រាជធានីភ្នំពេញ ៖ កញ្ញាវេជ្ជបណ្ឌិត ទី សុវណ្ណរដ្ឋ ឯកទេសសម្ភពនិងរោគស្ត្រីបានលើកឡើងថា ក្នុងពេលពពោះស្ត្រីគួរមានការយកចិត្តទុកដាក់ខ្ពស់ទៅលើរបប និងប្រភេទចំណីអាហារ ពីព្រោះការបរិភោគអាហារត្រឹមត្រូវ
រាជធានីភ្នំពេញ ៖ កញ្ញាវេជ្ជបណ្ឌិត ទី សុវណ្ណរដ្ឋ ឯកទេសសម្ភពនិងរោគស្ត្រីបានលើកឡើងថា ក្នុងពេលពពោះស្ត្រីគួរមានការយកចិត្តទុកដាក់ខ្ពស់ទៅលើរបប និងប្រភេទចំណីអាហារ ពីព្រោះការបរិភោគអាហារត្រឹមត្រូវ ធ្វើឱ្យកូនក្នុងផ្ទៃមានការលូតលាស់ល្អ និងកូនកើតមកឆ្លាតវៃ ។ ផ្ទុយទៅវិញ បើស្ត្រីបរិភោគអាហារមិនត្រឹមត្រូវទេ អាចមានការប៉ះពាល់ធ្ងន់ធ្ងរដល់សុខភាពកូនក្នុងផ្ទៃ និងសុខភាពកូនពេលកើតមក ។ ដោយមានការបម្រែបម្រួលសរីរាង្គរបស់ស្ត្រីក្នុងពេលពពោះ អង្គការពារខ្លួនរបស់ស្ត្រីនឹងធា្លក់ចុះ ធ្វើឱ្យអាហារមួយចំនួនដែលធ្លាប់បរិភោគពីមុន អាចនឹងមានផលប៉ះពាល់នៅពេលបរិភោគក្នុងពេលមានផ្ទៃពោះ ។
១-ទាក់ទងទៅនឹងប្រភេទ និងរបបអាហារ កំឡុងពេលមានផ្ទៃពោះ ស្ត្រីគួរប្រតិបត្តិដូចតទៅ ៖
-បរិភោគអាហារឱ្យបានគ្រប់មុខ មានទាំងបន្លែ សាច់ ស៊ុត គ្រាប់ធញ្ញជាតិ និងផ្លែឈើ ។ ក្នុង១ថ្ងៃ ស្ត្រីគួរបរិភោគយ៉ាងហើចឱ្យបានបន្លែ៥មុខ និងផ្លែឈើ៥មុខ ហើយផ្លាស់ប្តូរគ្នាជារៀងរាល់ថ្ងៃ ព្រោះអាហារដែលមានពណ៌ខុសៗគ្នា ផ្ទុកនូវវីតាមីន ជាតិមីនេរាល់និងប្រូតេអីុនផ្សេងៗគ្នា ។
-បរិភោគអាហារដែលចម្អិនឆ្អិនល្អ ទាំងសាច់ ស៊ុត និងបន្លែ ។ ផ្លែឈើត្រូវលាងឱ្យស្អាត មុននឹងបរិភោគ ។
-បរិភោគអាហារដែលមានវីតាមីន C និងអាស៊ីតហ្វូលីកឱ្យបានគ្រប់គ្រាន់ ក្នុងរយៈពេល១២សប្តាហ៍ដំបូង ។
-ជ្រើសរើសអាហារណាដែលមានជាតិសរសៃច្រើនដូចជា នំបុ័ង សេរេអាល់ គ្រាប់សណ្តែក បន្លែពណ៌បៃតង ។
-ត្រូវបរិភោគអាហារ ឬភេសជ្ជៈដែលមានផ្ទុកនូវជាតិកាល់ស្យូមច្រើន យ៉ាងតិចឱ្យបាន១០០០-១៣០០មីលី្លក្រាមក្នុងមួយថ្ងៃ ក្នុងពេលមានផ្ទៃពោះ ។
-ត្រូវបរិភោគអាហារណាដែលមានជាតិដែកឱ្យបានយ៉ាងតិច២៧មីលី្លក្រាមក្នុងមួយថ្ងៃ។ អាហារទាំងនោះមានដូចជា សាច់ក្រហមសុទ្ធ ស្ពៃខៀវ គ្រាប់សណ្តែក និងសេរេអាល់ ។
