រាជធានីភ្នំពេញ ៖ គួរឲ្យអាណិតខ្លាំងណាស់ ខណៈស្ត្រីម្នាក់ជិះម៉ូតូ១គ្រឿងសុខៗ ស្រាប់តែទាក់ដៃចង្កូត ជាមួយរថយន្តធន់ធំ ១គ្រឿង ដឹកបង្គោលភ្លើងច្រើនដើម ដែលកំពុងបើកបរក្នុងទិសដៅស្របគ្នា បណ្ដាលឲ្យដួលខ្ទាតគាត់ចូលក្រោមកង់រថយន្តខាងលើនោះ…
រាជធានីភ្នំពេញ ៖ គួរឲ្យអាណិតខ្លាំងណាស់ ខណៈស្ត្រីម្នាក់ជិះម៉ូតូ១គ្រឿងសុខៗ ស្រាប់តែទាក់ដៃចង្កូត ជាមួយរថយន្តធន់ធំ ១គ្រឿង ដឹកបង្គោលភ្លើងច្រើនដើម ដែលកំពុងបើកបរក្នុងទិសដៅស្របគ្នា បណ្ដាលឲ្យដួលខ្ទាតគាត់ចូលក្រោមកង់រថយន្តខាងលើនោះ កិនខ្ទេចជើងទាំង២យ៉ាងរន្ធត់បំផុត ដោយជើងឆ្វេងខ្ទេចត្រឹមត្រគាក រីឯជើងស្ដាំខ្ទេចត្រឹមជង្គង់ ហើយអ្នកបើកបររថយន្តបានចុះរត់គេចខ្លួនបាត់ស្រមោល ។
ឧប្បត្តិហេតុនោះបានកើតឡើងកាលពីវេលាម៉ោង៥និង៤៥នាទីល្ងាចថ្ងៃទី១២ ខែមករា ឆ្នាំ២០២៥ នៅតាមផ្លូវបេតុងបឹងតាម៉ាត ស្ថិតនៅក្នុងភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ ។
សាក្សីនៅកន្លែងកើតហេតុនិយាយថា ស្ត្រីរងគ្រោះរូបនោះមិនទាន់ត្រូវបានស្គាល់អត្តសញ្ញាណនៅឡើយទេ ហើយនៅមុនពេលកើតហេតុគាត់ជិះម៉ូតូ១គ្រឿងម៉ាកហុងដាឌ្រីមសេ១២៥ ស៊េរីឆ្នាំ២០១៥ ពណ៍ខ្មៅ ពាក់ស្លាកលេខភ្នំពេញ1DD-1317 ធ្វើដំណើរក្នុងទិសដៅពីត្បូងទៅជើង ។ លុះពេលទៅដល់ត្រង់ចំណុចកើតហេតុពុំដឹងថា គាត់មានឧបសគ្គអ្វីនោះទេ ស្រាបតែទាក់ដៃចង្កូតជាមួយរថយន្ត១គ្រឿងម៉ាក ហ៊ីយ៉ាន់ដាយ ពណ៍លឿងពាក់ស្លាកលេខភ្នំពេញ 3D-6550 ដឹកបង្គោលភ្លើងច្រើនដើម បណ្ដាលឲ្យដួលខ្ទាតគាត់ចេញពីម៉ូតូចូលក្រោមកង់រថយន្តនោះកិនខ្ទេចជើងទាំង២តែម្ដង ។
ប្រភពដដែលប្រាប់បន្ថែមថា ចំណែកម៉ូតូគាត់រងការខូចខាតបន្តិចបន្តួចប៉ុណ្ណោះ បន្ទាប់មករថយន្តខាងលើបានបើកហួសទៅមុខបន្តិចទើបឈប់ ហើយអ្នកបើកបរបានចុះរត់គេចខ្លួនចោលរថយន្តបាត់ស្រមោល ។
ក្រោយពេលកើតហេតុកម្លាំងនគរបាលចរាចរណ៍ នៃអធិការដ្ឋានខណ្ឌដង្កោ ចុះទៅសម្រួលចរាចរណ៍មិនឲ្យកកស្ទះ និងធ្វើការវាស់វែងតាមជំនាញ ព្រមទាំងហៅរថយន្តមន្ទីរពេទ្យបង្អែកខណ្ឌដង្កោ ដឹកយកស្ត្រីរងគ្រោះទៅសង្គ្រោះបន្ទាន់ ហើយកោះសន្តិភាពក៏សូមបួងសួងដល់វត្ថុស័ក្ដិសិទ្ធិជួយឲ្យគាត់រួចផុតពីសេចក្ដីស្លាប់ផងចុះ ៕
ចែករំលែកព័តមាននេះ