ភ្នំពេញ៖ រថយន្តលាយបេតុង ១គ្រឿង បានបើកចូលទៅក្នុងវត្ត ជាហេតុធ្វើឲ្យស៊ីទែនផ្ទុកបេតុង ទាក់ខ្លោងទ្វារវត្ត បណ្ដាលឲ្យបាក់ ដួលរាបដល់ដី រងការខូចខាតទាំងស្រុង។ ភ្លាមនោះ កម្លាំងនគរបាលប៉ុស្តិ៍សំរោងក្រោម បានទៅឃាត់រថយន្តខាងលើ ដើម្បីឲ្យដោះស្រាយគ្នា ជាមួយព្រះសង្ឃ និងគណៈកម្មការអាចារ្យវត្ត តែត្រូវតៃកុងឡាននោះ បើកដេញបុកនគរបាលថែមទៀត។
នគរបាល ស្ទើរតែមានគ្រោះថ្នាក់ទៅហើយ ដោយសារតែមេការរបស់ក្រុមហ៊ុនរថយន្តនោះ ទៅដល់ បានស្រែកបញ្ជាឲ្យអ្នកបើកបររថយន្ត បើកសម្រុកចេញពីកន្លែងកើតហេតុ និងដេញបុកនគរបាលថែមទៀត។
ពេលនោះ ជាសំណាងល្អនគរបាលលោតចេញទាន់ និងបានដេញតាមឃាត់រថយន្តនោះបានវិញ ខណៈបើករត់ចេញបានចម្ងាយប្រមាណជាង ៥០ម៉ែត្រ។ ចំណែកអ្នកបើកបរ ចិត្តសឿង បានចុះរត់គេចខ្លួនបាត់ ហើយនគរបាលឃាត់ខ្លួនមេការ ៣នាក់ នាំទៅសាកសួរផងដែរ។
ហេតុការណ៍នោះ បានកើតឡើង កាលពីវេលាម៉ោង ៤ល្ងាច ថ្ងៃទី២០ ខែឧសភា ឆ្នាំ២០២២ នៅក្នុងវត្តត្រពាំងឈូក ស្ថិតនៅក្នុងភូមិចែងម៉ែង សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
រថយន្តបង្កខាងលើ ម៉ាក FUSO ពណ៌ស ពាក់ស្លាកលេខ ភ្នំពេញ 5A-2216 បើកបរ ដោយបុរសម្នាក់។ ចំណែកមេការ ៣នាក់ ដែលនគរបាលឃាត់ខ្លួន នាំទៅសួរនោះ មិនត្រូវបានស្គាល់ឈ្មោះឡើយ។
អ្នកឃើញហេតុការណ៍ បាននិយាយថា នៅក្នុងវត្តត្រពាំងឈូកនេះ ព្រះសង្ឃ ពុំបានហាមឃាត់ការធ្វើដំណើរឆ្លងកាត់វត្តនោះទេ ហើយសព្វថ្ងៃនេះ មានរថយន្តធុនតូច និងម៉ូតូមួយចំនួន បានបើកឆ្លងកាត់តាមវត្ត។ រីឯរថយន្ត និងម៉ូតូភាគច្រើន ជាពិសេសរថយន្តធុនធំៗ បានបើកបរធ្វើដំណើរតាមផ្លូវក្រៅវត្ត។ ដោយឡែក នៅពេលកើតហេតុ រថយន្តបង្កខាងលើ ពុំបើកតាមផ្លូវខាងក្រៅវត្តនោះទេ បែរជាបើកចូលទៅក្នុងវត្តវិញ។
ប្រភពដដែលបានបន្តទៀតថា រថយន្តនេះ បានបើកចេញពីមហាវិថីឈ្នះឈ្នះ ចូលតាមខ្លោងទ្វារវត្តខាងលិច ដែលមានកម្ពស់ខ្ពស់ លុះពេលទៅដល់ខ្លោងទ្វារខាងកើត ដែលមានកម្ពស់ទាប ក៏ស៊ីទែនផ្ទុកបេតុង ទាក់ខ្លោងទ្វារនោះ បណ្ដាលឲ្យបាក់ដួល សង្កត់ពីលើរថយន្តតែម្ដង។
ខណៈនោះ កម្លាំងនគរបាលប៉ុស្តិ៍សំរោងក្រោម បានចុះទៅឃាត់ ដើម្បីឲ្យសម្រសម្រួលគ្នា ជាមួយព្រះសង្ឃនិងគណៈកម្មការអាចារ្យវត្ត ពីការខូចខាតនេះសិន។
ប្រភពខាងលើ បាននិយាយបន្តទៀតថា ខណៈពេលពុំទាន់មានការដោះស្រាយគ្នាផង ស្រាប់តែមានបុរស៣នាក់ ដែលជាមេការក្រុមហ៊ុនលាយបេតុងនោះ ចេញមុខ បញ្ជាឲ្យអ្នកបើកបររថយន្ត បើករថយន្តបង្កនេះចេញ។
ភ្លាមៗនោះ អ្នកបើកបររថយន្តចិត្តសឿង បានបើកចេញ ដេញបុកទាំងនគរបាល ដែលកំពុងឃាត់នោះទៀត ប៉ុន្តែនគរបាល លោតចេញទាន់។ បន្ទាប់មក នគរបាលបានដេញតាមឃាត់បាន ខណៈដែលរថយន្តនេះ បើករត់ចេញពីកន្លែងកើតហេតុ ចម្ងាយប្រមាណជាង ៥០ម៉ែត្រ ប៉ុន្តែអ្នកបើកបរ បានរត់គេចខ្លួនបាត់ ហើយនគរបាល ក៏បានឃាត់ខ្លួនបុរស ៣នាក់ ដែលជាមេការនោះ នាំយកទៅសាកសួរនៅប៉ុស្តិ៍។
តំណាងក្រុមហ៊ុនខាងលើ បានធ្វើការសម្របសម្រួលជាមួយព្រះសង្ឃហើយ។ ប៉ុន្តែមិនទាន់ដឹងថា ត្រូវរ៉ូវគ្នាឬមិនត្រូវបែបណានៅឡើយទេ៕ យន់ ស៊ីថា
ចែករំលែកព័តមាននេះ