រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា ប្រសិនបើសង្គមជាតិមួយរវល់តែឈ្លោះគ្នា និងរកាំរកូសជាមួយប្រទេសជិតខាងច្បាស់ណាស់សង្គមជាតិនោះគ្មានឱកាសកសាងហេដ្ឋារចនាសម្ព័ន្ធ ព្រមទាំងគ្មានឱកាសពង្រឹងសមត្ថភាព…
រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា ប្រសិនបើសង្គមជាតិមួយរវល់តែឈ្លោះគ្នា និងរកាំរកូសជាមួយប្រទេសជិតខាងច្បាស់ណាស់សង្គមជាតិនោះគ្មានឱកាសកសាងហេដ្ឋារចនាសម្ព័ន្ធ ព្រមទាំងគ្មានឱកាសពង្រឹងសមត្ថភាព មូលធនមនុស្សឡើយ ។
ថ្លែងក្នុងពិធីប្រគល់សញ្ញាបត្រជូនដល់និស្សិតវិទ្យាស្ថានវ៉ាន់ដា នៅព្រឹកថ្ងៃទី១១ ខែមីនា ឆ្នាំ២០២៥ នៅសាលសន្និបាតកោះពេជ្រ សម្តេចមហាបវរធិបតី ហ៊ុន ម៉ាណែត បានឱ្យដឹងថា ប្រទេសមួយអាចខ្លាំងបានទាល់តែមានធនធានមនុស្ស ហើយការកសាងសង្គមមួយរីកចម្រើនបានទាល់តែសង្គមនោះមានសន្តិភាព ។
សម្តេចមហាបវរធិបតី ហ៊ុន ម៉ាណែត បានបញ្ជាក់ជាថ្មីម្តងទៀតថា ប្រទេសមួយមានការអភិវឌ្ឍ និងរីកចម្រើនទៅបានលុះត្រាណាមានធនធានមនុស្សច្រើន ប្រសិនបើសង្គមគ្មានការសិក្សា និងធនធានមនុស្សទន់ខ្សោយនឹងមិនអាចទៅមុខបានទេ ហើយក៏គ្មានឱកាសប្រកួតប្រជែងជាមួយប្រទេសដទៃបានដែរ ។
ថ្លែងជាសាធារណៈ សម្តេចមហាបវរធិបតី បានគូសបញ្ជាក់ថា ៖ «ប្រសិនបើសង្គមមួយរវល់តែឈ្លោះគ្នាបែកបាក់គ្នា និងមានសង្គ្រាមរ៉ាំរ៉ៃផ្លាស់ប្ដូរពីរបបគ្រប់គ្រងឥតឈប់មានភាពរកាំរកូសឥតឈប់ឈរជាមួយប្រទេសជិតខាងសង្គមជាតិនោះ ពិតជាគ្មានពេលវេលាទៅក្នុងការកសាងហេដ្ឋារចនាសម្ព័ន្ធចាំបាច់ កសាងស្ថាប័ន និងកសាងសមត្ថភាពនៃមូលធនមនុស្សរបស់ខ្លួនបានឡើយ សង្គមនោះប្រហែលជាត្រូវខាត់បងធនធានមនុស្សយ៉ាងច្រើន ដើម្បីគាំទ្រដល់ការប្រយុទ្ធតតាំងគ្នាជាជៀសជាងការកសាងជាតិ» ។
សម្តេចមហាបវរធិបតី នាយករដ្ឋមន្ត្រីក៏បានលើកឡើងថា ផ្ទុយទៅវិញបើសង្គមមួយមានសន្ដិភាព និងស្ថេរភាព ប៉ុន្ដែសង្គមទាំងមូលមិនបានផ្ដល់តម្លៃការសិក្សាអប់រំ ប្រជាពលរដ្ឋមិនខិតខំកសាងសមត្ថភាពរបស់ខ្លួន ប្រទេសជាតិមានធនធានមនុស្សទន់ខ្សោយ ខ្វះឯករាជ្យ ម្ចាស់ការ នឹងមិនអាចប្រកួតប្រជែងជាមួយនឹងគេបានសង្គមនោះក៏មិនអាចមានការរីកចម្រើនបានលឿនបានដែរ ។
លើសពីនេះ សម្ដេចមហាបវរធិបតី នាយករដ្ឋមន្ដ្រី បានលើកឡើងទៀតថា ជាមួយនឹងសេដ្ឋកិច្ចទីផ្សារ និងការបើកចំហររបស់កម្ពុជាការជំរុញសមាហរ័ណកម្មសេដ្ឋកិច្ចទៅក្នុងខ្សែច្រវ៉ាក់ ផ្គត់ផ្គងតំបន់ និងសកលតួរអង្គសេដ្ឋកិច្ចទាំងអស់របស់កម្ពុជាសុទ្ធតែបានដឹងហើយថា «យើងមិនមែនតែប្រកួតប្រជែងជាមួយតួរអង្គក្នុងស្រុកនោះទេ» នៅពេលរាជរដ្ឋាភិបាលចង់ទាក់ទាញវិនិយោគ បង្កើតឧស្សាហកម្មថ្មីដែលមានកម្រិតបច្ចេកវិទ្យាខ្ពស់ជាងមុននឹងមានតម្លៃខ្ពស់ជាងមុនវិនិយោគប្រាកដជានឹងសួរថា «តើយើងមានវិស្វករប៉ុន្មាននាក់? មានកម្មករ ជំនាញ ប៉ុន្មាននាក់? មានអ្នកគ្រប់គ្រងប៉ុន្មាននាក់?» ។
ជាមួយគ្នានោះដែរ សម្តេចមហាបវរធិបតី បានបន្ថែមថា បើសិនកម្ពុជាខ្វះខាតមូលធនមនុស្ស ឬធនមនុស្ស យើងខ្សោយពិបាកបណ្ដុះបណ្ដាល ហើយប្រកដណាស់វិនិយោគគេនឹងជ្រើសរើសប្រទេសផ្សេងជាទីតាំងវិនិយោគរបស់គេ ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