រាជធានីភ្នំពេញ ៖ អ្នកជំនួញក្នុងប្រទេសកម្ពុជា ដែលទទួលបានជោគជ័យគួរឲ្យកត់សម្គាល់ក្នុងមុខជំនួញចំនួន១១រូបគ្រោងនឹងធ្វើជាវាគ្មិននៅក្នុងសន្និសីទធុរកិច្ចមួយ ស្ដីអំពីរៀនធ្វើជំនួញ ។ សន្និសីទធុរកិច្ចនេះ នឹងធ្វើឡើងជាលើកដំបូងនៅថ្ងៃទី៤ ធ្នូ ២០១៦ នៅវិទ្យាស្ថានបច្ចេកវិទ្យាកម្ពុជា ។
តាមសេចក្តីប្រកាសព័ត៌មានរបស់អ្នករៀបចំកម្មវិធីបានឲ្យដឹងថា សន្និសីទនេះបង្កើតឡើងក្នុងគោលបំណងដើម្បីជួយអ្នកចង់បង្កើតអាជីវកម្ម ក៏ដូចជាអ្នកចាប់ផ្ដើមអាជីវកម្មថ្មី ឲ្យយល់ដឹងកាន់តែច្បាស់ពីរបៀបចាប់ផ្ដើមធ្វើជំនួញ ការគ្រប់គ្រងប្រកបដោយប្រសិទ្ធភាព និងកាត់បន្ថយហានិភ័យនៃការក្ស័យធន ។
នៅក្នុងសេចក្តីប្រកាសរបស់អ្នករៀបចំ បានបង្ហាញនូវអត្តសញ្ញាណវាគ្មិនដែលនឹងចូលរួមនៅថ្ងៃនោះ រួមមាន លោកឧកញ៉ាវេជ្ជបណ្ឌិត គួច ម៉េងលី ស្ថាបនិក MJQ Education Group,លោកឧកញ៉ាបណ្ឌិត ហៃ លីអ៊ាង ស្ថាបនិកសហគ្រាសផលិតឱសថប៉េប៉េអឹម និងលោក សោម សម្បត្តិ ស្ថាបនិកក្រុមហ៊ុនថ្នាំពណ៌ជាតិ នឹងធ្វើការចែករំលែកបទពិសោធន៍ ផ្នត់គំនិត និងលក្ខណសម្បត្តិដែលអាចនាំឲ្យជោគជ័យ ក៏ដូចជាចក្ខុវិស័យ ដំណើរចាប់ផ្ដើម សមិទ្ធផល និងផលវិជ្ជមានទៅកាន់សង្គមក្នុងជំនួញផងដែរ ។
នៅក្នុងថ្ងៃនោះដែរ ម្ចាស់អាជីវកម្មថ្មីៗ ដែលទទួលបានជោគជ័យដូចជា លោក ឡា ទី ស្ថាបនិកហាងការ៉េម La Pops, លោក ជា ឡង់ដា ស្ថាបនិក Book Me Bus, លោក សុខ សុភមង្គល ស្ថាបនិក Codingate, លោក ធុល រឹទ្ធី ស្ថាបនិក Small World និងលោកស្រី ស្រាត មុំសុភា ស្ថាបនិក Sophiya Travel & Tour នឹងចែករំលែកបទពិសោធន៍ជោគជ័យនៅពេលចាប់ផ្ដើមជំនួញរបស់ពួកគាត់ ។
ក្រៅពីនោះ លោក ជី សិលា ស្ថាបនិក Sabay និងលោក សំ កុសល ស្ថាបនិកទស្សនាវដ្ដី ពាណិជ្ជកម្មកម្ពុជា នឹងធ្វើបទបង្ហាញពីឧបសគ្គ បញ្ហាប្រឈម ជំហាននៃការបង្កើតជំនួញ និងរបៀបចាប់ផ្ដើមពីចំណុចសូន្យ ក៏ដូចជាជម្រះការយល់ខុសស្ដីពីការធ្វើជំនួញផងដែរ ។
គួរបញ្ជាក់ថា អ្នកដែលនឹងចូលរួមនៅក្នុងសន្និសីទធុរកិច្ចនោះ នឹងយល់កាន់តែច្បាស់ពីការបង្កើតផ្នត់គំនិតអាជីវកម្ម និងពីមូលហេតុបរាជ័យដែលអ្នករកស៊ី៩០%បានឆ្លងកាត់ យល់ពីដំណើរ និងដំណាក់កាលផ្សេងទៀតនៃអាជីវកម្ម ហេតុផលដែលត្រូវចាប់ផ្ដើម និងបានគំនិតបទពិសោធន៍ល្អៗក្នុងការសម្រេចចិត្តចាប់យកអាជីវកម្មណាមួយសម្រាប់ខ្លួន ៕
ចែករំលែកព័តមាននេះ