រាជធានីភ្នំពេញ ៖ ព្រះរាជអាជ្ញាតំណាងអយ្យការអមសាលាដំបូងរាជធានីភ្នំពេញ កាលពីថ្ងៃទី១៤ មីនាបានចេញសំណើប្រញ៉ាប់មួយទៅស្ថាប័នមានសមត្ថកិច្ច និងអាជ្ញាធរមូលដ្ឋានពាក់ពន្ធ ដើម្បីស្នើសុំកម្លាំងចូលរួមសហការអនុវត្តដីការបស់តុលាការកំពូលចំពោះជនដែលប្រព្រឹត្តរំលោភយកដីបុគ្គលចំនួន៧.៩៧៥ម៉ែត្រការ៉េ នៅភូមិទួលសង្កែ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ នៅវេលាម៉ោង៨ព្រឹកថ្ងៃទី៣១ មីនា ខាងមុខនេះ ។
លិខិតស្នើសុំកម្លាំងចូលរួមសហការអនុវត្តសាលដីកាលេខ៤៧៩ ចុះថ្ងៃទី២០ វិច្ឆិកា ឆ្នាំ២០០៧ របស់តុលាការកំពូលចេញដោយលោកព្រះរាជអាជ្ញារង ហ៊ឹង ប៊ុនជា យោងលើក្រមនីតិវិធីរដ្ឋប្បវេណីនៃព្រះរាជាណាចក្រកម្ពុជាដែលបានប្រកាសឱ្យប្រើប្រាស់តាមព្រះរាជក្រម ន.ស.កេម.០៧០៦.០២១ ចុះថ្ងៃទី៦ កក្កដា ឆ្នាំ២០០៦ ។ ប្រកាសស្តីពីមន្ត្រីទទួលបន្ទុកកិច្ចការអាជ្ញាលេខ៣០ ក.យ.របក.០៧ ចុះថ្ងៃទី១៩ កក្កដា ឆ្នាំ២០០៧ របស់ក្រសួងយុត្តិធម៌ ។ ពាក្យស្នើសុំអនុវត្តរបស់លោកឃុន ហាំង ចុះថ្ងៃទី៤ កុម្ភៈ ឆ្នាំ២០០៨ ដូចកម្មវត្ថុខាងលើតំណាងអយ្យការបានជំរាបជូនទៅស្ថាប័នពាក់ពន្ធឱ្យបានជ្រាបថា សាលដីកាលេខ៤៧៩ ចុះថ្ងៃទី២០ វិច្ឆិកា ២០០៧ របស់តុលាការកំពូលនេះបានចូលជាស្ថាពរ និងមានប្រសិទ្ធភាពអនុវត្តតាមផ្លូវច្បាប់ហើយ ។ ដូច្នេះតំណាងអយ្យការបានកំណត់ពេលអនុវត្ត នៅវេលាម៉ោង៨ព្រឹក ថ្ងៃទី៣១ មីនា ដូចនេះដើម្បីការពារផលប្រយោជន៍ស្របច្បាប់ កម្លាំងកងនគរបាលជាតិរាជធានីភ្នំពេញ ១០០នាក់ កងរាជអាវុធហត្ថ១០០នាក់ និងបូកទាំងកម្លាំងគណៈបញ្ជាការឯកភាពខណ្ឌមួយចំនួនទៀតផង ។
កម្លាំងទាំងអស់បានកំណត់ជួបជុំគ្នានៅទីតាំងអនុវត្តក្នុងភូមិទួលសង្កែ សង្កាត់ទួលសង្កែ ខណ្ឌឫស្សីកែវ ដែលទីនោះមានផ្ទៃដី៧.