-ត្រូវបរិភោគអាហារដែលមានជាតិអីុយ៉ូដឱ្យបានយ៉ាងតិច២២០មីក្រូក្រាមដើម្បីជួយក្នុងការលូតលាស់ខួរក្បាលកូន ។ អាហារទាំងនោះមានដូចជាទឹកដោះគោ ឈីស យោហ្គឺត (yogurt) និងអាហារសមុទ្រមួយចំនួនដូចជាត្រីសមុទ្រ ត្រីសាល់ម៉ុង បង្គាជាដើម ។
-ត្រូវបរិភោគអាហារដែលមានជាតិវីតាមីនសេរាល់ថ្ងៃយ៉ាងតិច៨០-៨៥មីលី្លក្រាមក្នុងមួយថ្ងៃ ។ អាហារទាំងនោះមានដូចជា ក្រូច ទំពាំងបាយជូរ ល្ហុង ប៉េងប៉ោះ ម្ទេសខៀវ ផ្កាខាត់ណា ស្ពៃក្តោបពណ៌ខៀវ សាឡាត់ខៀវ និងស្ពៃខៀវ ។
-ត្រូវបរិភោគអាហារដែលមានជាតិហ្វូឡាត ឬអាស៊ីតហ្វូលីក រាល់ថ្ងៃយ៉ាងតិច ០,៦៤មីលី្លក្រាមក្នុងមួយថ្ងៃ ដើម្បីជួយការពារការបើកឆ្អឹងកងខ្នងកូនពីកំណើត ដែលអាចឱ្យកូនមានភាពពិការជើងទាំងសងខាង ។ អាហារទាំងនោះមានដូចជា បន្លែបៃតង សាច់សុទ្ធ គ្រាប់សណ្តែក ជាដើម ។
-ត្រូវបរិភោគអាហារដែលមានជាតិវីតាមីនអា រាល់ថ្ងៃ ដូចជា ការ៉ុត ល្ពៅ ដំឡូងក្រហម ស្ពៃខៀវ ននោង ស្លឹកបន្លែដែលមានមើម និងផ្លែមឺឡុង ។
២-អាហារដែលស្ត្រីមានផ្ទៃពោះត្រូវជៀសវាងមានដូចជា ៖
-ជាតិអាល់កុល ៖ ព្រោះវាអាចបណា្តលឱ្យមានការសម្រាលកូនមុនខែ បាត់បង់នូវភាពឆ្លាតរបស់កូន ការលូតលាស់របស់កូនក្នុងពោះតូចជាងធម្មតា និងអាចបណា្តលឱ្យមានភាពខុសប្រក្រតីមួយចំនួនដល់កូនក្នុងផ្ទៃ ។
-ជាតិកាហ្វេអីុន មិនត្រូវបរិភោគលើសពី ៣០០មីលី្លក្រាមក្នុងមួយថ្ងៃទេ ។
-ជាតិស្ករ ឬបង្អែម មិនត្រូវបរិភោគច្រើនពេកទេ ។
-ជាតិខ្លាញ់ និងកូឡេស្តេរ៉ុល ត្រូវកាត់បន្ថយមកត្រឹមតែ៣០០មីលី្លក្រាមក្នុងមួយថ្ងៃ ។
-សាច់ត្រីសមុទ្រធំៗមួយចំនួនដូចជាត្រីឆ្លាម: ព្រោះមានផ្ទុកនូវជាតិបារ៉តដែលអាចប៉ះពាល់ដល់សុខភាពកូនក្នុងផ្ទៃ ។
-ឈីសដែលមិនបានឆ្លងកាត់ការរម្ងាប់មេរោគ (unpasteurized) ព្រោះវាអាចផ្ទុកនូវមេរោគ listeria
-សាច់ ឬបន្លៃឆៅ ព្រោះវាអាចមានផ្ទុកនូវពពួកបាក់តេរី ឬសត្វល្អិតមួយចំនួនអាចប៉ះពាល់ដល់កូនក្នុងផ្ទៃ ។
កញ្ញាវេជ្ជបណ្ឌិត ទី សុវណ្ណរដ្ឋ បានបញ្ជាក់ថា «ដើម្បីឱ្យកូនមានសុខភាពល្អ ប្រាជ្ញាឆ្លាតវៃ ក្រុមការងារវេជ្ជបណ្ឌិត និងគិលានុបដ្ឋាកជំនាញនៃមន្ទីរពេទ្យកាល់ម៉ែត សំណូមពរឱ្យអ្នកមា្តយគ្រប់រូបត្រូវចេះជ្រើសរើសអាហារបរិភោគដែលប្រកបដោយផាសុកភាពទាំងក្នុងអំឡុងពេលមានផ្ទៃពោះ និងពេលបំបៅដោះកូន» ៕
ចែករំលែកព័តមាននេះ