ADផ្ទាំងផ្សព្វផ្សាយពាណិជ្ជកម្ម

Picture

«សៀវភៅ ​ស» ​ឱកាស ​និង​ការ​ប្រឈម​ការ​រកស៊ី​របស់​ស្ត្រី​នៅ​កម្ពុជា

1 ឆ្នាំ មុន
  • ភ្នំពេញ

រាជធានីភ្នំពេញ ៖ «សៀវភៅ ​ស​» ក្បាល​ទី ​២ ​និង​ក្បាល​ទី​ ៣ ដែល​កង​ច្រង​ឡើង​ដោយ​សមាគម​សហគ្រិន​ស្ត្រី​កម្ពុជា បាន​ចេញផ្សាយ​ជា​ផ្លូវការ​ហើយកាលពី​ប៉ុន្មាន​ថ្ងៃមុន​នេះ…

រាជធានីភ្នំពេញ ៖ «សៀវភៅ ​ស​» ក្បាល​ទី ​២ ​និង​ក្បាល​ទី​ ៣ ដែល​កង​ច្រង​ឡើង​ដោយ​សមាគម​សហគ្រិន​ស្ត្រី​កម្ពុជា បាន​ចេញផ្សាយ​ជា​ផ្លូវការ​ហើយកាលពី​ប៉ុន្មាន​ថ្ងៃមុន​នេះ ​។ តាម​រយៈ​ការ​ចងក្រង​នូវ​សៀវភៅ​ ស ទាំង​ពីរ​ក្បាល​នេះ គេ​បាន​កំណត់​បញ្ហា​ប្រឈម​ជា​អាទិភាព​មួយ​ចំនួន​ដែល​ជា​ឱកាស​ និង​ការ​ប្រឈម​នៅ​ក្នុង​ការ​រកស៊ី​របស់​សហគ្រិន​ស្ត្រី​ ។

សៀវភៅ​ ស​ ក្បាល​ទី​ ២ ដែល​មាន​ចំណងជើង​ថា ការ​លើកកម្ពស់​ការ​ចូល​ទៅ​កាន់​ទីផ្សារ ការ​អភិវឌ្ឍ​ន៍ផលិតផល​ និង​សេវាកម្ម​ប្រកបដោយ​គុណភាព​សម្រាប់​សហគ្រិន​ស្ត្រី​ក្នុង​ប្រទេស​កម្ពុជា ​ត្រូវ​បាន​បញ្ចូល​បញ្ហា​ដូច​ជា លទ្ធភាព​ទទួល​បាន​ទីផ្សារ និង​ការ​ផ្សព្វផ្សាយ​ផលិតផល​ក្នុងស្រុក​នៅ​មាន​កម្រិត កង្វះ​ទុន​ក្នុង​ការ​ពង្រីក និង​បង្កើត​អាជីវកម្ម និង​ខ្វះ​ជំនាញ​ឌី​ជី​ថ​ល ​និង​ចំណេះដឹង​ព័ត៌មានវិទ្យា ។

ចំណែក​សៀវភៅ​ ស ​ក្បាល​ទី ​៣ ដែល​មាន​ចំណងជើង​ថា ការ​ពង្រឹង​ភាព​ធន់​នៃ​ធុរកិច្ច​សហគ្រាស​ធុន​តូច​បំផុត តូច និង​មធ្យម (MSMEs)​ សម្រាប់​សហគ្រិន​ស្ត្រី​នៅ​កម្ពុជា ​ការ​បង្កើត​បរិយាកាស​ធុរកិច្ច​អំណោយផល ការ​ជម្នះ និង​ការ​គ្រប់គ្រង​ហានិភ័យ ​បាន​កំណត់​បញ្ហា​ប្រឈម​អាទិភាព​ចំនួន​ ៣ ផង​ដែរ​មាន​បុគ្គលិក​ខ្វះ​ជំនាញ និង​ប្រាក់​ឈ្នួល​ខ្ពស់ ការ​លំបាក​ទទួល​បាន​ប្រាក់​កម្ចី​ពី​ធនាគារ​សម្រាប់​អាជីវកម្ម​ខ្នាត​មីក្រូ និង​ផល​ប៉ះពាល់​នៃ​មេរោគ​ឆ្លង​កូ​វី​ដ​-១៩ មក​លើ​អាជីវកម្ម ។

លោកស្រី កែវ មុំ ប្រធាន​សមាគម​ស្ត្រី​កម្ពុជា បាន​បញ្ជាក់​ថា​ ការ​កសាង «សៀវភៅ ស​» ទាំង​ ២​ នេះ គឺ​ពិតជា​មាស​សារៈសំខាន់​ខ្លាំង​ណាស់ ពីព្រោះ​វា​គឺជា​ឯកសារ​មួយ​ដ៏​សំខាន់​សម្រាប់​សមាគម​សហគ្រិន​ស្ត្រី​កម្ពុជា​, អង្គការ​, ស្ថាប័នរដ្ឋ និង​ឯកជន​, ដៃគូ​អភិវឌ្ឍន៍​, ស្ថាប័ន​ ឬ​អ្នក​ស្រាវជ្រាវ​ជាដើម ដើម្បី​ប្រើប្រាស់​ជា​ឯកសារ​ក្នុង​ការ​ធ្វើ​គោលនយោបាយ ឬ​ការ​កសាង​សមត្ថភាព ឬ​ស្វែងរក​ការ​គាំទ្រ​មតិ ក្នុង​ន័យ​ការពារ​ផលប្រយោជន៍​របស់​ស្ត្រី​និយាយ​ដោយឡែក និង​ដើម្បី​គាំទ្រ​ដល់​កំណើនសេដ្ឋកិច្ច ពង្រីក​អេកូ​សហគ្រិនភាព និង​ស្ថិរភាព​សង្គម ​។

