ខេត្តកណ្តាល ៖ លោក ចៅ តុល អនុប្រធានគណៈអចិន្ត្រៃយ៍ ក្រុមការងាររាជរដ្ឋាភិបាល ចុះមូលដ្ឋានស្រុកកោះធំ ខេត្តកណ្តាល បានណែនាំដល់សមាជិកបក្សទាំងអស់ដាច់ខាតត្រូវរក្សាអាសនៈទាំង១១ នៅឃុំព្រែកថ្មី ស្រុកកោះធំ អោយបាន ក្នុងពេលបោះឆ្នោតក្រុមប្រឹក្សាឃុំ-សង្កាត់ អាណត្តិទី៥ ខាងមុខនេះ ។
ប្រសាសន៍របស់លោក ចៅ តុល នាពេលនេះ ធ្វើឡើងកាលពីថ្ងៃទី២៨ ខែមេសា ឆ្នាំ២០២២ ក្នុងកម្មវិធីសំណេះសំណាល និងទទួលផែនការថ្មីជាបន្ទាន់ ក្នុងការចុះមូលដ្ឋានឆ្ពោះទៅកាន់ការបោះឆ្នោតក្រុមប្រឹក្សាឃុំ-សង្កាត់ នៃឃុំព្រែកថ្មី ។ ឃុំព្រែកថ្មី គឺ មានភូមិទាំងអស់ចំនួន១២ភូមិ គឺ ភូមិព្រែកតាដួង ភូមិព្រែកយាយហាយ ភូមិកំពង់សំបួរលើ ភូមិកំពង់សំបួរក្រោយ ភូមិកំពង់ស្វាយលើ ភូមិកំពង់ស្វាយកណ្តាល ភូមិកំពង់ស្វាយក្រោម ភូមិព្រែកថ្មី ភូមិចាមលើ ភូមិព្រែកតាហ៊ីង ភូមិព្រែកធន់ និង ភូមិចាមក្រោម ។
លោក តូច វុទ្ធី ប្រធានក្រុមការងារគណបក្សចុះមូលដ្ឋានឃុំព្រែកថ្មី បានរៀបរាប់យ៉ាងក្បោះក្បាយអំពីសកម្មភាពការងារ ក៏ដូចជាផែនការបន្តទៀតរបស់គណបក្សជូនអង្គពិធី ក្នុងទិសដៅធ្វើយ៉ាងណាអោយគណបក្សទទួលជ័យជំនះអោយបានលើការបោះឆ្នោតក្រុមប្រឹក្សាឃុំ-សង្កាត់ នាពេលខាងមុខនេះ ។ ឃុំព្រែកថ្មី មានគណបក្សឈរឈ្មោះចំនួន៣ គឺគណបក្សភ្លើងទៀន ឈរលេខរៀងទី១ គណបក្សប្រជាជនកម្ពុជា ឈរលេខរៀងទី២ និង គណបក្សហ្វុនស៊ិនប៉ិច ឈរលេខរៀងទី៣ ។
ជាមួយគ្នានេះ លោក ចៅ តុល បានណែនាំដល់សមាជិកបក្សទាំងអស់ ត្រូវរួមគ្នា ឯកភាពគ្នា និងសាមគ្គីគ្នា អោយបានល្អបំផុត ជាពិសេសពង្រឹងអោយមានប្រសិទ្ធភាពចំពោះក្រុមយុវជនគណបក្សនៅមូលដ្ឋាន ព្រោះយុវជនជាកម្លាំងស្នូលរបស់គណបក្សយើង ។
លោក ចៅ តុល ក៏បានណែនាំដល់បេក្ខភាពឈរឈ្មោះក្រុមប្រឹក្សាឃុំ-សង្កាត់ ទាំងពេញសិទ្ធិនិងបម្រុង ត្រូវចុះដល់ខ្នងផ្ទះប្រជាពលរដ្ឋ អោយបានទៀងទាត់បំផុត ដើម្បីយល់ដឹងពីសុខទុក្ខប្រជាពលរដ្ឋ និងក្តីកង្វល់ផ្សេងៗរបស់ប្រជាពលរដ្ឋ ។
ជាចុងបញ្ចប់ លោក ចៅ តុល ជឿជាក់ថា គណបក្សប្រជាជនកម្ពុជា ឃុំព្រែកថ្មី នឹងអាចយកឈ្នះការបោះឆ្នោតក្រុមប្រឹក្សាឃុំ-សង្កាត់ នាពេលខាងមុខនេះ និង រក្សាអាសនៈទាំង១១ របស់គណបក្សអោយខានតែបាន ៕
ចែករំលែកព័តមាននេះ