លោកអើយ ! បុកឡើងខ្ទេចដល់ថ្នាក់នេះ
ខេត្តបាត់ដំបង ៖ យ៉ាងហោចណាស់មនុស្ស២នាក់បានស្លា.ប់ និងម្នាក់ទៀតបានរងរបួសធ្ងន់ នៅក្នុងឧបទ្ទវហេតុគ្រោះថ្នាក់ចរាចរណ៍២ករណីដាច់ដោយឡែកពីគ្នា …
ខេត្តបាត់ដំបង ៖ យ៉ាងហោចណាស់មនុស្ស២នាក់បានស្លាប់ និងម្នាក់ទៀតបានរងរបួសធ្ងន់ នៅក្នុងឧបទ្ទវហេតុគ្រោះថ្នាក់ចរាចរណ៍២ករណីដាច់ដោយឡែកពីគ្នា ដែលកើតឡើងនៅក្នុងស្រុកកំរៀង និងស្រុកសង្កែ រវាងរថយន្ត និងរថយន្ត ដែលផ្ដើមចេញពីការធ្វេសប្រហែស និងបើកបរបំពានច្បាប់ចរាចរណ៍ ។
មន្ត្រីនគរបាលចរាចរណ៍បានឲ្យដឹងថា ករណីទី១ បានកើតឡើងនៅវេលាម៉ោង១ និង២០នាទីរសៀល ថ្ងៃទី២២ខែតុលា ឆ្នាំ២០១៦ នៅលើផ្លូវជាតិលេខ៥៩ ត្រង់ចំណុចភូមិបឹងរាំង ឃុំបឹងរាំង ស្រុកកំរៀង ដែលបង្កឡើងដោយរថយន្តម៉ាកហ៊ីយ៉ាន់ដាយ ប្រភេទយីឌុប ពាក់ស្លាកលេខ ភ្នំពេញ 3C-0679 អ្នកបើកបរបានរត់គេចខ្លួនបាត់ ។
មន្ត្រីដដែលបន្តថា រថយន្តនេះបានព្យាយាមបើកជែងរថយន្ត១គ្រឿងទៀតនៅខាងមុខ តែជែងមិនផុតក៏ជ្រុលទៅបុករថយន្តកាមរី១គ្រឿងពាក់ស្លាកលេខ ភ្នំពេញ 2G-1077 ពេញទំហឹង ដែលធ្វើដំណើរបញ្ច្រាសទិសគ្នា បណ្ដាលឲ្យអ្នកបើកបរឈ្មោះ ញឹម សំអុល អាយុ៤០ឆ្នាំ ស្លាប់គាបជាប់ក្នុងរថយន្ត រីឯអ្នករួមដំណើរម្នាក់ទៀតរងរបួសធ្ងន់ ។
ដោយឡែក ករណីទី២ បានកើតឡើងនៅវេលាម៉ោង២ និង៣០នាទីរសៀល ថ្ងៃទី២២ ខែតុលា ឆ្នាំ២០១៦ នៅលើផ្លូវជាតិលេខ៥ ក្នុងភូមិថ្នល់បត់ ឃុំកំពង់ព្រៀង ស្រុកសង្កែ ដែលបង្កឡើងដោយរថយន្តដឹកទំនិញ ប្រភេទយីឌុបពាក់ស្លាកលេខ ព្រះស៊ីហនុ 3A-0469 បើកបរដោយឈ្មោះ សុខ អាន អាយុ២១ឆ្នាំ នៅខេត្តកំពង់ចាម ធ្វើដំណើរពីកើតទៅលិច ។
សមត្ថកិច្ចបានបន្តថា រថយន្តនេះបានព្យាយាមបើកឡើងជែងរថយន្តតូច១គ្រឿងនៅខាងមុខ តែជែងមិនរួចក៏ជ្រុលទៅបុករថយន្តដឹកទំនិញ១គ្រឿងទៀត ពាក់ស្លាកលេខ ពោធិ៍សាត់ 3A-0315 ក្នុងដំណើរបញ្ច្រាសទិសគ្នា បណ្ដាលឲ្យអ្នកបើកបរឈ្មោះ ពោត សាម៉ុន អាយុ៥៨ឆ្នាំ រស់នៅខេត្តពោធិ៍សាត់ ស្លាប់ភ្លាមៗនៅក្នុងកាប៊ីនរថយន្ត រីឯអ្នកបើករថយន្តបង្កមិនមានគ្រោះថ្នាក់ទេ ។
លោក ម៉ែន បូរី នាយផ្នែកដំណោះស្រាយ នៃការិយាល័យចរាចរណ៍ជើងគោកខេត្ត បានឲ្យដឹងថា ឧបទ្ទវហេតុគ្រោះថ្នាក់ចរាចរណ៍ទាំង២ករណីខាងលើនេះ គឺផ្ដើមចេញពីការមិនគោរពច្បាប់ចរាចរណ៍របស់អ្នកបើកបររថយន្តបង្កហេតុទាំង២ករណី ។ លោកថា បើតាមការពិនិត្យស្លាកស្នាមនៅលើទីតាំងកើតហតុ គឺភាគីរថយន្តបង្កទាំង២ករណីខាងលើសុទ្ធតែបានបើកបររំលោភបំពានច្បាប់ ឆ្លងហូសគំនូសលឿងជ្រុលទៅបុករថយន្តគេ ដែលធ្វើដំណើរបញ្ច្រាសទិសគ្នាទាំងកំរោល ។
លោក ម៉ែន បូរី បញ្ជាក់ថា ក្រោយពីធ្វើការវាស់វែង មន្ត្រីចរារចណ៍បាននាំយករថយន្តបង្កគ្រោះថ្នាក់ទាំង២ករណី ទៅកាន់ការិយាល័យចរាចរណ៍ខេត្តហើយដើម្បីដោះស្រាយតាមផ្លូវច្បាប់ ៕
ចែករំលែកព័តមាននេះ