អ្នក​ផលិត​សៀវភៅ​ ស បាន​បញ្ជាក់​ថា សៀវភៅ​ ស បាន​ចងក្រង​ឡើងដោយ​ឆ្លងកាត់​នូវ​ការ​សិក្សា​ស្រាវជ្រាវ ប្រមែប្រមូល និង​ចងក្រង​នូវ​រាល់​បញ្ហា​ប្រឈម និង​សំណើ​ដំណោះស្រាយ​នានា​របស់​សហគ្រិន​ស្ត្រី​នៅ​កម្ពុជា តាម​រយៈ​ការ​ធ្វើ​វេទិកាសាធារណៈ​នៅ​តាម​ខេត្ត​គោលដៅ​ប្រមាណ​ជា ​១១ ការ​ស្ទង់​មតិ​, ការ​ប្រជុំ​ក្រុម​គោលដៅ​, ការ​បោះ​ឆ្នោត​ជ្រើសរើស​បញ្ហា​អាទិភាព​, ការ​កសាង​សេចក្តី​ព្រាង​, ការ​សិក្សា និង​ប្រមូល​ព័ត៌មាន និង​ឆ្លងកាត់​សិក្ខាសាលា និង ការពិគ្រោះ​យល់ និង​ការ​ត្រួតពិនិត្យ ពី​អ្នកជំនាញ​ជាតិ និង​អន្តរជាតិ​នានា ​។

នៅ​ក្នុង​សៀវភៅ​នោះ​ក៍បាន​លើក​ឡើង​ពី​សំណើ​រ និង​អនុសាសន៍​គោលនយោបាយ​សម្រាប់​រដ្ឋាភិបាល ស្ថាប័នហិរញ្ញវត្ថុ​ និង​ដល់​ដៃគូ​អភិវឌ្ឍ​មាន​ដូច​ជា ការ​ស្នើ​សុំ​ឱ្យមាន​មជ្ឈមណ្ឌល​សេវាកម្ម​អាជីវកម្ម​ខ្នាត MSMEs ​បង្កើត​យុទ្ធនាការ​ផ្សព្វផ្សាយ​ផលិតផល​ក្នុងស្រុក​ បង្កើត​ច្បាប់ Franchise និង​ e-Franchise ដើម្បី​ផ្តល់​ឱកាស​ដល់​អាជីវកម្ម​ស្ត្រី​ ពង្រឹង​ភាព​ធន់​ខ្នាត ​MSMEs របស់​ស្ត្រី​ដើម្បី​រក្សា​ប្រតិបត្តិការ និង​ការងារ បង្កើន​ចំណេះដឹង​ផ្នែក​ហិរញ្ញវត្ថុ​ទូទៅ​របស់​សហគ្រិន​ស្ត្រី និង​ពិនិត្យ​ និង​គាំទ្រ​គម្រោងការ​សន្សំ​សហករណ៍ ដែល​អាច​ផ្តល់​ប្រាក់​កម្ចី​មិន​មានទ្រព្យ​បញ្ចាំ​ជាដើម ។

ឯកឧត្តមទេស​រដ្ឋមន្ត្រី ចម ប្រសិទ្ធ រដ្ឋមន្ត្រីក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ ដែល​បាន​ចូលរួម​កម្មវិធី​សម្ពោធ​សៀវភៅ​ស​នេះ​បាន​លើក​ឡើង​ថា សៀវភៅ ​ស​ នេះ មាន​សារៈសំខាន់ ពីព្រោះបាន​សិក្សា​ស្រាវជ្រាវ​តាម​បែប​វិទ្យាសាស្ត្រ ហើយ​កំណត់​បាន​នូវ​បញ្ហា​ជា​អាទិភាព និង​ដាក់​ចេញ​សំណើ​ជា​គោលនយោបាយ​សម្រាប់​ពិចារណា ។

សៀវភៅ​ ស ក្បាល​ទី​ ១ ដែល​មាន​ចំណងជើង​ថា​ «កា​រលើក​កម្ពស់​ការ​ទទួល​បានការ​អប់រំ និង​ព័ត៌មាន​សម្រាប់​សហគ្រិន​ស្ត្រី​នៅ​កម្ពុជា​» ​ត្រូវ​បាន​សម្ពោធ​ដាក់ឱ្យ​ប្រើប្រាស់​កាលពី​ខែកញ្ញា​ ឆ្នាំ ​២០២០ កន្លង​ទៅ ​៕

អត្ថបទសរសេរ ដោយ

កែសម្រួលដោយ