អាសូរណាស់ ! ប្តីរត់ចោល ឈឺពោះខ្លាំងសម្រាលកូនតាមផ្លូវ
រាជធានីភ្នំពេញ ៖ ស្ត្រីកំព្រាម្នាក់ត្រូវបានប្តីរត់ចោលតាំងពីមានផ្ទៃពោះ២ខែ ប៉ុន្តែរិតតែគួរឲ្យអាណិតទៀតនោះ គឺទើបតែដឹកបានពាក់កណ្ដាលផ្លូវក៏ឈឺពោះខ្លាំងសម្រាលកូន …
រាជធានីភ្នំពេញ ៖ ស្ត្រីកំព្រាគួរឲ្យអាណិតម្នាក់ត្រូវបានប្តីរត់ចោលតាំងពីមានផ្ទៃពោះ២ខែ ត្រូវបានប្តីប្រពន្ធអ្នករត់ម៉ូតូឌុបជួយយកអាសារឲ្យរស់នៅជាមួយរហូតគ្រប់ខែឆ្លងទន្លេក៏ដឹកតាមម៉ូតូទៅមណ្ឌលសុខភាព ប៉ុន្តែរិតតែគួរឲ្យអាណិតទៀតនោះ គឺទើបតែដឹកបានពាក់កណ្ដាលផ្លូវក៏ឈឺពោះខ្លាំងសម្រាលកូនតាមផ្លូវបង្កឲ្យមានការភ្ញាក់ផ្អើលកាលពីវេលាម៉ោង៤ និង៣០នាទីទៀបភ្លឺ ថ្ងៃទី១៧ ខែតុលា ឆ្នាំ២០១៦ ត្រង់ចំណុចមុខក្រសួងពាណិជ្ជកម្ម ស្ថិតតាមបណ្ដោយផ្លូវសហព័ន្ធរុស្សី ស្ថិតក្នុងសង្កាត់ទឹកថ្លា ខណ្ឌសែនសុខ ។
ស្ត្រីដែលសម្រាលកូនតាមផ្លូវមានឈ្មោះ សុខ ធា អាយុ២៩ឆ្នាំ មុខរបរនៅផ្ទះ ស្នាក់នៅផ្ទះជួលក្រោយស្ថានីយទូរទស្សន៍អាស៊ីអាគ្នេយ៍ ស្ថិតក្នុងសង្កាត់ទឹកថ្លា ខណ្ឌសែនសុខ មានស្រុកកំណើតនៅសង្កាត់ព្រែហូរ ក្រុងតាខ្មៅ ខេត្តកណ្តាល ។
តាមប្រភពព័ត៌មានពីអ៊ុំប្រុសម្នាក់ឈ្មោះ អ៊ុំ សេង យ៉ុង អាយុ៥៨ឆ្នាំ មុខរបររត់ម៉ូតូឌុប មានប្រពន្ធឈ្មោះ ពែក សុខ អាយុ៥៤ឆ្នាំ ដែលនាំស្ដ្រីខាងលើបំណងទៅកាន់មណ្ឌលសុខភាពដើម្បីសម្រាលកូនបានឲ្យដឹងថា កាលដើមឡើយស្ដ្រីខាងលើជាស្ដ្រីមេម៉ាយដែលត្រូវបានប្ដីចុះចោលតាំងតែពីកូននៅក្នុងពោះ២ខែម្ល៉េះ ហើយដោយសារតែមើលទៅគួរឲ្យអាណិតទើបគ្រួសាររបស់គាត់ឲ្យស្ដ្រីនេះមករស់នៅជាមួយ នឹងថែរក្សាដូចជាកូនចៅ ទោះបីជាគ្រួសាររបស់គាត់មានជីវភាពខ្វះខាតក៏ដោយក៏គាត់មិនបានឱបដៃឈរមើលស្ដ្រីមេម៉ាយម្នាក់នោះត្រូវរស់នៅយ៉ាងវេទនាជាមួយនិងទារិកានៅក្នុងពោះនោះទេ ។
ប្រភពដដែលបន្តទៀតថា លុះមកដល់ថ្ងៃកើតហេតុ ស្ដ្រីមេម៉ាយខាងលើបានឈឺពោះតាំងតែពីម៉ោង៤ទៀបភ្លឺហេតុដូចនេះទើបរូបគាត់ទាំង២នាក់ប្ដីប្រពន្ធប្រញាប់ញាល់ដឹកតាមម៉ូតូយកទៅមណ្ឌលសុខភាពដែលជិតបំផុត ប៉ុន្តែដោយសារតែស្ដ្រីរងគ្រោះឈឺពោះខ្លាំងពេកក៏សម្រាលកូនតាមដងផ្លូវនៅមុខក្រសួងពាណិជ្ជកម្មតែម្តង ។
ប្រភពបន្តទៀតថា ឃើញសភាពបែបនេះវាពិតជាគួរឲ្យអាណិតអាសូរជាខ្លាំងណាស់ មិនគួររឿងរ៉ាវដ៏កំសត់មួយនេះធ្លាក់លើស្ដ្រីកំព្រាដ៏គួរឲ្យអាណិតម្នាក់នេះសោះ ហើយប្រជាពលរដ្ឋដែលធ្វើដំណើរតាមផ្លូវបានឈប់ជួយចាត់ចែងមួយដៃមួយជើង រហូតសម្រាលបានទារកម្នាក់តែមិនមានឧបករណ៍សម្រាក់កាត់ទងផ្ចិតក៏បានទាក់ទងទៅមណ្ឌលសុខភាពពោធិ៍ចិនតុងបញ្ជូនគ្រូពេទ្យមានជំនាញ២នាក់មកដល់កាត់ទងផ្ចិតរួចក៏បានបញ្ជូនទៅសម្រាកនៅមណ្ឌលសុខភាពពោធិ៍ចិនតុង ។
ក្រុមគ្រូពេទ្យបានបញ្ជាក់ថា ទារកដែលសម្រាលនោះមានទម្ងន់១,៩គីឡូក្រាម ហើយទាំងម្តាយ និងទារកដែលទើបនឹងសម្រាលមានសុខភាពធម្មតា ។
អុំប្រុសអុំស្រីដែលជាអ្នកជួយចិញ្ចឹមស្ត្រីខាងលើ សូមអំពាវនាវដល់សប្បុរសជនទាំងអស់ សូមមេត្តាជួយឧបត្ថម្ភដល់ស្ត្រីរូបនេះផង ដើម្បីបានថវិកាខ្លះសម្រាប់ជួយចិញ្ចឹមទារក ។ បើសិនជាសប្បុរសជនចង់ឧបត្ថម្ភដល់ស្ត្រីដែលសម្រាលកូនតាមផ្លូវសូមទាក់ទងតាមលេខ ទូរស័ព្ទ 071 69 21 320 ៕
ចែករំលែកព័តមាននេះ