ខេត្តបាត់ដំបង ៖ «បើគិតត្រឹមថ្ងៃនេះ ជិត២០ឆ្នាំកន្លងមកហើយ ដែលគ្រួសារខ្ញុំរស់ពឹងលើការដាំបន្លែលក់វិលជុំលើផ្ទៃដីជាងកន្លះហិកតា ដែលខ្ញុំបានជួលពីអ្នកភូមិជាមួយនឹងបំណុលរុំកោះ។ ប៉ុន្តែពេលនេះ ខ្ញុំដោះបំណុលគេបានស្ទើរទាំងស្រុងហើយ ដោយពឹងលើមុខរបរដាំបន្លែលក់វិលជុំនេះឯង តែខ្ញុំប្រឹងងើបចេញពីបំណុលនេះយ៉ាងត្រដាបត្រដួសបំផុត»។
នេះជាពុំនោលរបស់គ្រួសារកសិករមួយ ដែលមានអាជីពដាំបន្លែលក់វិលជុំ នៅជាយក្រុងបាត់ដំបង ។ នៅក្នុងខ្ទមចំការ ក្រោមដំបូលស័ង្កសីសង់ជាប់ប្រឡាយទឹកស្អុយ នារសៀលថ្ងៃទី២៣ ឧសភា អ្នកស្រី ឆន សារីន ហៅជាវ ហាក់កំពុងមមារញឹកយ៉ាងខ្លាំង ជាមួយនឹងកូនស្រីវ័យជំទង់០២នាក់ទៀត នាំគ្នាអង្គុយលាស់ស្លឹកបន្លែដើម «ភ្លៅកង្កែប» រួចចងជាបាច់ៗថ្លឹងលក់ឱ្យម៉ូយ ។
ជាមួយនឹងការងារដ៏មមារញឹកនេះ អ្នកស្រី ជាវ ឆ្លៀតជជែកលេងអំពីមុខរបរដាំបន្លែរបស់គាត់ជាមួយកោះសន្តិភាពបណ្ដើរយ៉ាងដូច្នេះថា «ថ្ងៃនេះ ម៉ូយកុំម៉្មង់ទិញបន្លែដើម«ភ្លៅកង្កែប»ជាច្រើនគីឡូ។ ដូច្នេះហើយទើបខ្ញុំ និងកូនៗស្រូតធ្វើតែបន្លែ «ភ្លៅកង្កែប» នេះ មិនបានកាត់បន្លែផ្សែងលក់ទេ» ។ បើតាមការបរិយាយរបស់កសិករវ័យ៤០ឆ្នាំរូបនេះបានប្រាប់ថា គាត់មិនដាំតែបន្លែ«ភ្លៅកង្កែប»មួយមុខនេះទេ គឺ ដាំច្រើនមុខណាស់ តែដាំវិលជុំក្រោយពេលប្រមូលផលរួចម្ដងៗ ។ ដំណាំដែលគាត់ដាំ គឺតម្រូវតាមទីផ្សារ តែពេលខ្លះក៏ខុសដែរ នៅពេលណាឈ្មូញសម្រុកនាំបន្លែចូលពីប្រទេសជិតខាងច្រើនពេក។
ដំណាំដែលគាត់ និងកសិករដទៃទៀតនិយមដាំជាយៗភូមិនេះ មានដូចជា ជីគ្រប់មុខ ស្ពៃតឿ ស្ពៃចង្កឹះ ភ្លៅកង្កែប ស្ពៃក្ដោប និង ស្ពៃផ្កា ។ល។ អ្នកស្រី ឆន សារីន ហៅ ជាវ និង ស្វាមី មានកូនស្រីចំនួន០៣នាក់រស់ក្នុងបន្ទុក ។ បច្ចុប្បន្ន គ្រួសារអ្នកស្រីរស់នៅ ក្នុងភូមិចំការសំរោង២ សង្កាត់ចំការសំរោង ក្រុងបាត់ដំបង។ សព្វថ្ងៃ គេសង្កេតឃើញមានកសិកររស់នៅក្នុងភូមិចំនួន០២ ក្នុងសង្កាត់នេះ កំពុងនិយមដាំបន្លែវិលជុំនេះលក់លើទីផ្សារ គឺភូមិចំការសំរោង១ និង ភូមិចំការសំរោង២ នេះឯង ។ អ្នកស្រី សារីន បានរំលឹកពីប្រវត្តិនៃការដាំបន្លែនេះថា គ្រួសារអ្នកស្រីបានប្រកបមុខរបរដាំបន្លែលក់វិលជុំនេះអស់រយះពេលប្រមាណ១៧ឆ្នាំកន្លងមកហើយ។
