សុំឪពុកទៅបង់សំណាញ់ ស្រាប់តែ…
ខេត្តកណ្ដាល ៖ បុរសម្នាក់បានសុំឪពុកថាទៅបង់សំណាញ់ ស្រាប់តែអ្នកភូមិប្រទះឃើញដួលផ្កាប់មុខក្នុងទឹកភក់ក៏ជួយលើក តែយឺតពេលទៅហើយដោយបុរសរូបនោះបាន …
ខេត្តកណ្ដាល ៖ បុរសម្នាក់បានសុំឪពុកថាទៅបង់សំណាញ់ ស្រាប់តែអ្នកភូមិប្រទះឃើញដួលផ្កាប់មុខក្នុងទឹកភក់ក៏ជួយលើក តែយឺតពេលទៅហើយដោយបុរសរូបនោះបានស្លាប់បាត់ទៅហើយ ។ ហេតុការណ៍នេះកើតឡើងកាលពីវេលាម៉ោង៥ និង៤០នាទីព្រឹក ថ្ងៃទី១៤ ខែតុលា ឆ្នាំ២០១៦ នៅចំណូចចិញ្ចើមផ្លូវក្នុងភូមិកោះរះលើ ឃុំកោះរះ ស្រុកល្វាឯម ។
ប្រភពពីសមត្ថកិច្ចស្រុកល្វាឯមបានឲ្យដឹងថា ជនរងគ្រោះឈ្មោះ អ៊ែល រតនៈ ភេទប្រុស អាយុ២២ឆ្នាំ មុខរបរកសិករ ជាមនុស្សមានជំងឺឆ្កួតជ្រូកប្រចាំកាយ រស់នៅភូមិកើតហេតុ ។
ប្រភពពីឪពុកជនរងគ្រោះបានឲ្យសមត្ថកិច្ចដឹងថា ជនរងគ្រោះជាកូនរបស់គាត់មានជំងឺឆ្កួតជ្រូក ហើយតែងតែប្រកាច់ជាញឹកញាប់ ។ នៅវេលាទៀបភ្លឺថ្ងៃកើតហេតុ ជនរងគ្រោះបានសុំគាត់ទៅបង់សំណាញ់នៅចំណុចស្ពានផ្លូវទៅភូមិព្រែកក្មេង ហើយក៏ជិះកង់ដោយមានសំណាញ់ដាក់ក្នុងធុងស្ពេត្រូចេញពីផ្ទះទៅ ។ លុះដល់វេលាកើតហេតុស្រាប់តែអ្នកភូមិឃើញជនរងគ្រោះដួលផ្កាប់មុខក្នុងទឹកភក់ក៏ជួយលើកចេញ តែជនរងគ្រោះបានស្លាប់បាត់ទៅហើយ ។
ក្រោយពីពិនិត្យនៅលើដងខ្លួនជនរងគ្រោះមិនមានស្លាកស្នាមអ្វីគួរឲ្យសង្ស័យ ហើយនៅក្នុងមាត់ ក្នុងច្រមុះមានសុទ្ធតែដី សមត្ថកិច្ច អាជ្ញាធរភូមិ-ឃុំ និងគ្រូពេទ្យឃុំ បានសន្និដ្ឋានថា ជនរងគ្រោះបានប្រកាច់(ឆ្កួតជ្រូក)ដួលផ្កាប់មុខក្នុងទឹកភក់ថប់ដង្ហើមស្លាប់ ៕
ចែករំលែកព័តមាននេះ