ប្រជាជនជប៉ុនកាន់តែមានមនុស្សចាស់ច្រើនក្នុងល្បឿនដែលរដ្ឋអំណាចមានការព្រួយបារម្ភហើយទើបចេញផ្សាយលទ្ធផលស្ថាពរនៃការធ្វើជំរឿនចុងក្រោយដែលបង្ហាញថាអ្នកមានអាយុលើសពី៧៥ឆ្នាំ ពេលនេះមានច្រើនជាងអ្នកមានអាយុក្រោម១៥ឆ្នាំ ។
លើកមុនៗ អាយុដែលធ្វើការប្រៀបធៀបយកត្រឹមលើសពី៦៥ឆ្នាំ ហើយចាប់តាំងពីច្រើនឆ្នាំមកហើយ ចំនួនអ្នកមានអាយុលើសពី៦៥ឆ្នាំ មានអត្រាខ្ពស់ជាងចំនួនកុមារ ។ លើកនេះគេយកអាយុលើសពី៧៥ឆ្នាំមកធ្វើការប្រៀបធៀបនឹងអាយុក្រោម១៥ឆ្នាំ ដោយអ្នកមានអាយុលើសពី៧៥ឆ្នាំតំណាងឱ្យដល់១២,៨% នៃចំនួនប្រជាជនជប៉ុនទល់នឹង១២,៦% សម្រាប់អ្នកមានអាយុក្រោម១៥ឆ្នាំ ។ អ្នកមានអាយុលើសពី៦៥ឆ្នាំមានដល់២៦,៦%នៃចំនួនប្រជាជនសរុបរបស់ជប៉ុន ។
នេះជាលទ្ធផលពេញលេញនៃការធ្វើជំរឿនឆ្នាំ២០១៥ លើប្រជាជនសរុបរបស់ជប៉ុនរួមទាំងជនបរទេសផង ដែលមានការថយចុះ ។ តាមការជំរឿននោះក្នុងឆ្នាំ២០១៥ ប្រជាជនជប៉ុនមាន១២៧,០៩លាននាក់ ទល់នឹង១២៨,០៦លាននាក់រយៈពេល៥ឆ្នាំខាងមុខ ។
រដ្ឋាភិបាលរបស់លោកនាយករដ្ឋមន្ត្រីស៊ីនហ្សូអាបេ អះអាងថា មានការចាប់អារម្មណ៍ចំពោះបញ្ហាធ្ងន់ធ្ងរខាងប្រជាសាស្ត្រដែលជប៉ុនកំពុងជួបប្រទះ តែនៅរិតត្បិតលើការទទួលយកជនបរទេសច្រើន ។ ជនបរទេសមានសរុប១,៧៥លាននាក់ ក្នុងចំណោមប្រជាជនជប៉ុន គឺប្រមាណជា១,៣៨% ៕
ចែករំលែកព័តមាននេះ