ពោល គឺចាប់តាំងពីកូនស្រីច្បងនៅតូច រហូតដល់ពេលនេះ អ្នកស្រីមានកូនចំនួន០៣នាក់ហើយ។ ប៉ុន្តែអ្នកស្រីមិនភ្លេចបញ្ជាក់ទេថា ផ្ទៃដីដែលគ្រួសារអ្នកស្រីដាំបន្លែចិញ្ចឹមជីវភាព ដែលមានទំហំធំជាងកន្លះហិកតាបន្តិចនោះ រហូតមកដល់សព្វថ្ងៃនេះ គឺអ្នកស្រីជួលគេទេ ។ ដៃបេះសំអាតដើមភ្លៅកង្កែបបណ្ដើរ ចងជាបាច់ៗដាក់ថ្លឹងបណ្ដើរ នៅក្នុងខ្ទមចំការដែលសង់ក្បែរមាត់ប្រឡាយ ជាមួយនឹងកូនស្រីវ័យជំទង់០២រនាក់ អ្នកស្រី ឆន សារីន បានរៀបរាប់អំពីប្រវត្តិដ៏លំបាកលំបិន នៃការចាប់ផ្ដើមអាជីពដាំបន្លែវិលជុំនេះថា ការចាប់ផ្ដើមដំបូងពិតជាជួបការលំបាកសម្បើមណាស់ ព្រោះពេលនោះចាប់ផ្ដើមពីបាតដៃទទេ។
ប៉ុន្តែក្រោយមក នៅពេលមានអង្គការ(C.O) ឬ ធនាគារឲ្យចងការប្រាក់បណ្ដាក់ទុន ទើបអ្នកស្រី និង ស្វាមី សម្រេចខ្ចីបុលទុនខ្លះៗ ពីអង្គការមួយចំនួន ដើម្បីពង្រីកមុខរបរដាំបន្លែនេះ និង ទិញសម្ភារប្រើប្រាសក្នុងការស្រោចស្របដដំណាំ។ ត្រង់វគ្គជំពាក់បំណុលធនាគារនេះ គាត់បានលើកឡើងថា ការជំពាក់បំណុលធនាគារកាន់យូរ កាន់តែច្រើនការប្រាក់ មិនងាយស្រូលដូចការគិតទេ។ ពេលដែលគាត់ជួបបញ្ហាលំបាកបំផុត គឺ ដំណាំមិនទទូលបានផល តែបើទទូលបានទិន្នផលប្រសើរហើយ បែរជាត្រូវជួបបញ្ហាទីផ្សារដ៏អាក្រក់ទៅវិញ។ រកចំណូលមិនបាន ស្របពេលដល់រដូវកាលត្រូវបង់ការប្រាក់ទៅធនាគារទៀត។ នេះជាបញ្ហាធំបំផុតសម្រាប់កសិករដាំបន្លែវិលជុំដូចគ្រួសារគាត់ ដែលត្រូវប្រមូលប្រាក់បង់ឲ្យធនាគាររាល់ខែ។
អ្នកស្រី ជាវ បានប្រាប់ថា ព្រោះតែបំណុលធនាគារនេះ គ្រួសារគាត់បានរស់ត្រាំត្រែងបំផុតក្នុងថ្លុកបំណុលអស់រយៈពេលជាច្រើនឆ្នាំ។ ប៉ុន្តែយ៉ាងណាក្ដី មួយរយៈចុងក្រោយនេះ គ្រួសារគាត់បានប្រឹងប្រែងងើបចេញពីបំណុលនេះ យ៉ាងត្រដាបត្រដួសរហូតដល់ពេលនេះ គ្រួសារគាត់ហាក់បានជ្រះស្រឡះខ្លួនប្រាណពីបំណុលរុំកោះនេះច្រើនគួរសមហើយ។ ហើយដំណោះស្រាយទាំងនេះ ក៏ដោយសារតែមួយរយៈចុងក្រោយនេះ បន្លែគ្រប់មុខមានទីផ្សារល្អប្រសើរដែរ បើទោះជាជួបឧបសគ្គកូវីដ១៩ដ៏រ៉ាំរៃក្ដី។
