ADផ្ទាំងផ្សព្វផ្សាយពាណិជ្ជកម្ម

Picture

ជំនួប​មេដឹកនាំ​អាស៊ាន​-​អា​មេ​រិ​ក ​៖ ​ឱកាស​កម្ពុជា​ទាញ​អ្នក​វិនិយោគ​អា​មេ​រិ​ក

1 ឆ្នាំ មុន
  • ភ្នំពេញ

រាជធានីភ្នំពេញ ៖ កំលុង​ពេល​កិច្ចប្រជុំ​កំពូល​ពិសេស​អាស៊ាន អា​មេ​រិ​ក ​នៅ​រដ្ឋធានី​វ៉ា​ស៊ី​នតោន ដែល​សម្តេច​តេ​ជោ ហ៊ុន សែន នឹង​ធ្វើ​ជា​សហ​ប្រធាន​ជាមួយ​ប្រ​ធានា​ធិ​បតី​អា​មេ​រិ​ក​ នៅ​ថ្ងៃ​ទី…

រាជធានីភ្នំពេញ ៖ កំលុង​ពេល​កិច្ចប្រជុំ​កំពូល​ពិសេស​អាស៊ាន អា​មេ​រិ​ក ​នៅ​រដ្ឋធានី​វ៉ា​ស៊ី​នតោន ដែល​សម្តេច​តេ​ជោ ហ៊ុន សែន នឹង​ធ្វើ​ជា​សហ​ប្រធាន​ជាមួយ​ប្រ​ធានា​ធិ​បតី​អា​មេ​រិ​ក​ នៅ​ថ្ងៃ​ទី ​១២ ​និង ​១៣ ខែឧសភា ​នេះ មិនមែន​មាន​តែ​កិច្ចប្រជុំ​រវាង​មេដឹកនាំ​បណ្តា​ប្រទេស​អាស៊ាន ​និង​អា​មេ​រិ​ក​នោះ​ទេ ​។ សហគមន៍​អាស៊ាន ​និង​អា​មេ​រិ​ក ក៍​នឹង​មាន​ជំនួប​ខាង​ពាណិជ្ជកម្ម​ផង​ដែរ​ ។

ព្រឹត្តិការណ៍​នេះ ត្រូវ​គេ​មើលឃើញ​ថា ​ជា​ឱកាស​មួយ​របស់​កម្ពុជា​ក្នុង​នាម​ប្រធាន​អាស៊ាន ដែល​អាច​ទាក់ទាញ​អ្នក​វិនិយោគ​ពី​មហាអំណាច​មួយ​នេះ​មក​រកស៊ី​នៅ​កម្ពុជា​បន្ថែម​ទៀត ​។ ស្រប​ពេល​ប្រមុខ​ដឹកនាំ​កម្ពុជា​ចាក​ចេញពី​ប្រទេស​ទៅ​កាន់​ទីប្រជុំ​នៅ​អា​មេ​រិ​ក ​នៅ​ព្រឹក​ថ្ងៃ​ទី​ ១០ ខែ​ឧសភា ប្រតិភូ​សភាពាណិជ្ជកម្ម​កម្ពុជា​ ដឹកនាំ​ដោយ អ្នកឧកញ៉ា គិត ម៉េ​ង បាន​ចេញដំណើរ​ទៅ​កាន់​អា​មេ​រិ​ក តាំងពី​ថ្ងៃ​ទី​ ៨ ខែ​ឧសភា​មក​ម្លេះ ​។ គណៈប្រតិភូ​សភាពាណិជ្ជកម្ម​កម្ពុជា នឹង​បំពេញ​ទស្សនកិច្ច​ធុរកិច្ច​នៅ​សហរដ្ឋអាមេរិក ចាប់ពី​ថ្ងៃ​ទី ​៨ ខែឧសភា ដល់​ថ្ងៃ​ទី​ ១៥ ខែឧសភា ឆ្នាំ​២០២២ ជា​ការ​អមដំណើរ សម្តេច​តេ​ជោ ហ៊ុន សែន ផង ​ហើយគណៈប្រតិភូ​ក៍​មាន​កិច្ចប្រជុំ​សំខាន់​ៗ​ផង​ដែរ​ ។

សភាពាណិជ្ជកម្ម​កម្ពុជា ​បាន​ប្រកាស​ឱ្យដឹង​ថា ពាណិជ្ជករ​កម្ពុជា​នឹង​មានជំនួប​ពាណិជ្ជកម្ម​កម្ពុជា​-​អា​មេ​រិ​ក​ នៅ​ទីក្រុង​ញូយ៉ក​ និង​នៅ​ទីក្រុង​វ៉ា​ស៊ី​ន​តោន ដើម្បី​ពិភាក្សា​អំពី​កាលានុវត្តភាព​ធុរកិច្ច សេដ្ឋកិច្ច និង​សិក្សា​លទ្ធភាព​សហការ​គ្នា​ទៅ​តាម​វិស័យ​នីមួយ​ៗ ។

