ភ្នំពេញ៖ អគ្គិភ័យ បានឆាបឆេះឃ្លាំងស្តុកគ្រឿងសំណង់មួយកន្លែង ដោយត្រូវភ្លើងឆេះខូចខាត​អស់ស្ទើរតែទាំងស្រុង ទោះបីជាអាជ្ញាធរសមត្ថកិច្ច ជួយអន្តរាគមន៍​ បាញ់ទឹកពន្លត់យ៉ាងណា​ក៏ដោយ។ ហេតុការណ៍ភ្លើងឆេះផ្ទះនេះ បានកើតឡើង កាលពីវេលាម៉ោង ៥ និង ១៥នាទីល្ងាច​ថ្ងៃទី៩ ខែមិថុនា ឆ្នាំ២០២២ នៅផ្លវលេខ​៤៤៦ កែងផ្លូវលេខ​ ១០៥ ក្នុងសង្កាត់ទួលទំពូងទី១ ខណ្ឌចំការមន។

ប្រភពព័ត៌មានពីអាជ្ញាធរខណ្ឌចំការមន បានប្រាប់​ថា ​​ឃ្លាំងស្តុកគ្រឿងសំណង់ ដែលឆេះនេះ ធ្វើអំពីឈើប្រក់ស័ង្កសី។ ភ្លើងឆេះ ដោយមាន​ផ្សែងខ្មៅហុយទ្រលោម​ឃ្មួញខ្មាញ់។ ភ្លាមនោះ ​បងប្អូនប្រជាពលរដ្ឋ រស់នៅក្បែរខាង រួមទាំងកម្លាំងមានសមត្ថកិច្ចមូលដ្ឋានខណ្ឌចំការមន​ជាច្រើននាក់ បានចុះមកជួយ​អន្តរាគមន៍ពន្លត់ផងដែរ។

​រថយន្តពន្លត់អគ្គិភ័យ មកពីក្រសួងមហាផ្ទៃ ការិយាល័យបង្ការ និងពន្លត់អគ្គិភ័យជាច្រើនគ្រឿង បានមកជួយធ្វើអន្តរាគមន៍ បាញ់ទឹកពន្លត់ផងដែរ។

​នៅពេលភ្លើងរលត់ទៅវិញ គេក៏នៅតែ​មិនទាន់បានដឹងពីមូលហេតុ ដែលនាំឱ្យភ្លើងឆេះឃ្លាំងស្តុក​គ្រឿងសំណង់ទាំងនេះ នៅឡើយទេ ដោយអាជ្ញាធរសមត្ថកិច្ច កំពុង​ស្រាវជ្រាវ។ ប៉ុន្តែភ្លើង បាន​ឆេះ​បំផ្លាញអស់សម្ភារៈសំណង់មួយចំនួនធំ ស្ទើរតែទាំងស្រុងទៅហើយ និងមិនបានបង្កឱ្យមាន​មនុស្សណាម្នាក់ រងគ្រោះថ្នាក់ឡើយ។

​យ៉ាងណាក៏ដោយ អាជ្ញាធរ​សមត្ថកិច្ចជំនាញ បានប្រើប្រាស់ទឹកបាញ់អស់ជាច្រើនរថយន្ត ទើបភ្លើង​រលត់ និងមិនឆេះរាលដាលដល់ផ្ទះនៅក្បែរខាងឡើយ៕ ភី ផល