ខេត្តប៉ៃលិន៖ ​កសិករ ធ្វើស្រែ ចម្ការ គ្មានអ្វីសប្បាយចិត្តជាងឃើញតម្លៃទីផ្សារកសិផល ដំណាំដាំដុះរបស់ខ្លួន ឡើងថ្លៃនោះទេ ព្រោះពួកគាត់ ពឹងផ្អែកទាំងស្រុង ទៅលើកសិផលទាំងនោះ។  ក្រោយប្រមូលផលរួច កសិករសង្ឃឹមថា នឹងបានថវិកា សម្រាប់សងជំពាក់គេ និងផ្គត់ផ្គង់ជីវភាពប្រចាំថ្ងៃ។

តែបើក្រឡេកមើលទៅតម្លៃទីផ្សារសណ្តែកកួរ​ សព្វថ្ងៃ ធ្លាក់ចុះគួរឱ្យកត់សម្គាល់ ពិតជាធ្វើឱ្យពួកគាត់ មានការស្តាយនូវកម្លាំងកាយ និងខកចិត្តស្ទើរតែបោះបង់មុខរបរនេះចោលថែមទៀត​។

កាលពីថ្ងៃទី០៤ ខែឧសភា ឆ្នាំ២០២២នេះ ​កសិករម្នាក់ ឈ្មោះ ខុន ចា ភេទប្រុស រស់នៅក្នុងភូមិបាយសី ឃុំស្ទឹងត្រង់ ស្រុកសាលាក្រៅ ខេត្តប៉ៃលិន បានដាំបន្លែសណ្តែកកួរ ចំនួន ១៧រង(ទ្រើង) កំពុងប្រមូលផល ១ថ្ងៃ បានចំនួន ២០ ទៅ ៣០គីឡូក្រាម តែតម្លៃទីផ្សារ ធ្លាក់ចុះ រហូតដល់​ពាក់កណ្តាល បើធៀបនឹងឆ្នាំមុន។

កសិករ ខុន ចា បានរៀបរាប់ទាំងសភាពខ្សោ​យកម្លាំង ខណ:សង្កេតឃើញតម្លៃទីផ្សារសណ្តែកកួររបស់គាត់ ធ្លាក់ចុះ​ខ្លាំងថា ការដាំបន្លែសណ្តែកកួរនេះ មានរយ:ពេលត្រឹមតែជាង ១ខែ គឺអាចនឹងប្រមូលផល បេះលក់ឱ្យឈ្មួញ ដែលចូលទៅទិញដល់ចម្ការរបស់ខ្លួន។ តែការលក់ដូរកសិផលបន្លែសណ្តែកកួរនេះ ​ធ្លាក់ចុះថ្លៃខ្លាំង មិនអាចទទួលយកបាននោះទេ ដោយឈ្មួញទិញត្រឹមតែ ១គីឡូក្រាម តម្លៃ ១៥០០រៀលប៉ុណ្ណោះ ខុសពីឆ្នាំមុន ឈ្មួញហ៊ានទិញ រហូតដល់  ១គីឡូក្រាម តម្លៃ ៣៥០០ ទៅ ៤០០០រៀលឯណោះ។

លោកបន្តទៀតថា ការដាំសណ្តែកកួរនេះ ក៏ត្រូវចំណាយដើមទុនអស់ច្រើន ដោយទិញថ្នាំកំចាត់សត្វល្អិត ថ្នាំការពារសត្វដង្កូវ និងសត្វចៃ ជាដើម ត្រូវចំ​ណាយទិញគ្រាប់ពូជ និងទិញជីសម្រាប់បំប៉ន​ឱ្យដើមធំលឿន​ចេញផ្លែល្អ។ ដូច្នេះ បើកាច់កិនទៅលក់បានតម្លៃទាបពេកបែបនេះ មិនអាចចំណេញនោះឡើយ។

លោក​បញ្ជាក់ទៀតថា ប្រេងសាំង ម៉ាស៊ូត និងទំនិញ ដែលឈ្មួញនាំចូលមកលក់ដូរនៅទីផ្សារ ឡើងថ្លៃកប់ពពក រីឯកសិផលរបស់ខ្លួនធ្លាក់ចុះដល់បាត់ដាល ជាហេតុធ្វើឱ្យម្នាក់ៗ យំលែងចេញទឹកភ្នែកតែម្តង។

លោកក៏សំណូមពរឱ្យខាងមន្ទីរពាក់ព័ន្ធ ក៏ដូចជា ខាងមន្ទីរកសិកម្ម រុក្ខាប្រម៉ាញ់ និងនេសាទខេត្តប៉ៃលិន មន្ទីរពាណិជ្ជកម្ម​ខេត្ត ជួយសម្របសម្រួល រកទីផ្សារ​ជូន​ប្រជា​ពលរដ្ឋ ដែលផលិតកសិផល​បាន ហើយឱ្យមានទីផ្សារ ក្នុងស្រុក សម្រាប់លក់ផ្គត់ផ្គង់​ជីវភាព​ប្រចាំថ្ងៃ ខណ:បច្ចុប្បន្ន ពួកគាត់​មិនអាច​ចំណាកស្រុក ទៅធ្វើការងារ នៅប្រទេសក្រៅ​បាន​ទេ ព្រោះឆ្ងាយពីផ្ទះសម្បែង និងប្រពន្ធកូនផងដែរ៕ នីយ៉ា