ADផ្ទាំងផ្សព្វផ្សាយពាណិជ្ជកម្ម

Picture

ក្រុម​ហ៊ុន​កូរ៉េ​មួយ​នឹង​នាំ​ស្វាយ​ស្រស់​ពី​កម្ពុជាឱ្យ​បាន​យ៉ាង​ហោច ​១ ​ម៉ឺន​តោន​ក្នុងមួយ​ឆ្នាំ

6 ខែ មុន
  • ភ្នំពេញ

រាជធានីភ្នំពេញ ៖ នៅ​ពេល​ដែល​ទីផ្សារ​ស្វាយ​របស់​កសិករ​នៅ​តែ​ជួប​បញ្ហា​ទីផ្សារ ដែល​ធ្វើ​ឱ្យកសិផល​គរ តម្លៃ​ថោក​រហូត​ដល់​គ្មាន​អ្នកទិញ ឬ​គេ​ទិញ​ក្នុង​តម្លៃ​ថោក ៣០០ ​រៀល​ក្នុង​មួយ​គីឡូក្រាម​ជាដើម​នោះ មាន​ក្រុមហ៊ុន​មក​ពី​សាធារណរដ្ឋ​កូរ៉េ បាន​កំពុង​ស្វែងរក​ឱកាស​នាំ​ចូល​ស្វាយ​ពី​ប្រទេស​កម្ពុជា…

រាជធានីភ្នំពេញ ៖ នៅ​ពេល​ដែល​ទីផ្សារ​ស្វាយ​របស់​កសិករ​នៅ​តែ​ជួប​បញ្ហា​ទីផ្សារ ដែល​ធ្វើ​ឱ្យកសិផល​គរ តម្លៃ​ថោក​រហូត​ដល់​គ្មាន​អ្នកទិញ ឬ​គេ​ទិញ​ក្នុង​តម្លៃ​ថោក ៣០០ ​រៀល​ក្នុង​មួយ​គីឡូក្រាម​ជាដើម​នោះ មាន​ក្រុមហ៊ុន​មក​ពី​សាធារណរដ្ឋ​កូរ៉េ បាន​កំពុង​ស្វែងរក​ឱកាស​នាំ​ចូល​ស្វាយ​ពី​ប្រទេស​កម្ពុជា ទៅ​ប្រទេស​ខ្លួន​ក្នុង​មួយ​ឆ្នាំ ​១​ ម៉ឺន​តោ​ន ​។

Picture

លោក Gyuhwa JANG អនុប្រធាន​សមាគម​អ្នក​នាំ​ចូល​កូរ៉េ និងប្រធាន​ក្រុមហ៊ុន GADOSH បាន​ជួប​ជាមួយ​រដ្ឋមន្ត្រីក្រសួង​ពាណិជ្ជកម្ម​កម្ពុជា នៅ​ថ្ងៃ​ទី ​៣ ខែ​ឧសភា ដើម្បី​ជជែក​ពី​លទ្ធភាព​នាំ​ស្វាយ​កម្ពុជា​ទៅ​ប្រទេស​កូរ៉េ​នេះ​ ។ ប្រធាន​ក្រុមហ៊ុន GADOSH បាន​ជម្រាបឯកឧត្តមរដ្ឋមន្ត្រី ពី​គោលបំណង​ក្នុង​ការ​នាំ​ចូល​ស្វាយ​ពី​កម្ពុជា​យ៉ាង​ហោច​ណាស់ ១ ​ម៉ឺន​តោន ក្នុង​មួយ​ឆ្នាំ​ ដើម្បី​បំពេញតម្រូវការ​ទីផ្សារ​កូរ៉េ ​។ ​សមាគម​អ្នក​នាំ​ចូល​កូរ៉េ​មាន​សមាជិក​ប្រមាណ ១៥,០០០ ក្រុមហ៊ុន ​។

