នូវែលហ្សេឡង់ ៖ នាង Shontelle Crosby បានផ្លាស់ប្តូរជីវិតថ្មី បន្ទាប់ពីទទួលការវះកាត់ដូរធ្មេញអស់ជាង២០០០០ដុល្លារ សហរដ្ឋអាមេរិក ដែលកាលមុនពេលទទួលការព្យាបាល នាងពិបាកក្នុងការរស់នៅ ព្រោះនាងមានធ្មេញ ដែលដុះមកជិតៗគ្នាធ្វើឱ្យអាក្រក់មើលខ្លាំង ។
ស្ត្រីអាយុ៣៣ឆ្នាំខាងលើ ចាប់ផ្តើមមានបញ្ហាធ្មេញមិនស្អាតតាំងពីនាងមានអាយុ១៣ឆ្នាំមកម្ល៉េះ តែម្តាយរបស់នាងមិនមានលទ្ធភាពចេញលុយព្យាបាលធ្មេញឱ្យនាងទេ។ មានមនុស្សម្នាជាច្រើនរិះគន់ទៅលើអនាម័យមាត់ធ្មេញរបស់នាង តែនាងផ្ទាល់បានដុះសម្អាតធ្មេញដូចគេដូចឯងហើយ តែវានៅតែមិនស្អាត។
ដោយសារតែសម្រស់ធ្មេញដ៏ពិបាកមើល នាងបានធ្លាក់ការសម្ភាសន៍ការងារជាច្រើនលើកច្រើនសារ។ អ្នកសម្ភាសមានការភ័យខ្លាចនៅពេលបានឃើញនាងញញឹម។ តាមពិតទៅ នាងគឺជាមនុស្សម្នាក់ដែលមានទំនុកចិត្តលើខ្លួនឯងតាំងពីដើម តែដោយសារតែនាងមានធ្មេញមិនប្រក្រតីបែបនេះហើយ ធ្វើឲ្យនាងមិនហ៊ានញញឹមហើយនិយាយបិទមាត់រហូត។
កាលពីដើមឆ្នាំនេះ មិត្តភក្តិរបស់នាងម្នាក់បានបង្កើតគេហទំព័រមួយសុំថវិកាបរិច្ចាគពីសំណាក់មនុស្សទូទៅ ដើម្បីជួយដល់ការចំណាយក្នុងការព្យាបាលធ្មេញរបស់ Corsby។ ដោយសារតែថវិកាដែលបានមកពីសាធារណៈជននេះហើយ នាងអាចទទួលការព្យាបាលបាន។
ការព្យាបាលតម្រូវឲ្យនាងដកធ្មេញចោលទាំងអស់ ហើយដាក់ធ្មេញថ្មី ដែលថ្លៃសរុបគឺជាង២ម៉ឺនដុល្លារសហរដ្ឋអាមេរិក ។ ឥលូវនេះ នាងមានស្នាមញញឹមដូចគេឯងហើយ អាចថាស្អាតជាងមនុស្សមួយចំនួនក៏ថាបាន ៕
ចែករំលែកព័តមាននេះ