ខេត្តព្រះសីហនុ៖ កំណាត់ផ្លូវជាតិលេខ៣ ពីវាលរេញ ទៅត្រពាំងរពៅ ក្នុងខេត្តព្រះសីហនុ ដែលរងការខូចខាត ពេលនេះ ក្រសួងសាធារណការ និងដឹកជញ្ជូន កំពុងជួសជុល ដើម្បីប្រើប្រាស់ជាបណ្តោះអាសន្នសិន មុនពេលជួសជុលឡើងវិញ ផ្លូវការតាមគម្រោង ដែលបានគ្រោងទុក។
ការជួសជុលជាបណ្តោះអាសន្ននេះ ធ្វើឡើងចាប់ពីស្ពានត្រពាំងរពៅ ឆ្ពោះមកប្រជុំជនផ្សារវាលរេញ ក្នុងស្រុកព្រៃនប់ ខេត្តព្រះសីហនុ ដោយចាក់គ្រឹះថ្ម និងមានចាក់ក្រាលកៅស៊ូ សម្រួលឲ្យយានយន្តធ្វើចរាចរណ៍ងាយស្រួលជាបណ្តោះអាសន្នសិន។
សូមបញ្ជាក់ថា ក្រោយពីជួសជុលឲ្យប្រើប្រាស់បណ្តោះអាសន្ន គម្រោងជួសជុលកំណាត់ផ្លូវជាតិលេខ៣ ពីវាលរេញ ទៅត្រពាំងរពៅ ក្នុងខេត្តព្រះសីហនុ លើកក្រោយ។
មន្ត្រីជំនាញក្រសួងសាធារណៈការ និងដឹកជញ្ជូន អះអាងថា កំណាត់ផ្លូវនេះ នឹងស្ថាបនាដោយប្រើបច្ចេកទេសបុកគ្រឹះជម្រៅ ជ្រៅដូចជាគ្រឹះស្ពាន តាមស្ថានភាពដីផ្នែកខាងក្រោម ក្រោយសិក្សាឃើញថា ស្រទាប់ដីផ្នែកខាងក្រោម នៅកំណាត់ផ្លូវនោះ ពិសេសចន្លោះពីវាលរេញ ទៅស្ពានកំពង់ស្មាច់ ជាប្រភេទដី ភក់ មមោកសមុទ្រ(ទន់ជ្រាយ) បើមិនធ្វើគ្រឹះខាងក្រោមឲ្យជ្រៅទេ ការស្ថាបនាផ្លូវនេះ មិនជាប់ឡើយ។
ក្រៅពីចំណុចនេះ នៅតាមគន្លងផ្លូវ ពីស្ពានកំពង់ស្មាច់ ក្នុងឃុំសាមគ្គី ទៅដល់ស្ពានត្រពាំងរពៅ ក្នុងឃុំទឹកថ្លា ស្រុកព្រៃនប់ ក៏នឹងមានរៀបចំគ្រឹះពីក្រោម ទៅតាមស្ថានភាពដី ដើម្បីធានាថា ការស្ថាបនាផ្លូវថ្មីនេះ នឹងមិនងាយរងការខូចខាតទៀតឡើយ។
មន្ត្រីជំនាញដដែលថ្លែងថា ការធ្វើផ្លូវត្រង់ចំណុចនេះ នឹងចំណាយថវិកាច្រើន ដោយសារតែចាំបាច់ ត្រូវបុកគ្រឹះ ដែលតាមការសិក្សារបស់ក្រុមហ៊ុនជំនាញផ្លូវថ្នល់ពីប្រទេសចិន ឲ្យដឹងថា លើកំណាត់ផ្លូវពីវាលរេញ ទៅត្រពាំងរពៅ ប្រវែងប្រហែល ២០គីឡូម៉ែត្រនេះ គេរកឃើញថា មានស្រទាប់ដីខាងក្រោមទន់ជ្រាយ ប្រភេទដីភក់ មមោកសមុទ្រ មានចម្ងាយប្រវែងយ៉ាងតិច ៥គីឡូម៉ែត្រ។
សូមរម្លឹកថា នៅពេលនេះ តាមផ្លូវជាតិលេខ៤ ភ្នំពេញ-ព្រះសីហនុ ក៏ត្រូវបានមន្ត្រីជំនាញ កំពុងពង្រីកផ្លូវទាំងសង្ខាង ដោយកន្លែងផងដែរ៕
ចែករំលែកព័តមាននេះ