រាជធានីភ្នំពេញ ៖ ខណៈដែលការនាំចេញស្វាយចន្ទីទៅប្រទេសវៀតណាមមានការធ្លាក់ចុះក្រសួងពាណិជ្ជកម្ពុជា បានលើកឡើងពីការនាំស្វាយចន្ទីនេះជាមួយអនុរដ្ឋមន្ត្រីក្រសួងពាណិជ្ជ វៀតណាម ។ លោក សុខ សុភ័ក្ត្រ រដ្ឋលេខាធិការក្រសួងពាណិជ្ជកម្ម…
រាជធានីភ្នំពេញ ៖ ខណៈដែលការនាំចេញស្វាយចន្ទីទៅប្រទេសវៀតណាមមានការធ្លាក់ចុះក្រសួងពាណិជ្ជកម្ពុជា បានលើកឡើងពីការនាំស្វាយចន្ទីនេះជាមួយអនុរដ្ឋមន្ត្រីក្រសួងពាណិជ្ជ វៀតណាម ។ លោក សុខ សុភ័ក្ត្រ រដ្ឋលេខាធិការក្រសួងពាណិជ្ជកម្ម កាលពីថ្ងៃទី ២២ មេសា នេះ បានដឹកនាំប្រតិភូមកពីបណ្តាអន្តរក្រសួង-ស្ថាប័ន ជួបពិភាក្សាការងារជាមួយលោក Tran Quoc Khanh អនុរដ្ឋមន្ត្រីនៃក្រសួងឧស្សាហកម្ម និងពាណិជ្ជកម្ម វៀតណាម តាមប្រព័ន្ធវីដេអូពិភាក្សាបញ្ហាធ្វើពាណិជ្ជកម្មទ្វេភាគី មួយចំនួននៅក្នុងនោះមានការនាំចេញចេញស្វាយចន្ទីកម្ពុជាទៅប្រទេសវៀតណាមផងដែរ ។
មែនទែនទៅប្រធានបទដែលអន្តរក្រសួងកម្ពុជា ជជែកជាមួយភាគីវៀតណាមនាពេលនោះមាន ការរកដំណោះស្រាយលើបញ្ហាវិធានបូកបន្ថែម (Extended Cumulation) នៃដើមកំណើតទំនិញសម្រាប់ផលិតកម្មកង់នាំចេញទៅសហភាពអឺរ៉ុប ការនាំចេញគ្រាប់ស្វាយចន្ទីនិងស្ករសទៅកាន់ប្រទេសវៀតណាម និងការរៀបចំក្របខ័ណ្ឌសម្រាប់ពង្រឹងកិច្ចសហប្រតិបត្តិការទ្វេភាគី សំដៅពង្រីកកំណើនសេដ្ឋកិច្ច ។
ស្វាយចន្ទីជាដំណាំឧស្សាហកម្មសំខាន់មួយរបស់កម្ពុជា ដែលមាបកសិករដាំដុះជាច្រើន ។ តាមក្រសួងកសិកម្ម រុក្ខាប្រមាញ់ និងនេសាទ ក្នុងរយៈពេលបីខែដើមឆ្នាំនេះការគ្រាប់ស្វាយចន្ទីឆៅទៅក្រៅប្រទេសមានចំនួន ២៧១ ៩៩៤,៤៨ តោន ថយចុះ ៣៩,៦៧% ។ ក្នុងចំណោមចំនួននាំចេញនេះ ២៧១ ៩៨០,៩០ តោន បាននាំទៅប្រទេសវៀតណាម និងប្រទេសចិនចំនួន ១៣,៥៨ តោន ។
ដោយឡែកបើតាម លោក អួន ស៊ីឡុត ប្រធានសមាគមស្វាយចន្ទីកម្ពុជា បានឱ្យដឹងថា ភ្លៀងធ្លាក់បន្តបន្ទាប់ ចាប់តាំងពីខែមករា មកបានធ្វើឱ្យដំណាំស្វាយចន្ទីរបស់ប្រជាកសិករជាច្រើនហិកតាខូចខាតធ្ងន់ធ្ងរ ។ វិបត្តិអាកាសធាតុដ៏អាក្រក់នេះ អាចធ្វើឱ្យទិន្នផលស្វាយចន្ទីបាត់បង់ចន្លោះពី ៣០ ទៅ ៦០ ភាគរយ ខណៈភ្លៀងបន្តអូសបន្លាយទៀត ។
លោកប្រធានសមាគម បាននិយាយប្រាប់សារព័ត៌មានថា ក្រៅពីវិបត្តិអាកាសធាតុ ការបញ្ជាទិញពីវៀតណាមក៏ធ្លាក់ចុះផងដែរ ស្របពេលដែលបញ្ហា ជី ប្រេងសាំង និងថ្នាំកសិកម្ម ឡើងថ្លៃ ក៏កំពុងធ្វើឱ្យកសិករមួយចំនួនខាតបង់ធ្ងន់ធ្ងរផងដែរ ។
ក្នុងជំនួបរវាងក្រសួងពាណិជ្ជកម្មកម្ពុជា និងវៀតណាម នាពេលកន្លងមកនេះ មិនថាបញ្ហាការនាំស្វាយចន្ទី និងស្ករសពីកម្ពុជាទៅប្រទេសវៀតណាម មានការរាំងស្ទះលើផ្នែកបច្ចេកទេសមួយចំនួន ។ ភាគី បានប្តេជ្ញាចិត្តសហការដោះស្រាយកិច្ចការនេះបន្តទៀត ដោយយកចិត្តទុកដាក់ខ្ពស់បំផុត ៕
ចែករំលែកព័តមាននេះ