ការកម្សាន្ដនៅឆ្នេរសមុទ្រថយចុះ៣០%ខណៈអាកាសធាតុមិនសូវល្អ
ខេត្ដព្រះសីហនុ ៖ លោក តាំង សុចិត្តគ្រឹះស្នា ប្រធានមន្ទីរទេសចរណ៍ខេត្តថ្លែងថា ភ្ញៀវទេសចរនារដូវបុណ្យភ្ជុំបិណ្ឌឆ្នាំនេះមានការថយចុះជាងឆ្នាំមុនជាង៣០% …
ខេត្ដព្រះសីហនុ ៖ លោក តាំង សុចិត្តគ្រឹះស្នា ប្រធានមន្ទីរទេសចរណ៍ខេត្តថ្លែងថា ភ្ញៀវទេសចរនារដូវបុណ្យភ្ជុំបិណ្ឌឆ្នាំនេះមានការថយចុះជាងឆ្នាំមុនជាង៣០% …
ខេត្ដព្រះសីហនុ ៖ លោក តាំង សុចិត្តគ្រឹះស្នា ប្រធានមន្ទីរទេសចរណ៍ខេត្តថ្លែងថា ភ្ញៀវទេសចរនារដូវបុណ្យភ្ជុំបិណ្ឌឆ្នាំនេះមានការថយចុះជាងឆ្នាំមុនជាង៣០% ខណៈអាកាសធាតុមិនអំណោយផល ម្យ៉ាងទៀតភ្ញៀវទេសចរមួយចំនួនបានប្តូរទិសដៅទៅកម្សាន្តនៅខេត្តផ្សេង ។
លោកប្រធានមន្ទីរថ្លែងទៀតថា សម្រាប់តំបន់ឆ្នេរសមុទ្រខេត្តព្រះសីហនុក្នុងឱកាសបុណ្យភ្ជុំបិណ្ឌឆ្នាំនេះ ភ្ញៀវទេសចរនៅឆ្នេរអូរឈើទាលពុំសូវកកកុញដូចឆ្នាំមុនៗទេ ។ បើយោងតាមតួលេខភ្ញៀវដែលចូលមកកម្សាន្ដនាឆ្នាំនេះសរុបមានចំនួន៦០.៦៨០នាក់ គឺថយចុះ៣០%បើធៀបនឹងរយៈពេលដូចគ្នាក្នុងឆ្នាំ២០១៥ ក្នុងនោះភ្ញៀវជាតិមានចំនួន៥៣.៣៩៩នាក់ ភ្ញៀវអន្តរជាតិមានចំនួន៧.២៨១នាក់ ។
ចំពោះមូលហេតុដែលនាំឲ្យភ្ញៀវទេសចរមានការថយចុះនេះ លោក តាំង សុចិត្តគ្រឹះស្នា បញ្ជាក់ថា ដោយសារកត្តាអាកាសធាតុព្រោះឆ្នាំនេះមានរលកធំៗ ខ្យល់ភ្លៀងជាប់ៗគ្នា ដែលជាហេតុនាំឲ្យភ្ញៀវទេសចរមួយចំនួនបង្វែរទិសដៅទៅកម្សាន្ដនៅឆ្នេរព្រែកត្រែង និងឆ្នេរអូរត្រេះ និងមួយចំនួនធំទៀតទៅកម្សាន្ដនៅរមណីយដ្ឋានទឹកធ្លាក់ថ្មរូង និងរមណីយដ្ឋានទឹកធ្លាក់ ក្បាលឆាយ និងតាមបណ្តាខេត្តផ្សេងវិញ ។ ដោយឡែក តម្លៃម្ហូបអាហារនិងផ្ទះសំណាក់ពុំបានហក់ឡើងខ្ពស់ដូចឆ្នាំមុនទេ ទាំងម្ហូបអាហារនិងផ្ទះសំណាក់ ភ្ញៀវដែលមកកម្សាន្ដនិយាយថា អាចទទួលយកបាន ។
ដោយឡែក ជុំវិញការធ្លាក់ចុះភ្ញៀវទេសចរនាឆ្នាំនេះ បើយោងតាមប្រភពក្រៅផ្លូវការពីប្រជាពលរដ្ឋនិងអាជីវករអះអាងថា គឺមកពីឆ្នាំនេះមានករណីលង់ទឹកច្រើន ហើយបានឆក់យកជីវិតមនុស្សរហូតដល់ជិត១០នាក់ ទើបភ្ញៀវទេសចរមានការភ័យខ្លាចពុំហ៊ានមកកម្សាន្ដ គួបផ្សំនៅប៉ុន្មានថ្ងៃចុងក្រោយនេះទៀត នៅខេត្តព្រះសីហនុមានភ្លៀងស្ទើររៀងរាល់ថ្ងៃ ។
លោកវរសេនីយ៍ឯក ព្រហ្ម ពៅ នាយការិយាល័យនគរបាលចរាចរណ៍ផ្លូវគោកខេត្ត ថ្លែងថា ករណីគ្រោះថ្នាក់ចរាចរណ៍នារដូវបុណ្យភ្ជុំបិណ្ឌឆ្នាំ២០១៦នេះនៅខេត្តព្រះសីហនុ គិតត្រឹមរយៈពេល១៥ថ្ងៃមានចំនួន១០លើកលើ០៩លើក បណ្តាលឱ្យស្លាប់០២នាក់លើ០៦នាក់ ថយចុះ០៤នាក់ ក្នុងនោះស្រីចំនួន០១នាក់ រងរបួសធ្ងន់០៨នាក់និងស្រាល០២ ខួចខាតរថយន្ត០២គ្រឿង ម៉ូតូ១២គ្រឿង ។ ចំពោះករណីគ្រោះថ្នាក់នេះ បណ្តាលមកពីអ្នកបើកបរមានជាតិស្រវឹង បើកបរជែង ហួសល្បឿនកំណត់ និង បត់មិនគោរពច្បាប់ចរាចរណ៍ ។
សូមបញ្ចាក់ថា បច្ចុប្បន្ននៅខេត្តព្រះសីហនុ មានសណ្ឋាគារសរុបចំនួន៦៣ ស្មើនឹងចំនួន៣.០៦៥បន្ទប់ និងផ្ទះសំណាក់ចំនួន២៥០ ស្មើនឹង៣.៤៤៩បន្ទប់ ៕
ចែករំលែកព័តមាននេះ