អ្នកនាំពាក្យ៖ សាលាក្រុងមិនដែលអនុញ្ញាតឲ្យបូជាសពតំណាងរាស្ត្រនៅមុខវត្តបទុម
រាជធានីភ្នំពេញ ៖ កន្លងមកសាលារាជធានីភ្នំពេញ មិនដែលអនុញ្ញាតឲ្យមានការបូជាសពតំណាងរាស្រ្តណាម្នាក់នៅលើសួនច្បារមុខវត្តបទុមវត្តីនោះទេ ។
រាជធានីភ្នំពេញ ៖ កន្លងមកសាលារាជធានីភ្នំពេញ មិនដែលអនុញ្ញាតឲ្យមានការបូជាសពតំណាងរាស្ត្រណាម្នាក់នៅលើសួនច្បារមុខវត្តបទុមវត្តីនោះទេ ។ នេះបើយោងតាមអ្នកនាំពាក្យសាលារាជធានីភ្នំពេញ លោក ម៉េត មាសភក្តី ដែលប្រាប់កោះសន្តិភាពនៅរសៀលថ្ងៃទី៣១ តុលា ២០១៦ ។
ការលើកឡើងរបស់នាយករដ្ឋបាលសាលារាជធានីភ្នំពេញខាងលើនេះ បានធ្វើឡើងបន្ទាប់ពីមានព័ត៌មានផ្សព្វផ្សាយជាសាធារណៈថា សពលោក ប៉ែន សុវណ្ណ អតីតប្រធានក្រុមប្រឹក្សារដ្ឋមន្ត្រី (នាយករដ្ឋមន្ត្រី)សម័យសាធារណរដ្ឋប្រជាមានិតកម្ពុជា ត្រូវបានគណៈកម្មការរៀបចំពិធីបុណ្យសពលោកតំណាងរាស្ត្រគណបក្សសង្គ្រោះជាតិមណ្ឌលកំពង់ស្ពឺរូបនេះ នឹងត្រូវដង្ហែមកតម្កល់នៅវត្តថាន់ក្នុងរាជធានីភ្នំពេញនៅថ្ងៃទី០២ វិច្ឆិកា និងបូជានៅលើសួនច្បារមុខវត្តបទុមវត្តីនៅថ្ងៃទី០៦ វិច្ឆិកា ២០១៦ខាងមុខនេះ ។
យ៉ាងណាក៍ដោយ បើតាមលោក ម៉េត មាសភក្តី គិតត្រឹមវេលាម៉ោង៤និង១៥នាទីរសៀលថ្ងៃទី៣១ តុលានេះ សាលារាជធានីភ្នំពេញមិនទាន់មានទទួលលិខិតផ្លូវការរបស់គណៈកម្មការបុណ្យសព ឬក្រុមគ្រួសារសពដើម្បីស្នើសុំយកទីតាំងមុខវត្តបទុមវត្តីបូជាសពលោក ប៉ែន សុវណ្ណ នៅឡើយទេ ។
ដោយឡែក នៅវិមានរដ្ឋសភាជាតិនារសៀលថ្ងៃចន្ឌដដែលនេះ ក្រុមតំណាងរាស្ត្រមកពីគណបក្សសង្គ្រោះជាតិ និងគណបក្សប្រជាជនកម្ពុជា កំពុងពិភាក្សាដើម្បីសម្រេចយកទីតាំងសមស្របណាមួយដើម្បីបូជាសពលោក ប៉ែន សុវណ្ណ ដែលបានទទួលមរណភាពកាលពីវេលាម៉ោងជាង៧យប់ថ្ងៃទី២៩ តុលា ក្នុងជន្មាយុ៨០ឆ្នាំ ដោយរោគាពាធនៅខេត្តតាកែវនោះ។
កិច្ចប្រជុំខាងលើនេះដែរ ធ្វើឡើងបន្ទាប់ពីរដ្ឋសភានៅព្រឹកថ្ងៃទី៣១ តុលា បានសម្រេចផ្តល់ថវិកាឧបត្ថម្ភ៥០លានរៀល និងបង្កើតគណៈកម្មការមួយដើម្បីរៀបចំពិធីបុណ្យសពលោកតំណាងរាស្ត្រប៉ែន សុវណ្ណ ៕
ចែករំលែកព័តមាននេះ