ខេត្តមណ្ឌលគិរី ៖ ពោរពេញដោយអ្នកទេសចរទាំងជាតិ និងអន្តរជាតិក្នុងអំឡុងព្រះរាជពិធីបុណ្យអុំទូកចាប់ពីថ្ងៃទី ១៣ រហូតដល់ថ្ងៃទី១៦ ខែវិច្ឆិកា ឆ្នាំ២០១៦ ។
ផ្ទះសំណាក់ សណ្ឋាគារនិងរីសត ពុំមានបន្ទប់ទំនេរទេ ។
ខេត្តមណ្ឌលគិរី ៖ ពោរពេញដោយអ្នកទេសចរទាំងជាតិ និងអន្តរជាតិក្នុងអំឡុងព្រះរាជពិធីបុណ្យអុំទូកចាប់ពីថ្ងៃទី ១៣ រហូតដល់ថ្ងៃទី១៦ ខែវិច្ឆិកា ឆ្នាំ២០១៦ ។
ផ្ទះសំណាក់ សណ្ឋាគារនិងរីសត ពុំមានបន្ទប់ទំនេរទេ ។ ភាគច្រើនភ្ញៀវដែលទៅសម្រាកនាឱកាសបុណ្យអុំទូកនោះសុទ្ធសឹងតែបានកក់បន្ទប់ទុកមុនទើបមានបន្ទប់សម្រាក បើមិនដូច្នេះទេគឺត្រូវបោះតង់ ។
អ្នកទេសចរម្នាក់ពីខេត្តកំពង់ចាមនិយាយថា ពួកគាត់ទៅមណ្ឌលគិរីលើកទីមួយលក្ខណៈជាក្រុម ហើយបានស្នាក់នៅផ្ទះសំណាក់ជនជាតិភាគតិចនៅភូមិចំការតែ ក្រុងសែនមនោរម្យ ។ ប្រុសៗបានបោះតង់គេងផ្ទាល់ដីដោយសារតែអស់បន្ទប់ផ្ទះសំណាក់ ចំណែក ស្រីៗស្នាក់នៅក្នុងបន្ទប់រួមគ្នាក្នុងតម្លៃ៤៨.០០០រៀល ក្នុងមួយយប់ ។ ចំពោះថ្លៃអាហារ និងការស្នាក់នៅ ពួកគាត់ទទួលយកបាន គឺមានតម្លៃសមរម្យ តែមិនមានកន្លែងស្នាក់នៅគ្រប់គ្រាន់ដោយសារតែ នៅតាមបន្ទប់ផ្ទះសំណាក់ក្នុងខេត្តត្រូវភ្ញៀវកក់អស់ទៅហើយ ។
អ្នកគ្រប់គ្រងនៅរមណីយដ្ឋានទឹកជ្រោះប៊ូស្រា លោកផុន សាវឿន និយាយថា រដូវបុណ្យអុំទូកមានអ្នកទេសចរជាតិទៅកម្សាន្តចំនួន៥.២១៦នាក់ និងភ្ញៀវអន្តរជាតិចំនួន១៥៥នាក់ ។ ចំពោះការលក់ដូរ ម្ហូបអាហារ គឺតម្លៃដូចថ្ងៃធម្មតា ។
អាជីវករម្នាក់លក់ផ្លែឈើនៅរមណីយដ្ឋានទឹកជ្រោះប៊ូស្រា ឈ្មោះវ៉ាន់ និយាយថា គាត់លក់ដូរដាច់ជាងថ្ងៃធម្មតា ពីព្រោះមានភ្ញៀវចេញចូលច្រើន ។
លោក ងិន សុវិមាន ប្រធានមន្ទីរទេសចរណ៍ខេត្តមណ្ឌលគិរី ឱ្យដឹងថា ភ្ញៀវទេសចរអំឡុងពេលបុណ្យអុំទូកឆ្នាំនេះ មានការកើនឡើង ។ ខេត្តមណ្ឌលគិរីទទួលបានភ្ញៀវទេសចរសរុបចំនួន១១.២១២នាក់កើន៧,៩៥%ក្នុងនោះភ្ញៀវទេសចរជាតិ១០.៩៩២នាក់កើន៩,១៨%ធៀបនឹងបុណ្យអុំទូកឆ្នាំ២០១៤ និងភ្ញៀវទេសចរអន្តរជាតិ២២០នាក់ ថយចុះ៣១,០៣% ធៀបនឹងបុណ្យអុំទូកឆ្នាំ២០១៤ ៕
ចែករំលែកព័តមាននេះ