ក្នុងអំឡុងបុណ្យភ្ជុំបិណ្ឌបណ្តាខេត្តមួយចំនួនណែនណាន់ដោយអ្នកទេសចរ
ខេត្តកំពត ៖ រយៈពេល៣ថ្ងៃនៃពិធីបុណ្យភ្ជុំបិណ្ឌនាឆ្នាំ២០១៦នេះ នៅខេត្តកំពត តាមដងផ្លូវក្នុងក្រុង ពោរពេញទៅដោយយានយន្តគ្រប់ប្រភេទ ពិសេសរថយន្តធ្វើចរាចរ …
ខេត្តកំពត ៖ រយៈពេល៣ថ្ងៃនៃពិធីបុណ្យភ្ជុំបិណ្ឌនាឆ្នាំ២០១៦នេះ នៅខេត្តកំពត តាមដងផ្លូវក្នុងក្រុង ពោរពេញទៅដោយយានយន្តគ្រប់ប្រភេទ ពិសេសរថយន្តធ្វើចរាចរយ៉ាងមមាញឹក ឆ្ពោះទៅកាន់រមណីយដ្ឋាននានា ។ ការធ្វើចរាចរច្រើនបែបនេះបណ្ដាលឲ្យកកស្ទះរាប់ម៉ោង ។
សមត្ថកិច្ចនគរបាលចរាចរណ៍ឱ្យដឹងកាលពីថ្ងៃទី២ តុលា ២០១៦ថា រដូវបុណ្យភ្ជំបិណ្ឌឆ្នាំនេះ អ្នកទេសចរទៅទស្សនាកម្សាន្តក្នុងខេត្តកំពត កើនឡើងខុសប្លែកពីឆ្នាំមុន ។ ជាក់ស្ដែងនៅលើដងផ្លូវជាតិលេខ៣ ចាប់ពីក្បាលស្ពានខាងកើតនិងខាងលិច ព្រមទាំងលើទ្រូងស្ពាន កកស្ទះចរាចររាប់ម៉ោង ។ ក្នុងស្ថានភាពបែបនោះនគរបាលចរាចរមមាញឹករកពេលសម្រាកមិនបាន ចាប់ពីម៉ោងប្រមាណ៧ព្រឹក រហូតដល់ម៉ោងប្រមាណ៦ទៅ៧យប់ ។ អ្នកទេសចរបើទោះបីជាកកស្ទះយ៉ាងណាក្តី មិនសម្តែងការធុញថប់ប៉ុន្មានទេ ថែមទាំងហុចភេសជ្ជៈដល់សមត្ថកិច្ចដើម្បីលើកទឹកចិត្ត និងថ្លែងអំណរគុណទៀតផង ។
លោកចាន់ ចេស្ដា អភិបាលខេត្តបានទៅពិនិត្យស្ថានភាពជាក់ស្ដែង និងកោតសរសើរលើកទឹកចិត្តដល់សមត្ថកិច្ចដែលយកចិត្តទុកដាក់បំពេញភារកិច្ចរបស់ខ្លួន មិនគិតពីពេលវេលាឈប់សម្រាក និងការនឿយហត់ ។
បើយោងតាមរបាយការណ៍របស់មន្ទីរទេសចរណ៍ខេត្តកំពតឱ្យដឹងថា ក្នុងរយៈពេល៣ថ្ងៃអ្នកទេសចរទៅលេងកម្សាន្តក្នុងខេត្តសរុបចំនួន៧០.៤៨០នាក់ កើនឡើងជាងឆ្នាំមុន៤៥,៣៨%ក្នុងនោះ ទេសចរក្នុងស្រុកចំនួន៦៩.០៣២កើនឡើង ៤៦,៧៧% ។ ទេសចរណ៍អន្តរជាតិសរុបចំនួន១៤.៣៨នាក់ថយចុះ៤២%។ ស្ថានភាពទូទៅផ្នែកសន្តិសុខ និងសុវត្ថិភាពនៅតាមរមណីយដ្ឋាននានាពុំមានបញ្ហាអ្វីគួរឲ្យកត់សម្គាល់ឡើយ។
ចំពោះផ្នែកបម្រើការស្នាក់នៅរបស់ភ្ញៀវក្នុងទីរួមខេត្តកំពតរយៈពេលបីថ្ងៃ និងតម្លៃម្ហូបអាហារពុំមានការដំឡើងតាមអំពើចិត្តនៅតាមផ្សារ រមណីយដ្ឋាន និងផ្ទះសំណាក់ទេ គឺតម្លៃមិនធ្វើឱ្យភ្ញៀវត្អូញត្អែរដូចឆ្នាំ មុនៗទេ ។
នៅថ្ងៃទី២ ខែតុលា ឆ្នាំ២០១៦ ខេត្តកំពតមានការកកស្ទះចរាចរណ៍ច្រើនម៉ោង ដែលជាប្រវត្តិសាស្ត្រសម្រាប់ខេត្ត មិនដែលមានឡើយតាំងពីដើមមក ។
ក្រោយពីបានទទួលការណែនាំពីលោករដ្ឋមន្ត្រីក្រសួងទេសចរណ៍មក មន្ទីរទេសចរណ៍ខេត្តបានណែនាំអំពីសុវត្ថិភាពទេសចរតាមទូក ពិសេសការពាក់អាវសុវត្ថិភាព ។
