រាជធានីភ្នំពេញ ៖ កិច្ចសហប្រតិបត្តិការអភិវឌ្ឍន៍ គឺជាគន្លឹះយ៉ាងសំខាន់នៃទំនាក់ទំនងមិត្តភាពរវាងស៊ុយអែតជាមួយកម្ពុជា ។ ក្នុងរយៈពេលប៉ុន្មានឆ្នាំចុងក្រោយនេះ ទំនាក់ទំនងរវាងប្រទេសទាំងពីរកាន់តែរីកចម្រើនគួរឲ្យកត់សម្គាល់ រួមទាំងវិស័យពាណិជ្ជកម្ម និងវិនិយោគផងដែរ ។ ប្រទេសស៊ុយអែត និងកម្ពុជា រីករាយដែលបានក្លាយជាដៃគូប្រវត្តិសាស្ត្រដ៏យូរអង្វែង ចាប់ផ្ដើមតាំងពីឆ្នាំ១៩៧៩ រយៈពេល២ឬ៣ខែប៉ុណ្ណោះបន្ទាប់ពីរបបខ្មែរក្រហមត្រូវបានផ្ដួលរំលំ ។ គ្រានោះ រដ្ឋាភិបាលស៊ុយអែតបានផ្ដល់ជំនួយផ្នែកធនធានមនុស្សមកកម្ពុជាជាបន្ដបន្ទាប់ ។
នាថ្ងៃទី១៧ វិច្ឆិកា កន្លងទៅ នៅវិមានរដ្ឋាភិបាល ទីស្ដីការក្រុមប្រឹក្សាអភិវឌ្ឍន៍កម្ពុជា លោក ឈៀង យ៉ាណារ៉ា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការគណៈកម្មាធិការនីតិសម្បទា និងអភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កម្ពុជា បានទទួលជួបសម្ដែងការគួរសម និងពិភាក្សាការងារជាមួយលោកជំទាវ Ulrika Modeer រដ្ឋលេខាធិការទទួលបន្ទុកកិច្ចសហប្រតិបត្តិការអភិវឌ្ឍន៍នៃក្រសួងការបរទេសស៊ុយអែត និងលោកជំទាវ Maria Sargren ឯកអគ្គរាជទូតស៊ុយអែតប្រចាំកម្ពុជា ក្នុងគោលបំណងពិភាក្សាអំពីកិច្ចសហប្រតិបត្តិការអភិវឌ្ឍន៍រវាងកម្ពុជា-ស៊ុយអែត និងផ្លាស់ប្ដូរយោបល់ និងបទពិសោធន៍ក្នុងការពង្រឹងកិច្ចសហប្រតិបត្តិការកម្ពុជា-ស៊ុយអែត នាពេលអនាគត។
ថ្លែងក្នុងជំនួបនោះ លោក ឈៀង យ៉ាណារ៉ា បានលើកឡើងថា ៖ « យុទ្ធសាស្ត្រនៃកិច្ចសហប្រតិបត្តិការអភិវឌ្ឍន៍របស់ស៊ុយអែតបានតម្រឹមយ៉ាងល្អប្រសើរ និងវិស័យអាទិភាពរបស់រាជរដ្ឋាភិបាលកម្ពុជា និងថ្លែងអំណរគុណចំពោះរាជរដ្ឋាភិបាលស៊ុយអែត ដែលបានគាំទ្រដល់កិច្ចអភិវឌ្ឍន៍របស់កម្ពុជា ព្រមទាំងបានចាត់ទុកស៊ុយអែតជាប្រទេសនាំមុខគេនៅក្នុងរបៀបវារៈនៃកិច្ចសហប្រតិបត្តិការអភិវឌ្ឍន៍ប្រកបដោយប្រសិទ្ធភាព » ។
លោកជំទាវ Ulrika Modeer បានកោតសរសើរចំពោះការឡើងឋានៈរបស់កម្ពុជា នាពេលថ្មីៗនេះពីឋានៈប្រទេសមានចំណូលទាប ទៅជាប្រទេសមានចំណូលមធ្យមកម្រិតទាប និងសម្រេចបាននូវការកាត់បន្ថយភាពក្រីក្រគួរឲ្យកត់សម្គាល់ ។
ជាមួយគ្នានេះ ភាគីទាំងពីរក៏បានផ្លាស់ប្ដូរយោបល់អំពីដំណើរការនៃការធ្វើមូលដ្ឋាននីយកម្មលើគោលដៅអភិវឌ្ឍន៍ប្រកបដោយចីរភាព (SDG Localization) និងទស្សនៈមួយចំនួនអំពីកិច្ចប្រជុំសកលលើកទី២ ស្ដីពីភាពជាដៃគូជាសកលសម្រាប់កិច្ចសហប្រតិបតិ្តការអភិវឌ្ឍន៍ប្រកបដោយប្រសិទ្ធភាព ដែលគ្រោងនឹងប្រព្រឹត្តទៅនៅសាធារណរដ្ឋកេនយ៉ា នាចុងខែនេះ ។
ភាគីទាំងពីរក៏បានពិភាក្សាលើវិស័យអាទិភាពសម្រាប់កិច្ចសហប្រតិបត្តិការអភិវឌ្ឍន៍ កម្ពុជា-ស៊ុយអែត នាពេលអនាគតផងដែរ ដោយក្នុងនោះ លោក ឈៀង យ៉ាណារ៉ា
បានស្នើដល់រាជរដ្ឋាភិបាលស៊ុយអែត ឲ្យបន្ដគាំទ្រដល់វិស័យអាទិភាពនានា ជាពិសេសគោលនយោបាយអភិវឌ្ឍន៍ឧស្សាហកម្ម ២០១៥-២០២៥ ដោយផ្ដោតការយកចិត្ត ទុកដាក់ជាចម្បងទៅលើការអភិវឌ្ឍធនធាន មនុស្ស តាមរយៈការពង្រឹងការអប់រំនៅថ្នាក់មធ្យមសិក្សា និងការបណ្ដុះបណ្ដាលជំនាញវិជ្ជាជីវៈដើម្បីឆ្លើយតបនឹងតម្រូវការទីផ្សារពលកម្មនៅកម្ពុជា ៕
ចែករំលែកព័តមាននេះ