រមណីយដា្ឋនភ្នំហាន់ជ័យទាក់ទាញអ្នកទេសចរពីគ្រប់ទិសទី
ខេត្តកំពង់ចាម ៖ តំបន់រមណីយដ្ឋានភ្នំហាន់ជ័យ ស្ថិតនៅឃុំហាន់ជ័យ ស្រុកកំពង់សៀម ត្រូវបានគេមើលឃើញថាកំពុងតែមានភាពទាក់ទាញភ្ញៀវជាតិនិងអន្តរជាតិ …
ខេត្តកំពង់ចាម ៖ តំបន់រមណីយដ្ឋានភ្នំហាន់ជ័យ ស្ថិតនៅឃុំហាន់ជ័យ ស្រុកកំពង់សៀម ត្រូវបានគេមើលឃើញថាកំពុងតែមានភាពទាក់ទាញភ្ញៀវជាតិនិងអន្តរជាតិ ឲ្យទៅកម្សាន្តលេងដោយសារតែមានប្រាសាទបុរាណ និងមានសមិទ្ធផលជាច្រើនដែលគ្រប់គ្រងដោយព្រះមុនីសោភ័ណ ប៊ត តាំងចេង ព្រះចៅអធិការវត្ត។ រមណីយដ្ឋាននេះ ស្ថិតនៅជាប់ដងទន្លេមេគង្គមានខ្យល់អាកាសបរិសុទ្ធល្អ ធ្វើឲ្យអ្នកដែលបានទៅកម្សាន្តម្តងហើយចង់ទៅម្តងទៀត ។
ព្រះភិក្ខុ ជា ចាន់ធា គ្រូបង្រៀនបាលី គង់នៅវត្តភ្នំហាន់ជ័យ មានថេរដីកាថា កម្លាំងនគរបាលចរាចរណ៍បានសម្រួលចរាចរណ៍ដល់អ្នកធ្វើដំណើរនៅចំណុចស្ពានបេតុងជើងភ្នំដើម្បីកុំឲ្យកកស្ទះចរាចរណ៍ ។ នៅចង្កេះភ្នំរហូតដល់បរិវេណលើភ្នំ មានដាក់កម្លាំងសន្តិសុខ និងនគរបាលនៅកន្លែងរាំធុងបាស់ និងនគរបាលទេសចរណ៍ជាច្រើននាក់ ដោយដើរចល័តទៅវិញទៅមកការពារពង្រឹងសន្តិសុខជូនដល់ប្រជាពលរដ្ឋ ។
តាមការសង្កេត អ្នកទៅលេងដែលមានចំនួនកាន់តែច្រើនឡើងៗ ដោយសារមានការទុកចិត្តលើព្រះចៅអធិការវត្ត ក៏ដូចជាសមត្ថកិច្ចពាក់ព័ន្ធហើយក៏មានតារាកំប្លែង តាវីតាមីនសេមកសម្តែងឲ្យលោកតាលោកយាយ ញាតិញោមពុទ្ធបរិស័ទទស្សនាសើចសប្បាយដែរ ។ ចំណែកនៅមាត់ទន្លេវិញ មានការរៀបចំប្រណាំងទូក.ងចំនួន៥គូនៅថ្ងៃភ្ជុំបិណ្ឌថ្ងៃទី១ ខែតុលា ហើយនៅឆ្នាំក្រោយនឹងមានការរៀបចំពិធីឲ្យកាន់អធិកអធមទៀត ។
លោក ប៊ុន តឿ អាយុ២៩ឆ្នាំ មកពីភូមិប្រវាស ឃុំបឹងណាយ ស្រុកព្រៃឈរ និយាយថា រូបគាត់សប្បាយរីករាយណាស់ពេលបានមកលេងនៅភ្នំហាន់ជ័យជាមួយប្រពន្ធ និងឃើញមនុស្សមកលេងច្រើនជាងឆ្នាំមុន ។ នៅឆ្នាំក្រោយគាត់នឹងនាំប្រពន្ធ ព្រមទាំងមិត្តភក្តិមកលេងទៀតព្រោះថានៅលើភ្នំមានកន្លែងធំទូលាយ ហើយខ្យល់អាកាសបរិសុទ្ធល្អ ។
លោក ស៊ាន សុគុណ ប្រធានមន្ទីរទេសចរណ៍ខេត្ត មានប្រសាសន៍ថា តំបន់រមណីយដ្ឋានជាច្រើនក្នុងខេត្តកំពង់ចាម ក្នុងនោះកន្លែងដែលបង្កើតថ្មីមានដូចជាបឹងធំ ទំនប់តាកុតឃើញថា នៅរដូវបុណ្យភ្ជុំបិណ្ឌនេះមានប្រជាពលរដ្ឋមកលេងច្រើន ។ ចំណែកនៅរមណីយដ្ឋានទឹកឆា ប្រាសាទនគរបាជ័យព្រមទាំងភ្នំហាន់ជ័យ ប្រជាពលរដ្ឋមកលេង ប្រហាក់ប្រហែលនឹងឆ្នាំកន្លងទៅ រីឯសន្តិសុខវិញមានលក្ខណៈល្អប្រសើរក្រោមការយកចិត្តទុកដាក់របស់សមត្ថកិច្ច ៕
ចែករំលែកព័តមាននេះ