ខេត្តពោធិ៍សាត់ ៖ លោក ខូយ រីដា អភិបាលខេត្តពោធិ៍សាត់ បានចុះសំណេះសំណាលជាមួយបងប្អូនអាជីវករ និងពិនិត្យស្ថានភាពជាក់ស្តែងនៅជុំវិញផ្សារថ្មីពោធិ៍សាត់ ។ ជាក់ស្តែងបើយោងតាមផេករដ្ឋបាលខេត្តពោធិ៍សាត់បានប្រកាស…
ខេត្តពោធិ៍សាត់ ៖ លោក ខូយ រីដា អភិបាលខេត្តពោធិ៍សាត់ បានចុះសំណេះសំណាលជាមួយបងប្អូនអាជីវករ និងពិនិត្យស្ថានភាពជាក់ស្តែងនៅជុំវិញផ្សារថ្មីពោធិ៍សាត់ ។
ជាក់ស្តែងបើយោងតាមផេករដ្ឋបាលខេត្តពោធិ៍សាត់បានប្រកាស នាថ្ងៃទី២៥ ខែមករានេះថា ៖ នៅថ្ងៃទី២៥ ខែមករា ឆ្នាំ២០២៦ លោក ខូយ រីដា អភិបាលនៃគណៈអភិបាលខេត្តពោធិ៍សាត់ រួមដំណើរដោយលោកអភិបាលរងខេត្ត នាយករងរដ្ឋបាលសាលាខេត្ត ថ្នាក់ដឹកនាំមន្ទីរពាក់ព័ន្ធ អាជ្ញាធរក្រុងពោធិ៍សាត់ គណៈកម្មការគ្រប់គ្រងផ្សារ និងអ្នកទទួលបន្ទុកភាស៊ីបានអញ្ជើញ ចុះជួបសំណេះសំណាលសួរសុខទុក្ខបងប្អូនអាជីវករលក់ដូរ ជុំវិញផ្សារថ្មីពោធិ៍សាត់ ដោយលោកអភិបាលខេត្ត បានណែនាំ និងជំរុញឲ្យអាជ្ញាធរក្រុង និងបងប្អូនអាជីវករលក់ត្រូវចូលរួមក្នុងការរៀបចំសណ្តាប់ធ្នាប់ បរិស្ថានអនាម័យជុំវិញផ្សារ បង្កភាពងាយស្រួលដល់ប្រជាពលរដ្ឋចូលទិញទំនិញផ្សេងៗ ។
លោក អភិបាលខេត្ត សូមឱ្យអាជ្ញាធរក្រុង និងអ្នកពាក់ព័ន្ធ ត្រូវរួមសហការរៀបចំទីតាំងលក់ដូរឱ្យមានរបៀបរាបរយ សណ្តាប់ធ្នាប់ល្អទៅតាមទីតាំងបានកំណត់ កុំបណ្តែតបណ្តោយឱ្យមានការដាក់លក់ទំនិញលើផ្លូវតាមបែបអណាធិបតេយ្យបង្កការប៉ះពាល់ដល់អ្នកធ្វើដំណើរ ជាពិសេសអ្នកចូលទិញទំនិញ ។ ចំពោះសមត្ថកិច្ចមូលដ្ឋាន គណៈកម្មការផ្សារ និងសន្តិសុខត្រូវទទួលខុសត្រូវខ្ពស់លើការងារសន្តិសុខសុវត្ថិភាព នៅក្នុងនិងជុំវិញផ្សារ ព្រមទាំងបង្កើនការយកចិត្តទុកដាក់ក្នុងការគ្រប់គ្រងរាល់សំរាម កាកសំណល់រឹង រាវ និងប្រព័ន្ធបង្ហូរទឹកជុំវិញផ្សារជាពិសេសបរិវេណមុខផ្សារឱ្យបានស្អាត់ល្អ និងមានសោភ័ណ្ឌភាព។
លោកក៏បានលើកឡើងផងដែរថា ផ្សារថ្មីពោធិ៍សាត់រហូតមកដល់ពេលនេះ ពិនិត្យឃើញថា មិនទាន់មានសណ្តាប់ធ្នាប់ល្អប្រសើរនៅឡើយទេ គឺអាជីវករមួយចំនួនបានសាងសង់សំយ៉ាបលក់ដូរ និងអ្នកយកភាស៊ីម៉ូតូរំលោភលើចំណីផ្លូវសាធារណ បង្កការកកស្ទះនៅតាមដងផ្លូវទាំងនេះ ទាមទាឱ្យមានការរៀបចំរបៀបរាបរយឡើងវិញសំដៅធ្វើយ៉ាងណាឱ្យផ្សារថ្មីពោធិ៍សាត់កាន់តែមានសោភណ្ឌភាពអនាម័យបរិស្ថាន ។
លោក ជំរុញឱ្យអាជ្ញាធរក្រុង ត្រូវបន្តពន្យល់ណែនាំបងប្អូនអាជីវករឱ្យពួកគាត់ចូលរួមសហការ ធ្វើយ៉ាងណាឱ្យ ផ្សារថ្មីពោធិ៍សាត់មួយនេះកាន់តែមានភាពទាក់ទាញពីគ្រប់មជ្ឈដ្ឋាន ។ តែទោះជាយ៉ាងនេះក៏ដោយសូមឱ្យអាជ្ញាធរក្រុង គណកម្មការផ្សារត្រូវពិនិត្យតាមដានជាប់ជាប្រចាំ ដើម្បីក្តាប់បាននូវរាល់បញ្ហាប្រឈម នានាដែលកើតមាន ជៀសវាងបង្កការថ្នាំងថ្នាក់ពីសំណាក់បងប្អូនអាជីវករក្នុងការប្រកបរបបចិញ្ចឹមជីវិត ៕
ចែករំលែកព័តមាននេះ