ជំនួប​ពាណិជ្ជកម្ម​កម្ពុជា​-​អា​មេ​រិ​ក​ នៅ​ទីក្រុង​ញូយ៉ក ដែល​មានការ​ចូលរួម​ពី​ក្រុមហ៊ុន​អា​មេ​រិ​ក​នៅ​ញូយ៉ក និង​ក្រុមហ៊ុន​កម្ពុជា ដើម្បី​ពិភាក្សា​អំពី​កាលានុវត្តភាព​ធុរកិច្ច សេដ្ឋកិច្ច និង​សិក្សា​លទ្ធភាព​សហការ​គ្នា​ទៅ​តាម​វិស័យ​នីមួយ​ៗ ។

ប្រភព​បញ្ជាក់​ថា ជំនួប​ពាណិជ្ជកម្ម​កម្ពុជា​-​អា​មេ​រិ​ក​ នៅ​រដ្ឋធានី​វ៉ា​ស៊ី​ន​តោន មានការ​ចូលរួម​ពី​តំណាង​សភាពាណិជ្ជកម្ម​អា​មេ​រិ​ក ក្រុមប្រឹក្សា​ធុរកិច្ច​អា​មេ​រិ​ក​អាស៊ាន សមាគម​អាជីវកម្ម​សិទ្ធិ​ពិសេស​អា​មេ​រិ​ក និង​ក្រុមហ៊ុន​អា​មេ​រិ​ក​និង​កម្ពុជា ជា​ច្រើន​ ។ ជំនួប​ពាណិជ្ជកម្ម​នេះ លើកយក​ប្រធានបទ​សំខាន់​មក​ជជែក​ពិភាក្សា​រួម​មាន ​៖ ទិដ្ឋភាព​សេដ្ឋកិច្ច​កម្ពុជា អា​មេ​រិ​ក កាលានុវត្តភាព​ធុរកិច្ច​ប្រទេស​ទាំង​ពីរ កិច្ច​ពិភាក្សា​ស៊ីជម្រៅ​លើ​វិស័យ​បច្ចេកវិទ្យា​ព័ត៌មានវិទ្យា វិស័យ​សំណង់ និងវិស័យ​អាជីវកម្ម​សិទ្ធិ​ពិសេស ​។ ធុរជន​នៃ​ប្រទេស​ទាំង​ពីរ​នឹង​ជួប​ពិភាក្សា និង​ពិនិត្យ​លទ្ធភាព​សហការ​ទៅ​តាម​វិស័យ​រៀង​ៗ​ខ្លួន ​។

ចំណែក​កិច្ច​ពិភាក្សា​អំពី​កិច្ច​សហប្រតិបត្តិការ​រវាង​សភាពាណិជ្ជកម្ម​កម្ពុជា និង​សភាពាណិជ្ជកម្ម​អា​មេ​រិ​ក នៅ​ទីស្នាក់ការ​កណ្តាល​របស់​សភាពាណិជ្ជកម្ម​អា​មេ​រិ​ក​នៅ​រដ្ឋធានី​វ៉ា​ស៊ី​ន​តោន និង​ពិនិត្យ​លទ្ធភាព​ចុះ​អនុស្សរណៈ​យោគយល់​គ្នា រវាង​សភាពាណិជ្ជកម្ម​ទាំង​ពីរ​ ។

គួរ​ជម្រាប​ថា ទំហំ​ពាណិជ្ជកម្ម​រវាង​កម្ពុជា​ អា​មេ​រិ​ក​ នា​ពេល​បច្ចុប្បន្ន​នេះ ទោះបីជា​មានការ​ប្រឈម​នឹង​ជំងឺ​កូ​វី​ដ​-១៩ ក៏​ដោយ ក៍​ទំហំ​ពាណិជ្ជកម្ម​រវាង​ប្រទេស​ទាំង​ពីរ​មានការ​កើនឡើង​គួរ​ឱ្យ​កាត់​សំគាល់​ ។ នៅ​ក្នុង​ឆ្នាំ​ ២០២១ ដោយ​ទំហំ​ពាណិជ្ជកម្ម​កម្ពុជា​-​អាម៉េរិក ​សម្រេច​បាន ៧,៨​ ប៊ី​លាន​ដុល្លារ​អាម៉េរិក កើនឡើង​ប្រមាណ ៤២% បើ​ធៀប​នឹង​រយៈពេល​ដូច​គ្នា​កាលពី​ឆ្នាំ​មុន ដែល​សរុប​ជា​ទឹកប្រាក់​ប្រមាណ​ ៥,៥ ​ប៊ី​លាន​ដុល្លារ​ ៕

អត្ថបទសរសេរ ដោយ

កែសម្រួលដោយ