ប្រយ័ត្ន ! ស្តាយថ្មី យក MSX ទៅបាត់
រាជធានីភ្នំពេញ ៖ បុរស២នាក់ ខណៈម៉ូតូរបស់ខ្លួនបញ្ឆេះមិនឆេះក៏មានមនុស្ស១ក្រុមបានមកជួយជួសជុល និងបញ្ឆេះម៉ូតូ ស្រាប់តែពេលបញ្ឆេះឆេះក៏ …
រាជធានីភ្នំពេញ ៖ បុរស២នាក់ ខណៈម៉ូតូរបស់ខ្លួនបញ្ឆេះមិនឆេះក៏មានមនុស្ស១ក្រុមបានមកជួយជួសជុល និងបញ្ឆេះម៉ូតូ ស្រាប់តែពេលបញ្ឆេះឆេះក៏ជិះទៅបាត់កាលពីវេលាម៉ោង១ និង១០នាទីរំលងអធ្រាត្រឈានចូលថ្ងៃទី២១ ខែតុលា ឆ្នាំ២០១៦ នៅចំណុចមុខស្ថានីយប្រេងឥន្ធនៈសូគីម៉ិច ស្ថិតតាមបណ្ដោយផ្លូវលេខ៥៩៨ សង្កាត់ទួលសង្កែ ខណ្ឌឫស្សីកែវ ។
ជនរងគ្រោះជាម្ចាស់ម៉ូតូមានឈ្មោះ ប៊ុន ឡាក់ ភេទប្រុស អាយុ២៨ឆ្នាំ ជាកម្មកររោងចក្រ ស្នាក់នៅភូមិអន្លង់ក្ងាន សង្កាត់ឃ្មួញ ខណ្ឌសែនសុខ និងមិត្តភក្កិម្នាក់ឈ្មោះ បាំង យូហាន ភេទប្រុស អាយុ១៦ឆ្នាំ មុខរបរនៅផ្ទះ ស្នាកនៅជាមួយពូនៅភូមិព្រែកព្នៅ សង្កាត់ព្រែកព្នៅ ខណ្ឌព្រែកព្នៅ មានស្រុកកំណើតភូមិបឹង ឃុំបឹង ស្រុកបារាយណ៍ ខេត្តកំពង់ធំ ។
ប្រភពព័ត៌មានពីជនរងគ្រោះបានឲ្យដឹងថា មុនពេលកើតហេតុរូបគេទាំង២នាក់ទើបតែចេញមកពីផឹកស៊ីច្រៀងខារ៉ាអូខេនៅម្ដុំផ្សារទួលសង្កែ ហើយជិះម៉ូតូម៉ាក MSX ពណ៌ខ្មៅ មិនចាំស្លាកលេខ បំណងត្រឡប់ទៅផ្ទះវិញ លុះមកដល់ចំណុចកើតហេតុស្រាប់តែរថយន្តកាមរីឆ្លាម១គ្រឿងបានវ៉ាម៉ូតូរបស់ខ្លួនហើយបត់ស្ដាំចូលផ្លូវលំ ធ្វើឲ្យចាប់ហ្វ្រាំងអកហ្សឺបណ្តាលដួលម៉ូតូ ហើយបញ្ឆេះវិញមិនឆេះសោះ ភ្លាមៗនោះមានម៉ូតូ២គ្រឿងម៉ាកហុងដា ឌ្រីម ពណ៌ខ្មៅ មិនចាំស្លាកលេខជិះគ្នា៥នាក់មកដល់ ឃើញជនរងគ្រោះកំពុងតែបញ្ឆេះម៉ូតូក៏ឆ្លៀតឱកាសធ្វើជាជិះមកជួយបញ្ឆេះម៉ូតូឲ្យ ខណៈពេលជួយបញ្ឆេះម៉ូតូឆេះហើយជនរងគ្រោះខំតែអរ និងបាននិយាយអរគុណទៅខាងជនសង្ស័យថែមទៀតផង តែបែរជាជនសង្ស័យនោះបានជិះម៉ូតូចេញទៅបាត់ ចំណែកជនរងគ្រោះបានត្រឹមខំប្រឹងស្រែកហៅគេឯងឲ្យជួយ តែគ្មានអ្នកណាម្នាក់ជួយជិះម៉ូតូដេញជនសង្ស័យខាងលើនោះឡើយ ។
ក្រោយពេលកើតហេតុ ជនរងគ្រោះទាំង២នាក់បានទាក់ទងទៅខាងសមត្ថកិច្ចមូលដ្ឋានឲ្យចុះមកកន្លែងកើតហេតុ ហើយនាំជនរងគ្រោះទៅដាក់ពាក្យបណ្ដឹងនៅប៉ុស្ដិ៍នគរបាលរដ្ឋបាលទួលសង្កែ ដើម្បីកំណត់មុខសញ្ញាជនសង្ស័យ ៕
ចែករំលែកព័តមាននេះ