ខេត្តសៀមរាប ៖ ប្រមុខរាជរដ្ឋាភិបាលកម្ពុជា បានអំពាវនាវដល់ក្រុមមន្ដ្រីឱ្យជំរុញពាណិជ្ជករនិងកសិករខិតខំពង្រឹងគុណភាពផលិតផលរបស់ខ្លួនបន្ថែមទៀត សំរាប់ផ្គត់ផ្គង់ តំរូវការទីផ្សារទេសចរណ៍ដែលកំពុងតែមានសន្ទុះ ដើម្បីកាត់បន្ថយការធ្លុះធ្លាយចំណូលដែលបានមកពីវិស័យនេះទៅប្រទេសជិតខាង។
មានប្រសាសន៍នៅក្នុងសន្និបាតបូកសរុបការងារក្រសួងពាណិជ្ជកម្មនៅរាជធានីភ្នំពេញ កាលពីថ្ងៃទី៩ ខែកុម្ភៈកន្លងទៅ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា បានលើកឡើងថា ចំនួនភ្ញៀវទេសចរជាតិ-អន្ដរជាតិនៅប្រទេសកម្ពុជាមានការកើនឡើង ដោយបាននាំមកជាមួយផងដែរនូវចំណូលយ៉ាងច្រើនសន្ធឹកសន្ធាប់ ប៉ុន្ដែចំណូលមួយចំណែកបានធ្លុះធ្លាយទៅវិញតាមរយៈការនាំចូលផលិតផលពីប្រទេសជិតខាងសំរាប់ផ្គត់ផ្គង់ទីផ្សារទេសចរណ៍។
សម្ដេចតេជោមានប្រសាសន៍ទៀតថា មូលហេតុចំបងនៃការនាំចូលផលិតផលពីប្រទេសជិតខាង ដោយសារតែផលិតផលក្នុងស្រុករបស់យើងមួយចំនួននៅមិនទាន់មានគុណភាពគ្រប់គ្រាន់សំរាប់បំរើឱ្យវិស័យទេសចរណ៍ដ៏មានសក្ដានុពលនេះនៅឡើយ ដែលទាមទារឱ្យមានការ ខិតខំបន្ថែមទៀតទៅលើបញ្ហាពង្រឹងគុណផលិតផលរបស់យើងដើម្បីធានាបាននូវការរីកលូតលាស់នៃសេដ្ឋកិច្ចជាតិ។ បើយើងអាចផលិតផលិតផលរបស់យើងឱ្យមានគុណភាពខ្ពស់ អាចធ្វើការផ្គត់ផ្គង់តំរូវការទីផ្សារទេសចរណ៍បាននោះក៏អាចចាត់ទុកថាជាការនាំចេញផលិតផលនៅនឹងកន្លែងដែរ ដូច្នេះយើងត្រូវធ្វើសកម្មភាពឡើងវិញដើម្បីទាញយកផលប្រយោជន៍ជាអតិបរមានៅក្នុងក្របខណ្ឌការរីកលូតលាស់នៃសេដ្ឋកិច្ចជាតិ ។
ព្រះរាជាណាចក្រកម្ពុជាត្រូវបានគេមើលឃើញថា ជាទឹកដីដ៏មានសក្ដានុពលលើវិស័យទេសចរណ៍ព្រោះតែសំបូរទៅដោយរមណីយ ដ្ឋានវប្បធម៌-ធម្មជាតិយ៉ាងសន្ធឹកសន្ធាប់ ដូចជាបឹងទន្លេសាបដែលជាបឹងទឹកសាបមានទំហំធំជាងគេនៅអាស៊ីអាគ្នេយ៍ប្រកបដោយជីវចំរុះ រួមទាំងសត្វផ្សោតទន្លេមេគង្គដែលប្រទេសដទៃ គ្មាន ហើយតំបន់ឆ្នេរបស់ប្រទេសកម្ពុជាគឺមានសម្រស់ស្រស់ស្អាតមិនចាញ់ប្រទេសដទៃឡើយដែលពេលនេះបានដាក់បញ្ចូលទៅក្នុងសមាជិក ក្លឹបឆ្នេរដែលមានសោភ័ណភាពជាងគេលើលោក។ អ្វីដែលស្ថិតនៅក្នុងចំណាប់អារម្មណ៍ខ្ពស់បំផុតសំរាប់ភ្ញៀវទេសចរទៀតនោះ គឺប្រាសាទអង្គរ និងប្រាសាទព្រះវិហារ ដែលជាសម្បត្ដិមរតវប្បធម៌ដ៏មានតំលៃមិនអាចកាត់ថ្លៃបានរបស់មនុស្សជាតិ ។ ឧទ្យានវប្បធម៌ប្រវត្ដិ សាស្ដ្រអង្គរដ៏ល្បាញល្បីរបស់ព្រះរាជាណាចក្រកម្ពុជា ត្រូវបានជ្រើសរើសជាកន្លែងដ៏ពេញនិយមជាងគេបំផុតនៅក្នុងពិភពលោក។ នេះបើផ្អែកតាមលទ្ធផលស្ទង់មតិរបស់អង្គការ«ទ្រីបអាតវៃស័រ» សហការជាមួយអង្គការ «យូណេស្កូ» ដែលបានធ្វើការស្ទង់មតិតាមប្រព័ន្ធអ៊ីនធើរណេតលើភ្ញៀវទេសចរចំនួន២៤៥.០០០នាក់ ជុំវិញចំណាប់អារម្មណ៍លើឧទ្យានចំនួន៧៨៩ នៃបេតិកភណ្ឌពិភពលោកទាំង៩៩១ ។
