រន្ធត់ ! កំពុងលូនចេញ ស្រាប់តែរថយន្តរេចង្កូតកិនចំក្បាលធ្លាយខួរ
ខេត្តពោធិ៍សាត់ ៖ រថយន្តមួយគ្រឿងដាច់ក្រឡេខូចចតលើចិញ្ចើមផ្លូវ ខណៈអ្នកបើកបរកំពុងធ្វើការជួសជុលស្រាប់តែមានរថយន្តមួយគ្រឿងទៀតបើកមកកិនចំក្បាលធ្លាយខួរ …
ខេត្តពោធិ៍សាត់ ៖ រថយន្តមួយគ្រឿងដាច់ក្រឡេខូចចតលើចិញ្ចើមផ្លូវ ខណៈអ្នកបើកបរកំពុងធ្វើការជួសជុលស្រាប់តែមានរថយន្តមួយគ្រឿងទៀតបើកមកកៀរ និងកិនចំក្បាលធ្លាយខួរស្លាប់ភ្លាមៗនៅនឹងកន្លែងកើតហេតុ ។ គ្រោះថ្នាក់ចរាចរណ៍នេះបានកើតឡើងលើកំណាត់ផ្លូវជាតិលេខ៥ ចន្លោះគីឡូម៉ែត្រលេខ១៦២-១៦៣ ស្ថិតក្នុងភូមិស្វាយស ឃុំស្នារអន្សា ស្រុកក្រគរ កាលពីវេលាម៉ោងជាង៣ទៀបភ្លឺថ្ងៃទី១៣ ខែតុលា ឆ្នាំ២០១៦ ។
លោកវរសេនីយ៍ទោ ឯម រុន អធិការនគរបាលស្រុកក្រគរ បានឲ្យដឹងថា គ្រោះថ្នាក់ចរាចរណ៍នេះបង្កឡើងរវាងរថយន្ដហ៊ីណូ ពណ៌ត្រាវ ពាក់ស្លាកលេខ កំពង់ចាម 3A-0579 និងរថយន្តម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3D-5606 ។
ពាក់ព័ន្ធករណីនេះ លោកអធិការឲ្យដឹងថា នៅយប់នោះរថយន្តហ៊ីយ៉ាន់ដាយធ្វើដំណើរពីលិចទៅកើត ទៅដល់ចំណុចកើតហេតុរថយន្ដបានដាច់ក្រឡេខូចចតលើចិញ្ចើមផ្លូវខាងត្បូងដើម្បីធ្វើការជួសជុល ។ នៅពេលជួសជុលរួច នៅវេលាម៉ោងជាង៣ទៀបភ្លឺ អ្នកជួសជុលបានលួនចេញពីក្រោមរថយន្តដើម្បីរៀបចំទុកដាក់បន្តដំណើរទៅមុខទៀត ប៉ុន្តែខណៈពេលដែលកំពុងលួនចេញនោះក៏ស្រាប់តែរថយន្តហ៊ីណូធ្វើដំណើរពីកើតទៅលិច(បញ្ច្រាសទិសគ្នា)បានរេចង្កូតមកកៀរ និងកិនចំក្បាលធ្លាយខួរបណ្ដាលឲ្យស្លាប់ភ្លាមៗនៅនឹងកន្លែងកើតហេតុតែម្តង ។ ឃើញហេតុការណ៍ដ៏រន្ធត់បែបនេះ អ្នកបើកបររថយន្តហ៊ីណូដែលពុំមានអ្នកណាស្គាល់អត្តសញ្ញាណ បានគេចខ្លួនបាត់តែម្ដង ។
លោកវរសេនីយ៍ទោ ឯម រុន បញ្ជាក់ថា ជនរងគ្រោះដែលស្លាប់ឈ្មោះ អៀម វាសនា ភេទប្រុស អាយុ៣២ឆ្នាំ មានទីលំនៅភូមិបញ្ញាជី ឃុំត្បូងក្រពើ ស្រុកសន្ទុក ខេត្តកំពង់ធំ ជាអ្នកបើកបររថយន្តហ៊ីយ៉ាន់ដាយ ។
ក្រោយពេលកើតហេតុ រថយន្តទាំង២គ្រឿងត្រូវបានយកទៅរក្សារទុកនៅអធិការដ្ឋាននគរបាលស្រុកក្រគរ ដើម្បីដោះស្រាយទៅតាមច្បាប់ចរាចរណ៍ផ្លូវគោកនៅពេលក្រោយ ។ ចំណែកសពជនរងគ្រោះសមត្ថកិច្ចបានទំនាក់ទំនងគ្នាដើម្បីប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