ប្រទេសឥណ្ឌូណេស៊ី ៖ សេដ្ឋកិច្ចរបស់ប្រទេសឥណ្ឌូណេស៊ីបានកើនឡើងដូចអ្វីដែលអ្នកវិភាគសេដ្ឋកិច្ចបានព្យាករណ៍ទុកសម្រាប់ត្រីមាសទី៣ ខណៈលោកប្រធានាធិបតី Joko Widodo ខិតខំប្រឹងប្រែងជំរុញការលូតលាស់របស់ប្រទេស ។
ក្រសួងស្ថិតិបាននិយាយកាលពីថ្ងៃចន្ទថា ផលិតផលក្នុងស្រុកសរុប (GDP) បានកើនឡើង ៥,០២%ក្នុងត្រីមាសទី២ បើធៀបនឹងឆ្នាំមុន និងកើនឡើង៣,២%ក្នុងត្រីមាសទី៣ បើធៀបនឹងត្រីមាសទី២ ។
សេដ្ឋកិច្ចធំជាងគេក្នុងអាស៊ីអាគ្នេយ៍នេះបានជួបប្រទះនឹងការលូតលាស់ក្រោម៧% ដែលជាគោលដៅរបស់លោកប្រធានាធិបតី បន្ទាប់ពីលោកបានឡើងកាន់តំណែងកាលពី២ឆ្នាំមុន ដោយមូលហេតុមកពីការធ្លាក់ចុះនៃតម្លៃផលិតផល និងតម្រូវការពិភពលោក ។
លោកប្រធានាធិបតីកំពុងស្វែងរកថវិការាប់ប៊ីលានដុល្លារមកជួយដល់គម្រោងហេដ្ឋារចនាសម្ព័ន្ធរួមមាន ការសាងសង់ផ្លូវថ្នល់ ផ្លូវរថភ្លើង និងកំពង់ផែសមុទ្រជាដើម ។ លោកបាននិយាយកាលពីសប្តាហ៍មុនថា បច្ចុប្បន្ននេះ រដ្ឋាភិបាលបានដាក់គោលដៅលើការលូតលាស់សេដ្ឋកិច្ចច្រើនជាង៦%ក្នុងឆ្នាំ២០១៨ និងការវិនិយោគកើនឲ្យបាន១០% ។
លោក Oliver Jones អ្នកសេដ្ឋកិច្ចក្នុង Capital Economics នៅទីក្រុងឡុងដ៍ និយាយថា ការលូតលាស់ប្រហែលជាត្រូវជាប់ក្នុងអត្រា៥% ក្នុងរយៈពេលប៉ុន្មានឆ្នាំខាងមុខនេះ ។
លោក Weiwen Ng អ្នកសេដ្ឋកិច្ចរបស់ Australia & New Zealand Banking Group ក្នុងប្រទេសសិង្ហបុរី បាននិយាយដែរថា ដោយសារមានភាពមិននឹងនរនៃទីផ្សារ ធនាគារ Bank Indonesia ប្រហែលជាមិនអាចបន្ធូរគោលការណ៍របស់ពួកគេទៀតទេក្នុងឆ្នាំនេះ។ ប៉ុន្តែចំណុចដែលអាចជួយជំរុញដល់ការលូតលាស់សេដ្ឋកិច្ចបាននោះ គឺការកើនឡើងនៃតម្លៃផលិតផលក្នុងពេលថ្មីៗកន្លងមក ។
គួរបញ្ជាក់ថា ការចំណាយរបស់រដ្ឋាភិបាលបានធ្លាក់ចុះ៣%ក្នុងត្រីមាសទី៣ បើធៀបនឹងឆ្នាំមុន ខណៈការចំណាយក្នុងស្រុកកើនឡើង៥%, ការវិនិយោគកើនឡើង៤,១%, ការនាំចេញធ្លាក់ចុះ៦% និងការនាំចូលធ្លាក់ចុះ៣,៩% នាត្រីមាសទី៣នេះ ៕
ចែករំលែកព័តមាននេះ