ខេត្តស្វាយរៀង ៖ រឿងចម្លែកមួយបានកើតឡើងនៅភូមិជង្រុក ឃុំរមាំងថ្កោល ស្រុកស្វាយទាប ដោយបុរសម្នាក់ដឹងខ្លួនមុនថា ខ្លួននឹងស្លាប់ ហើយបាននិយាយប្រាប់ប្រពន្ធថា ពេលដែលខ្ញុំ(ប្តី)ស្លាប់កុំយកសពខ្ញុំទៅបូជា ឬបញ្ចុះឲ្យសោះ បើសពនៅធម្មតា មិនរឹង មិនហើម ឬស្អុយ រង់ចាំ៧ថ្ងៃព្រលឹងខ្ញុំនឹងវិលមកចូលរូបរាងកាយវិញហើយ ។ លុះបានបីថ្ងៃក្រោយមកក៏ស្លាប់មែន រហូតមកដល់ថ្ងៃទី៦ ខែតុលា ឆ្នាំ២០១៦នេះ ប្រពន្ធមិនព្រមយកសពប្តីទៅបូជា ឬបញ្ចុះឡើយ ។ ហេតុការណ៍នេះបានធ្វើឲ្យមានការភ្ញាក់ផ្អើលដល់អ្នកភូមិនាំគ្នាទៅមើលសាកសព និងរង់ចាំមើលថា តើបុរសខាងលើអាចរស់ឡើងវិញមែនដែរឬទេ៕
បើតាមស្ត្រីឈ្មោះ ឡាយ សុធី អាយុ៥៣ឆ្នាំ ដែលជាប្រពន្ធរបស់សពបានឲ្យដឹងថា ប្តីគាត់មានឈ្មោះ ប្រាក់ ឋាន អាយុ៣៧ឆ្នាំ រស់នៅភូមិកើតហេតុ និងបានរួមរស់ជាប្តីប្រពន្ធរយៈពេល៦ឆ្នាំហើយ ។
ស្ត្រីជាប្រពន្ធបន្តទៀតថា នៅមុនថ្ងៃដែលប្តីរបស់គាត់ស្លាប់៣ថ្ងៃ ប្តីរបស់គាត់បាននិយាយប្រាប់គាត់ជាប្រពន្ធថា ពេលខ្ញុំស្លាប់សូមកុំយកសពរបស់ខ្ញុំយកទៅបញ្ចុះ ឬបូជា ពីព្រោះរូបគាត់(ជាប្តី)ត្រូវព្រះអង្គយកព្រលឹងទៅហើយ រយៈពេល៧ថ្ងៃទើបព្រលឹងរបស់គាត់វិលមកចូលរូបរាងកាយវិញ ។
ប្រភពខាងលើបានបន្តទៀតថា ប្តីរបស់គាត់ (ប្រាក់ ឋាន)បានស្លាប់កាលពីវេលាម៉ោង១១ និង១០នាទីយប់ ថ្ងៃទី៣ ខែតុលា ឆ្នាំ២០១៦ រហូតមកដល់ថ្ងៃទី៦ ខែតុលា ឆ្នាំ២០១៦នេះ គឺស្លាប់បាន៣យប់៤ថ្ងៃហើយ រូបគាត់សង្ឃឹមថា ប្តីរបស់គាត់នឹងរស់ឡើងវិញ ។
ដោយឡែកបើតាមប្រភពព័ត៌មានពីសាច់ញាតិនៃសពបានឲ្យដឹងផងដែរថា នាពេលកន្លងមកជនរងគ្រោះដែលបានស្លាប់នេះធ្លាប់បានទៅបួសរៀនមន្តអាគមន៍គាថានៅភ្នំគូលែនខេត្តសៀមរាបជាមួយអ្នកសច្ចំ ហើយអាចបណ្តាលមកពីខុសគ្រូបាធ្យាយ ។ ហើយគ្រូធំដែលនៅឯភ្នំគូលែននោះតែងតែទូរស័ព្ទមកប្រាប់ក្រុមគ្រួសារនៃសពថា កុំអាលបូជា ឬបញ្ចុះសពអី រង់ចាំ៧ថ្ងៃក្រោយព្រលឹងនឹងវិលចូលរូបរាងកាយវិញហើយ ។
ទោះបីជាយ៉ាងណាក៏ដោយ រឿងនេះជារឿងអបិយជំនឿសុទ្ធសាធ ហើយរឿងនេះយើងនឹងរង់ចាំមើលទាំងអស់គ្នាថា តើលទ្ធផលទៅជាយ៉ាងណា ។
បើតាមក្រុមគ្រសារបានឲ្យដឹងទៀតថា មកដល់ម៉ោង២រសៀល ថ្ងៃទី៦តុលានេះ សពនៅមានសភាពទន់ធម្មតា ដូចជាមនុស្សដេកលក់ ពុំទាន់ប្រែប្រួលរឹង ឬហើមឡើយ ។
រីឯចាស់ទុំខ្លះនិយាយថា ជនរងគ្រោះទំនងជាមិនទាន់ស្លាប់ទេ គឺសង្ស័យថា គ្រាន់តែភ្លឹកប៉ុណ្ណោះ បើស្លាប់អាចហើមហើយ ម្យ៉ាងជនរងគ្រោះពុំមានជម្ងឺអ្វីទេ មុនពេលស្លាប់គឺចូលដេកជាធម្មតា ស្រាប់តែលែងដកដង្ហើមតែម្តង ទើបស្ត្រីជាប្រពន្ធគិតថា ប្តីមិនទាន់ស្លាប់ និងមិនព្រមយកសពប្តីទៅបូជា ឬបញ្ចុះរង់ចាំ៧ថ្ងៃតាមបណ្តាំប្តី ថាព្រលឹងនិងវិលមកចូលរូបរាង្គកាយវិញ ។ ក៏ប៉ុន្តែក្រុមគ្រសារក៏បានអញ្ជើញលោកតាអាចារ្យមកសូត្រមន្តរាល់ថ្ងៃ និងនិមន្តព្រះសង្ឃមកសូត្រមន្តធ្វើបុណ្យ ព្រមទាំងដោតទង់ស (ទង់ក្រពើ)បង្ហាញថា មនុស្សស្លាប់ ៕
ចែករំលែកព័តមាននេះ