រាជធានីភ្នំពេញ ៖ គួរឲ្យអាណិតខ្លាំងណាស់ ដែលនាងកម្មការិនីរោងចក្រកាត់ដេរ២នាក់ ស្រលាញ់ភេទដូចគ្នា ក្នុងនោះម្នាក់ដើរតួជាប្រុស និងម្នាក់ដើរតួជាស្រី ហើយបានយកគ្នាជាសង្សារ
រាជធានីភ្នំពេញ ៖ គួរឲ្យអាណិតខ្លាំងណាស់ ដែលនាងកម្មការិនីរោងចក្រកាត់ដេរ២នាក់ ស្រលាញ់ភេទដូចគ្នា ក្នុងនោះម្នាក់ដើរតួជាប្រុស និងម្នាក់ដើរតួជាស្រី ហើយបានយកគ្នាជាសង្សារ បានជួបគ្រោះថ្នាក់ចរាចរ បណ្ដាលឲ្យនាងតួស្រីស្លាប់ភ្លាមៗនៅនឹងកន្លែង ចំណែកនាងដែលដើរតួជាប្រុស បានរងរបួសធ្ងន់ធ្ងរ និងត្រូវបានគរបញ្ជូនទៅកាន់មន្ទីរពេទ្យដើម្បីសង្គ្រោះបន្ទាន់ភ្លាមៗក្នុងខណៈពេលដែលពួកនាងជិះម៉ូតូ១គ្រឿងឌុបគ្នា ធ្វើដំណើរចេញពីផ្ទះជួលមួយកន្លែងទៅលេងស្រុកកំណើតក្នុងថ្ងៃឈប់សម្រាក ហើយត្រូវបានរថយន្តដឹកទឹកកក១គ្រឿងបើកបុកពីក្រោយពេញទំហឹង។
ឧប្បត្តិហេតុគ្រោះថ្នាក់ចរាចរនោះបានកើតឡើង កាលពីវេលាម៉ោង៦និង១៥នាទីព្រឹក ថ្ងៃទី១៥ ខែតុលា ឆ្នាំ២០១៦ នៅលើកំណាត់ផ្លូវលេខ២១៧ ហៅផ្លូវចំការដូង ស្ថិតក្នុងសង្កាត់ដង្កោ ខណ្ឌដង្កោ រាជធានីភ្នំពេញ។ តាមប្រភពព័ត៌មានបានឲ្យដឹងថា នារីដែលដើរតួជាស្រីដែលបានស្លាប់នោះឈ្មោះ ជៀង ស្រីល័ក្ខ អាយុ១៩ ឆ្នាំមុខរបរជាកម្មកររោងចក្រ មានស្រុកកំណើតនៅក្នុងភូមិទួលចារ ឃុំសំរោង ស្រុកសំរោង ខេត្តតាកែវ។ ចំណែកឯនាងដែលដើរតួជាប្រុសនោះឈ្មោះ រិចទិន ភេទស្រី អាយុ៣៤ឆ្នាំ មុខរបរកម្មការិនីរោងចក្រកាត់ដេរ ស្នាក់នៅភូមិលូ សង្កាត់ព្រែកព្នៅ ខណ្ឌសែនសុខ រាជធានីភ្នំពេញ កំពុងសម្រាកព្យាបាលនៅមន្ទីរពេទ្យរុស្សី។
ពួកនាងជិះម៉ូតូ១គ្រឿងម៉ាកហុងដាScoppy ពណ៌ស្វាយពាក់ស្លាកលេខភ្នំពេញ 1AU- 4365។ ដោយឡែករថយន្តដឹកទឹកកក ដែលបានបើកបុកជនរងគ្រោះពីក្រោយនោះម៉ាកKIA ពណ៌សពាក់ស្លាកលេខ ភ្នំពេញ 2M- 3892 បើកបរឈ្មោះ ភព ចំរើន ភេទប្រុស អាយុ២២ឆ្នាំ ស្នាក់នៅក្នុងភូមិត្រាំងត្រក ឃុំរវាង ស្រុករវាង ខេត្តព្រះវិហារ។ អមដំណើរដោយព្រូរថយន្ដម្នាក់ ឈ្មោះ ប៊ុន ម៉េងលី ភេទប្រុស អាយុ២២ឆ្នាំ ស្នាក់នៅក្នុងភូមិស្ពឺ ឃុំស្ពឺ ស្រុកចម្ការលើ ខេត្តកំពង់ចាម ពួកគេត្រូវបានកម្លាំងនគរបាល ខណ្ឌដង្កោ ឃាត់ខ្លួនបាន ហើយប្រគល់ឲ្យនគរបាលរិយាល័យចរាចរណ៍ផ្លូវគោក រាជធានីភ្នំពេញ ដើម្បីចាត់ការតាមច្បាប់។
ប្រភពដដែលបានបន្តថា នៅមុនពេលកើតហេតុ ជនរងគ្រោះទាំងពីរនាក់នោះបានជិះម៉ូតូម៉ាកស្កូបពី១គ្រឿងធ្វើដំណើរក្នុងទិសដៅពីជើងទៅត្បូង ក្នុងបំណងទៅលេងស្រុកកំណើត នាថ្ងៃឈប់សម្រាកពីការងារ លុះពេលទៅដល់ត្រង់ចំណុចកើតហេតុនោះ ស្រាប់តែត្រូវបានរថយន្តខាងលើ ដែលបើកបរធ្វើដំណើរស្របគ្នាក្នុងល្បឿនយ៉ាងលឿនទៅដល់បានបុកពីក្រោយយ៉ាងពេញទំហឹង បណ្ដាលឲ្យដួល។ ខណៈនោះរថយន្ត បានកិនទាំងម៉ូតូ និងមនុស្ស ស្រាប់តែនាងដែលជាតួឯកស្រី ចំណែកនាងដែលជាតួឯកប្រុស បានរងរបួសធ្ងន់ធ្ងរ និងត្រូវបានគេបញ្ជូនទៅសង្គ្រោះបន្ទាន់ភ្លាមៗ នៅមន្ទីរពេទ្យមិត្តភាព ខ្មែរ សូវៀត ហើយរថយន្ត និងអ្នកបើកបររួមទាំងព្រូ ត្រូវនគរបាលខណ្ឌដង្កោចាប់ខ្លួនបាន រួចប្រគល់ជូននគរបាលការិយាល័យចរាចរផ្លូវគោកនៃស្នងការដ្ឋាននគរបាល រាជធានីភ្នំពេញ ដើម្បីកសាងសំណុំរឿងចាត់ការតាមច្បាប់៕
ចែករំលែកព័តមាននេះ