អ្នកស្រី សារីន បានបង្ហាញពីការធូរស្រាលពីបំណុលធនាគារ និង បង្ហាញពីមោទនភាព នៃជីវភាពនៅក្នុងគ្រួសារសព្វថ្ងៃយ៉ាងដូច្នេះថា «សព្វថ្ងៃខ្ញុំ និងស្វាមី មានកូនស្រី០៣នាក់នៅក្នុងបន្ទុក ហើយពួកគេសុទ្ធតែស្ថិតក្នុងការសិក្សាទាំងអស់។ រាល់ការចំណាយលើការសិក្សារបស់កូនៗ និង ការចំណាយក្នុងគ្រួសារគ្រប់បែបយ៉ាង គឺ ត្រូវពឹងលើពីចំណូលទាំងស្រុង នៃមុខរបរដាំបន្លែលក់វិលជុំនេះ ព្រោះខ្ញុំគ្មានដីធ្វើស្រែ ឬ ប្រកបមុខរបរផ្សេងទេ។
ពេលនេះខ្ញុំ ហាក់បានជ្រះស្រឡះច្រើនហើយពីបំណុលធនាគារ។ ខ្ញុំអាចមានលទ្ធភាពរកប្រាក់ផ្តត់ផ្គង់ឲ្យកូនរៀនបាន រហូតបច្ចុប្បន្នកូនស្រីច្បងបានចូលរៀននៅមហាវិទ្យាល័យហើយ»។ យើងងាកមកនិយាយអំពីកិច្ចការប្រចាំថ្ងៃរបស់គ្រួសារនេះវិញ បើតាមអ្នកស្រី ឆន សារីន បាននិយាយថា សព្វថ្ងៃនេះគាត់កំពុងដាំដំណាំច្រើនមុខដែរ តែពេលនេះកំពុងប្រមូលផលបណ្ដាក់គ្នា។ ប៉ុន្តែពេលនេះ គាត់កំពុងប្រមូលបន្លែ «ភ្លៅកង្កែប» លក់ ដែលមានទីផ្សារល្អគ្រាន់បើជាង២ខែមុន។ សព្វថ្ងៃនេះ ភ្លៅកង្កែប១គីឡូក្រាមតំលៃចន្លោះពី៣,០០០រៀលទៅ៣,៥០០រៀលសម្រាប់បោះដុំឲ្យម៉ូយ ខណៈ២ខែមុនតំលៃត្រឹមតែ១,០០០រៀលទៅ១,៥០០រៀលប៉ុណ្ណោះ។
គាត់បានបញ្ជាក់ផងដែរថា សព្វថ្ងៃគាត់កំពុងប្រមូលបន្លែភ្លៅកង្កែបផង និងជីគ្រប់មុខផង គឺ ប្រមូលលក់ទៅតាមម៉ូយដែលកុំម៉្មង់ទិញ។ យ៉ាងណាក្ដី ការដាំបន្លែលក់វិលជុំជាលក្ខណៈគ្រួសាររបស់អ្នកភូមិចំការសំរោង១ និង ចំការរោង២ ខាងលើនេះ មិនមែនងាយស្រូលប៉ុន្មានទេ។ នេះបើតាមការលើកឡើងរបស់កសិករ ដែលកំពុងប្រកបអាជីពដាំបន្លែគ្រប់មុខនេះនិយាយ។ កសិករស្ទើរគ្រប់គ្នាតែងលើកឡើងថា កសិករអាចជួបបញ្ហាធំៗចំនួន០២ នៅពេលដាំដំណាំកំពុងលូតលាស់ល្អ និង នៅពេលដល់រដូវកាលប្រមូលផលលក់។
កសិករបាននិយាយថា ឧបសគ្គចម្បងៗទាំង០២នោះ ទី១ នៅពេលដំណាំកំពុងលូតលាស់ល្អ អាចជួបសត្វចង្រៃ០២ប្រភេទដែលពិបាកទប់ស្កាត់ គឺ «សត្វខ្យងពងក្រហម និង ខ្ចៅម្យ៉ាង ដែលមានភិនភាគក្រហមដែរ» និងទី២ ពេលប្រមូលផល កសិករអាចប្រឈមនឹងទីផ្សារធ្លាក់ចុះ ដោយយថាហេតុណាមួយ។ ជាពិសេស ស្របពេលដែលពួកឈ្មួញនាំបន្លែគ្រប់មុខចូលពីប្រទេសជិតខាង។ ដូច្នេះ បន្លែក្នុងស្រុក ត្រូវអេគ្មានទីផ្សារ ធ្វើឲ្យកសិករប្រឈមនឹងប្រាក់បំណុលវ័ណ្ឌកកាន់តែធ្ងន់ធ្ងរ៕
ចែករំលែកព័តមាននេះ