សមត្ថកិច្ចនគរបាលស្រុក សហការជាមួយនគរបាលខេត្ត បានដេញស្ទាក់ចាប់រថយន្តមួយគ្រឿង ខណៈដែលមានការសង្ស័យ ព្រោះបានហៅឱ្យឈប់ តែរថយន្តនោះមិនព្រមឈប់នោះទេ ហើយបើករថយន្តបុកបារ៉ាស់រត់ថែមទៀត
ខេត្តកំពង់ឆ្នាំង ៖ សមត្ថកិច្ចនគរបាលស្រុក សហការជាមួយនគរបាលខេត្ត បានដេញស្ទាក់ចាប់រថយន្តមួយគ្រឿង ខណៈដែលមានការសង្ស័យ ព្រោះបានហៅឱ្យឈប់ តែរថយន្តនោះមិនព្រមឈប់នោះទេ ហើយបើករថយន្តបុកបារ៉ាស់រត់ថែមទៀត ។ ហេតុការណ៍នេះបានកើតឡើងនៅវេលាម៉ោង១១និង១០នាទីព្រឹក ថ្ងៃទី០១ ខែមិថុនា ឆ្នាំ២០២២ នៅចំណុចគល់ស្ពានជ្រលងម៉ៅង ស្ថិតក្នុងស្រុកកំពង់ត្រឡាច។
បើតាមការបញ្ជាក់ពីមន្ត្រីនគរបាលការិយាល័យគ្រឿងញៀ.នខេត្តកំពង់ឆ្នាំង បានឱ្យដឹងថា ជនសង្ស័យរូបនោះមានឈ្មោះ កុយ ណារឹទ្ធ ហៅរស់ អាយុ៣១ឆ្នាំ មានទីលំនៅភូមិព្រៃពួច ឃុំជ្រៃបាក់ ស្រុករលាប្អៀរ។
មន្ត្រីនគរបាលការិយាល័យគ្រឿងញៀ.នខេត្តកំពង់ឆ្នាំង បន្តទៀតថា នៅមុនពេលកើតហេតុ គេបានឃើញជនសង្ស័យរូបនោះបើករថយន្តមួយគ្រឿងម៉ាកតូយ៉ូតាព្រុស នៅមកដល់ចំណុចទំនប់ឈ្វាំង ក្នុងស្រុករលាប្អៀរ ដោយមានការសង្ស័យ សមត្ថកិច្ចក៏បានហៅឃាត់ ដើម្បីសាកសួរ ប៉ុន្តែជនសង្ស័យមិនព្រមឈប់រថយន្តទេ ហើយបានបើកគេចរត់ខ្លួនឡើងផ្លូវជាតិលេខ៥ រួចបើករត់សំដៅទៅរាជធានីភ្នំពេញទៀត ។
ប្រភពដដែលបន្តថា ពេលនោះសមត្ថកិច្ចនគរបាល បានដេញតាម និងដាក់បារ៉ាស់ស្ទាក់តាមគោលដៅ ។ លុះពេលជនសង្ស័យបើកមកដល់ចំណុចស្ពានជ្រលងម៉ៅ ជួបនឹងរថយន្តធំដែលសមត្ថកិច្ចយកធ្វើបារ៉ាស់ដាក់នោះ ជនសង្ស័យក៏បានបើកចុះស្រែ ទើបសមត្ថកិច្ចចាប់បានតែម្តង ។
ក្រោយការឃាត់រថយន្តខាងលើ សមត្ថកិច្ចក៏បានធ្វើការដកហូតនូវវត្ថុតាងរួមមាន ថ្នាំញៀ.នចំនួន៣៧កញ្ចប់ ស្មើនឹង ៧១.៣៥ក្រាម ។ ហើយបច្ចុប្បន្ន សមត្ថកិច្ចនគរបាល បានកសាងសំណុំរឿងបញ្ជូនជនសង្ស័យ រួមនឹងវត្ថុតាង ទៅកាន់តុលាការចាត់ការតាមនីតិវិធីហើយ៕
ចែករំលែកព័តមាននេះ