Picture

ឯកឧត្តម ប៉ាន សូរ​ស័ក្តិ រដ្ឋមន្ត្រីក្រសួង​ពាណិជ្ជកម្ម បាន​បញ្ជាក់​ថា ​ក្រសួង​បាន​ត្រៀមខ្លួន​ជា​ស្រេច​ក្នុង​ការ​គាំទ្រ និង​សម្របសម្រួល​ដល់​ធុរជន​ដែល​មក​វិនិយោគ​នៅ​កម្ពុជា ជា​ពិសេស ក្រសួង​នឹង​ផ្តល់​អនុសាសន៍​ណែនាំ​ឱ្យ​ក្រុមហ៊ុន​សហការ​ជាមួយ​ក្រសួង​-​ស្ថាប័ន​ពាក់ព័ន្ធ ដើម្បី​បំពេញបែបបទ​តាម​នីតិវិធី​ ។ ឯកឧត្តម​បាន​ជំរុញ​ឱ្យ​ក្រុមហ៊ុន​ពិនិត្យ​លទ្ធភាព​នាំ​ចូល​ផលិតផល​កសិកម្ម​សក្តានុពល​ផ្សេង​ៗ​ទៀត​ពី​កម្ពុជា ដូច​ជា ៖ ​មៀន និង​ចេក ជាដើម បន្ថែម​ពីលើ​ស្វាយ ព្រមទាំង​លើកទឹកចិត្ត​ឱ្យ​វិនិយោគិន​កូរ៉េ​មក​បង្កើត​រោងចក្រ​កែ​ឆ្នៃ​កសិផល ដើម្បី​នាំ​ចេញ​ទៅ​ទីផ្សារ​អន្តរជាតិ​នានា​ផង​ដែរ ​។

បំណង​នាំ​ស្វាយ​ទៅ​ប្រទេស​កូរ៉េ​នេះ​ស្រប​ពេល​ដែល​កិច្ចព្រមព្រៀង​ពាណិជ្ជកម្ម​សេរី​កម្ពុជា-កូរ៉េ​ នឹង​ចូល​ជា​ធរមាន​ក្នុង​ពេល​ឆាប់​ៗ​នេះ ដែល​កិច្ចព្រមព្រៀង​នេះ​នឹង​ជំរុញ​ឱ្យការ​ធ្វើ​ពាណិជ្ជកម្ម​ប្រទេស​ទាំង​ពីរ​កាន់តែ​ងាយស្រួល​ និង​មាន​សក្តានុពល ​។

Picture

គួរ​ជម្រាប​ថា ​នៅ​ក្នុង​រយៈពេល​បី​ខែ​ដើមឆ្នាំ​ ២០២២​ នេះ ផ្លែស្វាយ​ស្រស់​របស់​កម្ពុជា​ចំនួន ៨១ ៤១៨,០៧​ តោន បាន​នាំ​ចេញ ដែល​បរិមាណ​នេះ​មានការ​ថយ​ចុះ​ជិត ២១% ​ធៀប​ឆ្នាំ ​២០២១ ​។ ស្វាយ​ស្រស់​កម្ពុជា​បាន​ចេញ​ទៅ​ប្រទេស វៀតណាម​ចំនួន ៤០ ៨៤៩,៧២​ តោន ប្រទេស​ចិន​ចំនួន ២២ ២៤៤,៦៨ ​តោន ប្រទេស​ថៃ​ចំនួន ១៨ ១៨១,១២ ​តោន និង​ប្រទេស​កូរ៉េ​ចំនួន ១៤២,៥៥​ តោន ​។

ក្រៅពី​ស្វាយ​ស្រស់​កម្ពុជា​បាន​នាំ​ចេញ​ដំណាប់​ស្វាយ និង​ទឹក​ស៊ី​រ៉ូ​ស្វាយ​ផង​ដែរ​ ។ ដំណាប់​ស្វាយ​នាំ​ចេញ​បី​ខែ​ឆ្នាំ​ ២០២២​នេះ មាន​ចំនួន ៥ ១៣៦,២៧​ តោន ថយ​ចុះ​ជាង -១៣% ក្នុង​នោះ​នាំ​ចេញ​ទៅ​ប្រទេស​ចិន​ចំនួន ៤ ៤១៤,១១ ​តោន ប្រទេស​ថៃ​ចំនួន ២៨៨,៤៤ ​តោន ប្រទេស​វៀតណាម​ចំនួន ២០០ ​តោន ប្រទេស​ហ្វី​លី​ពី​ន​ចំនួន ១៩២,៥៥ ​តោន ប្រទេស​ជប៉ុន​ចំនួន ២៥​ តោន ចក្រភព​អង់គ្លេស​ចំនួន ៩,៧៨​ តោន ប្រទេស​កូរ៉េ​ចំនួន ៣,៨៧​ តោន និង​ប្រទេស​អ៉ី​តា​លី​ចំនួន ២,៥២ ​តោន ​។​ ចំណែកទឹក​ស៊ី​រ៉ូ​ស្វាយ​បាន​នាំ​ចេញ​ចំនួន ៤០៣,៤២​ តោន ថយ​ចុះ​ចំនួនជាង ​៧៥% ក្នុង​នោះ​នាំ​ចេញ​ទៅ​ប្រទេស​ចិន​ចំនួន ២៤៦​ តោន និង​ប្រទេស​ហ្វី​លី​ពី​ន​ចំនួន ១៥៧,៤២​ តោន​ ៕