៩៧៥ម៉ែត្រការ៉េ និងមានប្រជាពលរដ្ឋ៤២គ្រួសារ ពាក់ព័ន្ធ ។ គួរបញ្ជាក់ថា ផ្ទៃដីចំនួនជិត១ហិកតា ស្ថិតនៅភូមិទួលសង្កែ សង្កាត់ទួលសង្កែ ខណ្ឌឫស្សីកែវ នេះ ជាដីរបស់លោកឃុន ហាំង មានប័ណ្ណកម្មសិទ្ធិស្របច្បាប់លេខ០៤៧៨៧ ច ri 0226 ចុះថ្ងៃទី៣១ កក្កដា ឆ្នាំ២០០៣ កាន់កាប់រហូតមក ។ លុះដំណាក់កាលពេលដីឡើងថ្លៃលោកមាស សាវឿន អតីតអភិបាលរងខេត្តព្រះវិហារ បានក្លែងឯកសាររំលោភយកដីនោះទៅលក់ និងពុំចែកឱ្យក្រុមគ្រួសាររបស់លោកទេ ។ ដោយសារការក្លែងឯកសារខុសច្បាប់រំលោភលើដីកម្មសិទ្ធិបុគ្គលយ៉ាងដូច្នេះ លោកឃុន ហាំង បានដាក់ពាក្យបណ្តឹងទៅសាលាដំបូងរាជធានីភ្នំពេញ បន្ទាប់មកតុលាការបានចេញដីកាចាប់ខ្លួនលោកមាស សាវឿន អតីតអភិបាលរងខេត្តព្រះវិហារ ដាក់ពន្ធនាគារព្រៃស ដោយចោទប្រកាន់ពីបទប្រើអំពើហិង្សាទៅលើអ្នកកាន់កាប់អចលនវត្ថុដោយសុចរិត និងពីបទក្លែងលិខិតសាធារណៈ ។
លោកមាស សាវឿន ត្រូវបានតុលាការសាលាដំបូងបើកសវនាការផ្តន្ទាទោសតម្រូវធ្វើការក្នុងពន្ធនាគាររយៈពេល៧ឆ្នាំ ហើយបង្គាប់ទៅសមត្ថកិច្ចឱ្យស្វែងរកចាប់ខ្លួនសាច់ញាតិ និងគូកនដែលពាក់ព័ន្ធមួយចំនួនទៀត ។ ការសម្រេចផ្តន្ទាទោសលោកមាស សាវឿន ដាក់ពន្ធនាគាររយៈពេល៧ឆ្នាំ នោះត្រូវបានជនដែលត្រូវចោទប្តឹងទាស់ទៅសាលាឧទ្ធរណ៍រហូតដល់តុលាការកំពូលទីបំផុត រឿងក្តីនេះលោកមាស សាវឿន នៅតែចាញ់ក្តីលោកឃុន ហាំង និងនៅតែដាក់ពន្ធនាគារ៧ឆ្នាំ ហើយតម្រូវឱ្យប្រគល់ដីទំនាស់៧.៩៧៥ម៉ែត្រការ៉េ នៅភូមិទួលសង្កែ ឱ្យទៅលោកឃុន ហាំងវិញដដែល ។
ដូច្នេះតុលាការកំពូលចេញសាលក្រមទៅសាលាដំបូងរាជធានីភ្នំពេញ ឱ្យអនុវត្តលើដីនោះប្រគល់ទៅម្ចាស់ដើមវិញ ដើម្បីការពារផលប្រយោជន៍អ្នកកាន់កាប់ស្របច្បាប់ ។ ចាំមើលថា តើអយ្យការសាលាដំបូងរាជធានីភ្នំពេញ ប្រើប្រាស់កម្លាំងសមត្ថកិច្ចនគរបាល១០០នាក់ប៉េអឹម១០០នាក់ បូកទាំងកម្លាំងគណៈបញ្ជាការឯកភាពមូលដ្ឋានទៀតនោះ នឹងប៉ះជាមួយប្រជាពលរដ្ឋចំនួន៤២គ្រួសារដែលកំពុងស្នាក់នៅលើដីទំនាស់នោះយ៉ាងណា? ប៉ុន្តែបើងាកទៅមើលផ្លូវច្បាប់ដែលតុលាការកំពូលបានសំរេចតាមតុលាការថ្នាក់ក្រោមនោះ៤២គ្រួសារ នឹងពិតជាត្រូវវិចបង្វិចចុះចេញដោយគ្មានអ្វីតវ៉ាបានទៀតឡើយ ៕
ចែករំលែកព័តមាននេះ