មនុស្សដល់ទៅជាង១៥០.០០០នាក់ កាលពីថ្ងៃទី២២ តុលាលើកគ្នាមកកាន់ក្បែរព្រះបរមរាជវាំងក្រុងបាងកកដើម្បីគោរពព្រះវិញ្ញាណក្ខន្ធព្រះមហាក្សត្រភូមីបុល អាឌុលយ៉ាដេត ដែលសោយទិវង្គតកាលពីថ្ងៃទី១៣ តុលា ក្នុងព្រះជន្ម៨៨ព្រះវស្សា ។
អ្នកនាំពាក្យប៉ូលិសឧត្តមសេនីយ៍SONGPOL WATTANACHAI ថ្លែងប្រាប់រ៉យទ័រថា មានមនុស្សដល់ទៅជាង១៥០.០០០នាក់ ប្រមូលផ្តុំគ្នាហើយចំនួននេះឡើងដល់ទៅជាង២៥០.០០០នាក់នាវេលាល្ងាច ។
រដ្ឋាភិបាលថៃប្រកាសការកាន់ទុក្ខរយៈពេល១ឆ្នាំ ។ មហាជនស្លៀកពាក់ពណ៌ខ្មៅ លើកគ្នាមកតាមរថយន្តបឺស នាវាឬក៏ដើរឆ្ពោះមកកាន់មហាវិថី SANAM LUANG អមដោយដើមឈើស្ថិតនៅច្រកចូលព្រះបរមរាជវាំងតាមបណ្តោយទន្លេចាប្រាយ៉ា ។ រដ្ឋាភិបាលយោធាថៃនៅពុំទាន់កំណត់កាលបរិច្ឆេទបូជាព្រះសពនៅឡើយដែលអាចធ្វើរយៈពេលប្រមាណ១ឆ្នាំ ក្រោយព្រះមហាក្សត្រសោយទិវង្គត ។ រាជទាយាទព្រះអង្គម្ចាស់មហាវ៉ាជីរ៉ាឡុងកន នឹងឡើងគ្រងរាជ្យនាពេលខាងមុខ ក៏ប៉ុន្តែទ្រង់ស្នើពន្យារពេលការឡើងគ្រងរាជ្យនោះសម្រាប់រយៈពេលមួយមិនកំណត់ ដើម្បីទ្រង់អាចកាន់ទុក្ខចំពោះព្រះសពបិតា ។
មនុស្សម្នាលើកគ្នាមកនោះដើម្បីច្រៀងបទភ្លេងជាតិរបស់ស្យាមដែលប្រើរហូតដល់ឆ្នាំ១៩៣២ជាឆ្នាំដែលពួកនាយទាហានវ័យក្មេងធ្វើរដ្ឋប្រហារមួយហើយបញ្ចប់របបរាជានិយមផ្តាច់ការ ។ បទភ្លេងជាតិនោះគឺដើម្បីថ្វាយជា កិត្តិយសដល់ព្រះមហាក្សត្រ ៕
ចែករំលែកព័តមាននេះ