សក្ដានុពលពីធម្មជាតិ រួមផ្សំទាំងសន្ដិសុខនៅក្នុងតំបន់មានស្ថានភាពល្អប្រសើរ បានជំរុញឱ្យវិស័យទេសចរណ៍នៅកម្ពុជាមានការរីកលូតលាស់យ៉ាងឆាប់រហ័សបើប្រៀបធៀបទៅនឹងបណ្ដាប្រទេសមួយចំនួននៅក្នុងតំបន់ ។ កម្ពុជារំពឹងថានឹងទទួលបានភ្ញៀវទេសចរអន្ដរជាតិប្រហែលជាង៤លាននាក់ នៅឆ្នាំ២០១៥ ដែលឆ្នាំ២០០០កន្លងទៅ ត្រូវគេដឹងថា ប្រទេសកម្ពុជាទទួលបានភ្ញៀវទេសចរជាង២លាន៤សែននាក់ ហើយ៦០%នៃភ្ញៀវទេសចរបានទិញសំបុត្រចូលទស្សនាប្រាសាទអង្គរ ។ ទន្ទឹមគ្នានោះដែរ បច្ចុប្បន្ននេះក្នុងប្រទេសកម្ពុជាមាន សណ្ឋាគារសរុបចំនួន៤៥៤ ស្មើនឹង២៣.៣៤៩បន្ទប់ ក្នុងនោះ រាជធានីភ្នំពេញ មានសណ្ឋាគារ ១៥៩ ស្មើនឹង៦.៩២០បន្ទប់ និងខេត្ដព្រះសីហនុ មានសណ្ឋាគារ៤៤ ស្មើនឹង១.៧៧១បន្ទប់។ ដោយឡែកខេត្ដសៀមរាប មានសណ្ឋាគារ១២០ ស្មើនឹង៨.៧៦៣បន្ទប់ ក្នុងនោះមានលំដាប់ផ្កាយ៥ ចំនួន៨ ។
រដ្ឋមន្ដ្រីក្រសួងទេសចរណ៍នៃប្រទេសកម្ពុជាលោកថោង ខុន បានមានប្រសាសន៍ប្រាប់តាមទូរស័ព្ទថា នៅក្នុងឆ្នាំ២០១០កន្លងទៅ ប្រទេសកម្ពុជាបានទទួលភ្ញៀវទេសចរប្រមាណជាង២លាននាក់ និងនាំមកនូវចំណូលប្រមាណជាង១.៧០០លានដុល្លារអាមេរិកផងដែរ ប៉ុន្ដែចំណូលប្រមាណ២៥ភាគរយ បានធ្លុះធ្លាយទៅវិញ តាមរយៈការនាំចូលនូវផលិតផលមួយចំនួន ដូចជា ពងមាន់ពងទា បន្លែត្រី សាច់ និងវត្ថុអនុស្សាវរីយ៍ពីប្រទេសក្បែរខាងយើងរួមមានវៀតណាម និងថៃជាដើម។
លោករដ្ឋមន្ដ្រីបានពន្យល់បន្ថែមថា ជាធម្មតាប្រទេសកំពុងអភិវឌ្ឈន៍ភាគច្រើនចំណូលដែលបានមកពីវិស័យទេសចរណ៍ត្រូវធ្លុះធ្លាយទៅវិញប្រមាណ៣០ភាគរយ និង១៥ ភាគរយសំរាប់ប្រទេសមានសេដ្ឋកិច្ចលូតលាស់ ប៉ុន្ដែឆ្លងកាត់ការខិតខំរយៈពេល៥ឆ្នាំចុងក្រោយនេះកម្ពុជាយើងបានកាត់បន្ថយនូវការនាំចូលពងមាន់ពងទា ឬបន្លែត្រីសាច់ ផ្លែឈើផ្សេងៗទៀតបានមួយចំនួនពីខាងក្រៅ ធ្វើឱ្យចំណូលពីវិស័យទេសចរណ៍របស់យើងមានការធ្លុះធ្លាយតែ២៥ភាគរយប៉ុណ្ណេះ ។ វិស័យទេសចរណ៍ត្រូវបានចាត់ទុកថាជាឧស្សាហកម្មគ្មានផ្សែង ឬមាសបៃតង ដែលជាឆ្អឹងខ្នងសេដ្ឋកិច្ចជាតិដ៏ចំបងមួយបន្ទាប់ពីវិស័យកសិកម្ម និងវាយនភណ្ឌនាំចេញ ៕
ចែករំលែកព័តមាននេះ