សហរដ្ឋអាមេរិក ៖ កំពូលមហាសេដ្ឋីលោក Elon Musk បានប្រកាសនៅលើប្រព័ន្ធផ្សព្វផ្សាយសង្គមថា កិច្ចព្រមព្រៀងទិញ Twitter ក្នុងតម្លៃ ៤៤ពាន់លានដុល្លារអាមេរិក ត្រូវផ្អាកជាបណ្តោះអាសន្នសិន បន្ទាប់ពីលោកបានចោទជាសំណួរពីចំនួនគណនីក្លែងក្លាយក្នុងបណ្តាញសង្គមយក្សមួយនេះ នេះបើយោងតាម BBC ចេញផ្សាយនៅថ្ងៃទី១៣ ឧសភា ២០២២នេះ ។
កំពូលមហាសេដ្ឋីជនជាតិអាមេរិករូបនេះ បាននិយាយថា លោកកំពុងរង់ចាំព័ត៌មានលម្អិត ដែលបញ្ជាក់ច្បាស់ពីចំនួនគណនីក្លែងក្លាយ ខណៈដែលក្រុមហ៊ុន Twitter បានរាយការណ៍កាលពីជិត៣សប្តាហ៍មុនថា គណនីក្លែងក្លាយមានចំនួនតិចជាង ៥% នៃអ្នកប្រើប្រាស់សកម្មប្រចាំថ្ងៃរបស់ខ្លួន ក្នុងអំឡុងពេលបីខែដំបូង នៃឆ្នាំ២០២២នេះ ។
បន្ទាប់ពីការប្រកាសរបស់លោក Elon Musk ភាគហ៊ុនរបស់ Twitter បានធ្លាក់ចុះ ២៥% នៅក្នុងទីផ្សារជួញដូរហ៊ុន ។
ទោះជាយ៉ាងណា ឥឡូវនេះលោក Elon Musk ដែលជាមហាសេដ្ឋីមានជាងគេបំផុតក្នុងពិភពលោក កំពុងពិនិត្យមើលតួលេខនៃគណនីក្លែងក្លាយទាំងនោះហើយ ។
នៅក្នុងលក្ខខណ្ឌ នៃកិច្ចព្រមព្រៀងទិញ-លក់ ប្រសិនបើ Twitter ឬលោក Musk ដើរចេញ (មិនលក់ ឫមិនទិញ) ពួកគេត្រូវតែបង់ថ្លៃបញ្ចប់កិច្ចសន្យា ចំនួន ១ពាន់លានដុល្លារអាមេរិក ដល់ភាគីម្ខាងទៀត ៕
ចែករំលែកព័តមាននេះ