លែងកូនល្មិច ឬកន្ធាយក្បាលកង្កែប ៥៨០ក្បាល ចូលក្នុងទីជម្រកធម្មជាតិ តាមដងទន្លេមេគង្គ
ខេត្តក្រចេះ ៖ អង្គការ WCS សហការជាមួយរដ្ឋបាលជលផល និងខណ្ឌរដ្ឋបាលជលផលក្រចេះ នៅថ្ងៃទី២៣ ខែឧសភា ឆ្នាំ២០២២នេះ បានលែងកូនកន្ធាយក្បាលកង្កែប…
ខេត្តក្រចេះ ៖ អង្គការ WCS សហការជាមួយរដ្ឋបាលជលផល និងខណ្ឌរដ្ឋបាលជលផលក្រចេះ នៅថ្ងៃទី២៣ ខែឧសភា ឆ្នាំ២០២២នេះ បានលែងកូនកន្ធាយក្បាលកង្កែប…
ខេត្តក្រចេះ ៖ អង្គការ WCS សហការជាមួយរដ្ឋបាលជលផល និងខណ្ឌរដ្ឋបាលជលផលក្រចេះ នៅថ្ងៃទី២៣ ខែឧសភា ឆ្នាំ២០២២នេះ បានលែងកូនកន្ធាយក្បាលកង្កែប ឬល្មិច ដែលជាប្រភេទជិតផុតពូជបំផុត ចំនួន ៥៨០ក្បាល ចូលទៅក្នុងទីជម្រកធម្មជាតិ តាមដងទន្លេមេគង្គ នៅខេត្តក្រចេះ ដើម្បីចូលរួមអបអរសាទរទិវាអណ្ដើកពិភពលោក ២៣ ឧសភា នេះបើយោងតាមសេចក្តីប្រកាសព័ត៌មានរបស់ អង្គការ WCS ។
ប្រទេសកម្ពុជា មានទីជម្រក និងសត្វព្រៃដ៏សម្បូរបែបជាច្រើនប្រភេទ ហើយកន្ធាយក្បាលកង្កែប គឺជាប្រភេទដ៏កម្រមួយ ដែលត្រូវការការពារជាបន្ទាន់ ។
កន្ធាយក្បាលកង្កែប គឺជាប្រភេទមួយក្នុងចំណោមប្រភេទកម្រៗជាច្រើនទៀត នៅតាមដងទន្លេមេគង្គ ព្រោះកន្ធាយក្បាលកង្កែបរស់នៅក្នុងអន្លង់ជ្រៅៗ ជាមួយត្រីដូលហ្វីន និងត្រីបបែលយក្សជាដើម ។ ការលែងកន្ធាយក្បាលកង្កែប ដែលជាប្រភេទដ៏សំខាន់ចូល ក្នុងជម្រកធម្មជាតិ គឺជាការរួមចំណែកយ៉ាងសំខាន់ ដល់ការស្តារប្រភេទនេះឡើងវិញ កុំឲ្យផុតពូជនាពេលអនាគត ។
បន្ថែមពីលើនេះ កន្ធាយក្បាលកង្កែប ឬល្មិច ដែលមានឈ្មោះវិទ្យាសាស្ត្រថា Pelochelys cantorii ត្រូវបានចាត់ចូលក្នុងបញ្ជី ក្រហមរបស់អង្គការ IUCN ជាប្រភេទសត្វរងគ្រោះជិតផុតពូជបំផុត ។ វានៅមានចំនួនតិចតួចប៉ុណ្ណោះ ក្នុង ប្រទេសឡាវ និងប្រទេសមួយចំនួនទៀត និងវាទំនងជាបានផុតពូជហើយនៅតាមអតីតទីជម្រកដែលវាធ្លាប់ រស់នៅភាគច្រើនក្នុងប្រទេស វៀតណាម និងថៃ ដោយសារមានការលួចចាប់ និងធ្វើពាណិជ្ជកម្ម រួមទាំងសកម្មភាពខុសច្បាប់ក្នុងការប្រមូលយកពងរបស់យកទៅលក់ឬធ្វើជាអាហារ ។
សម្រាប់នៅកម្ពុជាវិញ អ្នកវិទ្យាសាស្ត្រ មិនបានរកឃើញវត្តមានប្រភេទកន្ធាយនេះទេ ក្នុងចន្លោះពី ឆ្នាំ២០០៣ ដល់ ឆ្នាំ២០០៧ ។ ក៏ប៉ុន្តែនៅក្នុងឆ្នាំ២០០៧ អង្គការអភិរក្សអន្តរជាតិ (CI) បានរកឃើញវត្តមានកន្ធាយនេះ នៅក្នុងទន្លេមេគង្គ ចន្លោះពីខេត្តក្រចេះ ដល់ខេត្តស្ទឹងត្រែង ។ បន្ទាប់ពីបានរកឃើញ អង្គការអភិរក្សអន្តរជាតិ CI បានធ្វើការជាមួយរដ្ឋបាលជលផលការពារប្រភេទកន្ធាយនេះ រហូតដល់ឆ្នាំ២០១៧ ទើបប្រគល់គម្រោង នេះឲ្យមកអង្គការ WCS គ្រប់គ្រងបន្ត ។ ចាប់តាំងពីពេលនោះមក អង្គការ WCS និងរដ្ឋបាលជលផល បាននិងកំពុងធ្វើការអភិរក្សប្រភេទសត្វនេះ តាមរយៈការទប់ស្កាត់រាល់ សកម្មភាពខុសច្បាប់ទាក់ទងនឹងការចាប់ និងការធ្វើពាណិជ្ជកម្មប្រភេទកន្ធាយក្បាលកង្កែបនេះ កម្មវិធីការ ពារសំបុកនៅតាមសហគមន៍ និងគាំទ្រដល់ការ អភិវឌ្ឍសហគមន៍ និងសហគមន៍នេសាទ។
សូមបញ្ជាក់ផងដែរថា គម្រោងអភិរក្សកន្ធាយក្បាលកង្កែបរបស់អង្គការ WCS ទទួលបានការគាំទ្រមូលនិធិពី សហភាពអឺរ៉ុប តាមរយៈគម្រោងដៃគូ ប្រឆាំងការជួញដូរសត្វព្រៃ Margaret A. Cargill Philanthropies និងអង្គការ Turtle Survival Alliance ៕
ចែករំលែកព័តមាននេះ