អណ្ដាតភ្លើងឆេះផ្ទះគ្រូបង្ហាត់ក្បាច់គុនល្បុក្កតោផ្អើលកូនសិស្សកំពុងដេកលង់លក់
- ភ្នំពេញ
ផ្ទះទុកសម្ភារៈសំរាប់ហាត់ក្បាច់គុន របស់លោកគ្រូល្បុក្កតោមួយកន្លែង ត្រូវបានអគ្គិភ័យឆាបឆេះបង្កឱ្យមានការភ្ញាក់ផ្អើល
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ផ្ទះទុកសម្ភារៈសំរាប់ហាត់ក្បាច់គុន របស់លោកគ្រូល្បុក្កតោមួយកន្លែង ត្រូវបានអគ្គិភ័យឆាបឆេះបង្កឱ្យមានការភ្ញាក់ផ្អើល ដល់សមត្ថកិច្ច ចេញរថយន្តពន្លត់អគ្គិភ័យដើម្បីអន្តរាគមន៍ ហេតុការណ៍នេះបានកើតឡើងកាលពីវេលាម៉ោង២រំលងអធ្រាត្រឈានចូលថ្ងៃទី១៦ ខែឧសភា ឆ្នាំ២០២២ នៅចំណុចក្នុងបុរីសូនី ស្ថិតនៅផ្ទះហាត់ក្បាច់គុនល្បុក្កតោ លេខ៣៣១A ផ្លូវ៨១ ក្នុងសង្កាត់ស្ទឹងមានជ័យទី៣ ខណ្ឌមានជ័យ ។
សេចក្តីរាយការណ៍បន្តថា ម្ចាស់ផ្ទះខាងលើមានឈ្មោះ បៀន វឌ្ឍនៈ ភេទស្រី អាយុ១៨ឆ្នាំ មុខរបរនិស្សិត ចំណែកគ្រូបង្ហាត់ក្បាច់គុនល្បុក្កតោ មានឈ្មោះ ឆន ចាន់រតនៈ ភេទប្រុស អាយុ៤២ឆ្នាំ មុខរបរគ្រូបង្ហាត់ក្បាច់គុនល្បុក្កតោ។ ហើយផ្ទះដែលឆាបឆេះនេះ គឺជាប្រភេទផ្ទះល្វែង ទំហំ៤ម៉ែត្រគុណនិង១៦ម៉ែត្រ ។
បើតាមការរៀបរាប់របស់កូនសិស្សដែលសម្រាកនៅទីនោះ បានអោយដឹងថា មុនពេលកើតហេតុ ពួកគាត់កំពុងតែសម្រាកលង់លក់ដូចសព្វដង ពេលនោះក៏ស្រាប់តែចេះតែមានចំហាយក្តៅទៅៗ ហើយពួកគាត់ក៏បានបើកភ្នែកឡើង ស្រាប់តែឃើញមានអណ្ដាតភ្លើងឆាបឆេះចេញពីបន្ទប់ដាក់សម្ភារៈសម្រាប់ហាត់ក្បាច់គុន និង អស្ណៈបូជា យ៉ាងសន្ធោសន្ធៅតែម្តង ។
ប្រភពដដែលបន្តថា ពេលនោះ ពួកគាត់ក៏បានស្រែកឆោឡោថា «មានភ្លើងឆេះៗ» និងនាំគ្នាយកបំពង់ពន្លត់អគ្គិភ័យមកបាញ់ពន្លត់អស់ជិត១០បំពង់ តែនៅមិនរលត់ ក៏បានទំនាក់ទំនងហៅសមត្ថកិច្ចសុំរថយន្ដពន្លត់អគ្គិភ័យរបស់ការិយាល័យបង្ការពន្លត់អគ្គិភ័យ នៃស្នងការដ្ឋាននគរបាលរាជធានីភ្នំពេញ ចេញអន្តរាគមន៍ចំនួន២គ្រឿង និងធ្វើការបាញ់ពន្លត់អស់ទឹកមួយរថយន្ត ទើបធ្វើអោយភ្លើងរលត់ទៅវិញអស់នៅវេលាម៉ោង២និង៥០នាទីយប់ថ្ងៃដដែលវិញ ។
ពាក់ព័ន្ធក្នុងករណីខាងលើនេះដែរ សមត្ថកិច្ចបានអោយថា ការឆាបឆេះនេះ មិនមានរាលដាលដល់ផ្ទះបងប្អូនប្រជាពលរដ្ឋនោះទេ គឺគ្រាន់តែឆេះបន្ទប់ដាក់សម្ភារៈសម្រាប់ហាត់ក្បាច់គុន គ្រែពូក អស់សម្ភារៈទាំងស្រុង តែមិនមានគ្រោះដល់ដល់មនុស្សនោះទេ ។ ចំពោះមូលហេតុ ដែលបណ្ដាលអោយឆាបឆេះ គឺមកពីម្ចាស់ផ្ទះដុតទៀនធូប ហើយខ្វះការប្រុងប្រយ័ត្ន៕
ចែករំលែកព័តមាននេះ