៕

ព្រឹត្តិការណ៍សង្គម

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

To Top

ការស្ទង់មតិគេហទំព័រថ្មី




សូម​អរគុណ