រាជធានីភ្នំពេញ ៖ មានកំហុសឆ្លងធំៗមួយចំនួន ដែលអ្នកជំនាញខាងការគ្រប់គ្រងហិរញ្ញវត្ថុ បានមើលឃើញថាច្រើនកើតមានលើពលរដ្ឋក្នុងពេលបច្ចុប្បន្ន ។ លោក ង៉ែត ជូ អ្នកជំនាញហិរញ្ញវត្ថុម្នាក់ និយាយថា ឆ្លងកាត់ការពិគ្រោះយោបល់អំពីការចាត់ចែងហិរញ្ញវត្ថុផ្ទាល់ខ្លួនរបស់មនុស្សជាច្រើន លោកបានសង្កេតឃើញថា មនុស្សភាគច្រើនមាន “កំហុសឆ្គងធំៗចំនួន ៤ យ៉ាង” ដែលធ្វើអោយការចាត់ចែងហិរញ្ញវត្ថុមិនបានល្អ ។
តាមលោក ង៉ែត ជូ កំហុសឆ្លងទាំងបួននោះមាន វិនិយោគលើអាជីវកម្មដែលខ្លួនមិនមានចំណេះដឹងច្បាស់លាស់។ លោកបន្តថា មានមនុស្សជាច្រើនបង្កើតអាជីវកម្មតាមអ្នកដទៃ ឬចេះតែជឿអ្នកដទៃដែលមិនមានចំណេះដឹង ជំនាញ និងបទពិសោធន៍ច្បាស់លាស់ ។ ធ្វើខ្វះគោលដៅ ខ្វះចក្ខុវិស័យជាក់លាក់ ជារួមគឺធ្វើសំដៅតែប្រាក់ចំណេញមួយមុខតែប៉ុណ្ណោះ ។ ការធ្វើបែបនេះ គឺងាយនឹងខាតបង់លុយកាក់ ងាយនឹងបោះបង់នៅពេលជួបបញ្ហា ។ល។
ចំហុសឆ្លងទី ២ គឺមិនស្គាល់ពីភាពចាំបាច់នៃការចំណាយ ។ លោក ង៉ែត ជូ ថាមនុស្សជាច្រើនមិនយល់ថា អ្វីជាភាពចំបាច់ (Needs) និងអ្វីគឺគ្រាន់តែជាការចង់បាន (Wants) នោះទេ ។ ជាពិសេសចំណាយព្រោះតែឃើញមិត្តភក្តិ និងអ្នកដទៃប្រើ ។ ឧទាហរណ៍ ការប្តូរទូរស័ព្ទថ្មីរៀងរាល់ពេលមានចេញស៊េរីថ្មី គឺរាល់ឆ្នាំដែលមិនមែនជាការចាំបាច់ទាល់តែសោះ ។ ជាងនេះទៅទៀតមនុស្សជាច្រើនសង្វាតចង់រស់នៅផ្ទះធំៗ និងប្រើរថយន្តល្អៗហួសពីសមត្ថភាព ។
តាមពិតទៅបើតម្លៃផ្ទះ តម្លៃរថយន្ត និងសម្ភារដែលមិនកើនតម្លៃដទៃទៀតមានត្រឹមតែ ៣០% ឬតិចជាង ៣០%នៃទ្រព្យសម្បត្តិសរុប នោះជាការប្រសើរបំផុត ព្រោះយ៉ាងហោចណាស់ ៧០% ទៀតគឺជាទ្រព្យដែលរីកចម្រើនពោល គឺអាចរកចំណូលបាន ឬមានការកើនតម្លៃជាប្រចាំ ។
មិនចេះប្រើបំណុលអោយមានប្រសិទ្ធិភាពជាកំហុសឆ្លងទី ៣ ។ តាមអ្នកជំណាញខាងលើ ការប្រើបំណុលមិនចំគោលដៅសំរាប់បង្កើតប្រាក់ចំណេញ ឬការប្រើបំណុលច្រើនប្រភពដែលបំណុលខ្លះមានការប្រាក់ខ្ពស់ហួសពីលទ្ធភាពនៃប្រាក់ចំណេញដែលអាចរកបាន ។ បំណុលប្រភេទនេះរួមមានដូចជាការចងការពីឈ្មួញឯកជន ការលេងតុងទីន ការទិញជំពាក់ដោយមានការប្រាក់ ឬតម្លៃខ្ពស់ ។ល។
ចំណែកកំហុសឆ្លងចុងក្រោយ គឺការចង់មានលឿនដោយមិនយល់ពីកិច្ចការវិនិយោគ ។ ត្រង់ចំណុចនេះ លោក ង៉ែត ជូ ពន្យល់ថា ចង់មានលឿនតាមការអូសទាញរបស់អ្នកដទៃដូចជាការវិនិយោគដោយសន្យាអោយប្រាក់ចំណេញខ្ពស់ជាដើម ។ ជាធម្មជាតិនៃការវិនិយោគមិនមានអ្នកណាអាចធានាថានឹងចំណេញក្នុង ១ ខែ ឬ ១ ឆ្នាំប៉ុន្មានភាគរយនោះទេ ។ ប៉ុន្តែបើគ្រាន់តែព្យាករណ៍ពីលទ្ធភាពនៃអត្រាចំណេញដោយផ្អែកលើបទពិសោធន៍ និងហេតុផលសមរម្យនោះ គឺអាចយកមកពិចារណាដើម្បីសម្រេចចិត្តបាន ។
ឧទាហរណ៍ គម្រោងវិនិយោគរបស់ EBC ដែលសន្យាអោយចំណេញ ១០% ក្នុង ១ ខែបានបោកប្រាស់ប្រាក់ពលរដ្ឋអស់រាប់លានដុល្លា ។ តាមពិតទៅតោងយល់ថា មិនមានអាជីវកម្មណាដែលមានចំណេញដែលមាននិរន្តរភាពរហូតដល់១២០% ក្នុង ១ ឆ្នាំនោះទេ ។ ជាទូទៅចំណេញ ៣០% ទៅ ៥០% ក្នុង ១ ឆ្នាំ គឺខ្ពស់ណាស់ទៅហើយ ហើយក៏មិនមានអ្នកណាហ៊ានធានាថា ដឹងតែចំណេញខ្ពស់បែបនេះនោះដែរ ។ បន្ថែមលើនេះគឺវិនិយោគដោយខ្វះការអត់ធ្មត់ វិនិយោគក្នុងរយៈពេលខ្លី វិនិយោគដោយមិនហ៊ានដាក់ទុនច្រើន ៕
ចែករំលែកព័តមាននេះ