ខេត្តកំពត ៖ អាជ្ញាធរខេត្តកំពត មានលោកចាន់ រឹទ្ធ ប្រធានមន្ទីរកសិកម្មរុក្ខាប្រម៉ាញ់ និងនេសាទខេត្តកំពត រួមទាំងលោកស សារិន ប្រធានការិយាល័យជលផល រួមដំណើរលោកដាញ់ សារីប្រធានមន្ទីររៀបចំដែនដីនគរូបនីកម្មខេត្ត, លោកនាក់ សុវណ្ណារី អភិបាលស្រុកទឹកឈូ និងមន្ត្រី មកពីមន្ទីរផ្សេងៗទៀត ដឹកនាំដោយលោកសេង សេរីបុត្រ អភិបាលរងខេត្ត កាលពីព្រឹកថ្ងៃទី១៤ខែមិថុនា នេះ បានចុះមកពិនិត្យដីមាត់ព្រែកត្រង់ចំណុចផ្លូវវាងស្ពានក្បាលរមាស ស្ថិតក្នុងភូមិត្រពាំងធំ ឃុំជុំគ្រៀល ស្រុកទឹកឈូ ខេត្តកំពត។
ទោះជាមន្ត្រីនៅតាមមន្ទីរនានាចុះមកពិនិត្យនៅមាត់ព្រែកស្ពានក្បាលរមាសនេះយ៉ាងណាក៏ដោយក៏គ្មានមន្ត្រីជំនាញណាម្នាក់និយាយលំអិតអោយដឹងជាផ្លូវការនៅឡើយដែរ។ តែលោកសេង សេរីបុត្រ អភិបាលរងខេត្តបាននិយាយប្រាប់អ្នកយកព័ត៌មានយ៉ាងខ្លីមុនឡើងជិះរថយន្តថា «ការចុះមកនេះ ពិនិត្យមើលដីរដ្ឋព្រោះមានដីកា» ។
អ្នកយកព័ត៌មានបានសួរទៅលោកសេង សេរីបុត្រ អភិបាលរងខេត្តថា ដីកានោះបង្គាប់អោយរុះរើផ្ទះសាងសង់លើផ្លូវវាងស្ពាន ឬក៏យ៉ាងម៉េច? លោកសេង សេរីបុត្រ និយាយប្រាប់អ្នកយកព័ត៌មានថា រង់ចាំបញ្ជាពីឯកឧត្តមអភិបាលខេត្តកំពត ជាអ្នកសម្រេច ។
បើយោងតាមមន្ត្រីម្នាក់ទៀតដែលអមដំណើរលោកអភិបាលរងខេត្តនិយាយថា អាជ្ញាធរខេត្តចុះមកពិនិត្យដីជាប់ស្ពានក្បាលរមាសនេះ មានគម្រោង៖ ទី១-«ឱ្យរុះរើលំនៅឋានអតីតមន្ត្រីយោធាចេញពីលើផ្លូវវាងស្ពានក្បាលរមាសនិងមួយទៀតរុះរើតូបគេលួចសាងសង់លើប្រឡាយក្នុងព្រៃលិចទឹកនៅជាប់និងគល់ស្ពានក្បាលរមាសនោះ ព្រោះកាលឯកឧត្តមជាវ តាយ កាន់ជាអភិបាលខេត្តកំពត ក៏បញ្ជាអោយមន្ត្រីពាក់ព័ន្ធ កាយអាចម៍ដីចេញពីព្រៃលិចទឹកស្ពានក្បាលរមាសនេះម្ដងរួចហើយ ព្រោះមានមន្ត្រីមានគំនិតលោភលន់នៅតែលួចចាក់ដីរំលោភយកដីព្រៃលិចទឹកធ្វើជាកម្មសិទ្ធផ្ទាល់ខ្លួន ។
ចែករំលែកព័តមាននេះ