ខេត្តមណ្ដលគិរី ៖ ក្នុងរយៈពេល៣ថ្ងៃចុងក្រោយនៃពិធីបុណ្យភ្ជុំបិណ្ឌ មានភ្ញៀវទេសចរជាតិ និងអន្តរជាតិ ជាង៧ពាន់នាក់ទៅលេងកម្សាន្តនៅខេត្តមណ្ឌលគិរី ។ តួលេខនេះបើប្រៀបធៀបរយៈពេលដូចគ្នាកាលពីឆ្នាំមុនមានការកើនឡើងច្រើន ។
ប្រធានមន្ទីរទេសចរណ៍ខេត្តមណ្ឌលគិរី លោកងិន សុវិមាន ឲ្យដឹងថា កត្តាច្រើនដែលជំរុញឲ្យខេត្តមណ្ឌលគិរី មានភ្ញៀវទេសចរកើនឡើងពីមួយឆ្នាំទៅមួយឆ្នាំនោះ ដូចជាផ្ទះសំណាក់ សណ្ឋាគារ រមណីយដ្ឋាន គឺខេត្តមណ្ឌលគិរីមានគ្រប់គ្រាន់សម្រាប់ទទួលភ្ញៀវទេសចរ ។ កត្តាមួយទៀតនោះ គឺការផ្សព្វផ្សាយ ដោយសារព័ត៌មានតែងតែផ្សព្វផ្សាយពីសក្ដានុពលទេសចរណ៍ខេត្តមណ្ឌលគិរី ឲ្យអ្នកទេសចរក្នុងស្រុកនិងទូទាំងសាកលលោកបានដឹង ។
នៅមានកត្តាជាច្រើនទៀតដូចជា ផ្លូវថ្នល់នៅតំបន់ភូមិភាគឦសានល្អ សន្តិសុខល្អ ជាពិសេសនោះគឺប្រទេសកម្ពុជាកំពុងមានការរីកចម្រើនជារៀងរាល់ថ្ងៃ ធ្វើឲ្យជីវភាពរបស់ប្រជាពលរដ្ឋក៏មានការរីកចម្រើនដូចគ្នា ដូច្នេះពួកគាត់មានលទ្ធភាពសម្រាប់ការដើរលេងកម្សាន្ត ។
លោកប្រធានមន្ទីរទេសចរណ៍ខេត្តមណ្ឌលគិរី បញ្ជាក់ថា គិតត្រឹមរយៈពេល៣ថ្ងៃចុងក្រោយនៃពិធីបុណ្យភ្ជុំបិណ្ឌមានភ្ញៀវទេសចរ៧.៤២៧នាក់ ទៅកម្សាន្តក្នុងខេត្តមណ្ឌលគិរី ក្នុងនោះភ្ញៀវជាតិមានចំនួន ៧.២២១នាក់ ភ្ញៀវអន្តរជាតិមានចំនួន២០៦នាក់ ។ តួលេខនេះ បើប្រៀបធៀបនឹងរយៈពេលដូចគ្នាកាលពីឆ្នាំមុន ឃើញថា សម្រាប់ចំនួនភ្ញៀវសរុបមានការកើនឡើងចំនួន២.៨៤៥នាក់ ស្មើនិង៦២,០៩% ក្នុងនោះភ្ញៀវជាតិកើនចំនួន ២.៧៤៦នាក់ ស្មើនឹង៦១,៣៦% ភ្ញៀវអន្តរជាតិកើនឡើង៩៩នាក់ ស្មើនឹង៩២,៥២% ។
ខេត្តសៀមរាប ៖ នៅថ្ងៃទី២ ខែតុលា ឆ្នាំ២០១៦ ជាថ្ងៃបញ្ចប់បុណ្យភ្ជំបិណ្ឌ មានភ្ញៀវជាតិ និងអន្តរជាតិទៅកម្សាន្តនៅភ្នំគូលែន រាប់ពាន់នាក់ ។ ភ្ញៀវរីករាយនឹងការលេងទឹកធ្លាក់ ។
គណៈកម្មការរៀបចំតំបន់កម្សាន្តឱ្យដឹងថា នៅថ្ងៃបុណ្យភ្ជំបិណ្ឌឆ្នាំនេះ ភ្ញៀវជាតិ និងអន្តរជាតិទៅកម្សាន្តច្រើនជាងឆ្នាំ មុនៗព្រោះឆ្នាំនេះអាជ្ញាធររៀបចំតំបន់កម្សាន្តបានល្អ ។
នៅភ្នំគូលែនភ្ញៀវជាតិជាច្រើនបានសម្តែងការមិនពេញចិត្តចំពោះតម្លៃខ្យូសអង្គុយលេង តម្លៃដល់ទៅ១០ដុល្លារ និងតង់ក្រាលអង្គុយ១តម្លៃ១ម៉ឺនរៀល ។ អ្នកទេសចរបានសំណូមពរអាជ្ញាធរខេត្ត-ស្រុកនៅឆ្នាំក្រោយ នាឱកាសបុណ្យទានគួរជួយសម្រួលកុំឱ្យផ្នែក ផ្សេងៗបម្រើការងារកម្សាន្តដំឡើងថ្លៃ ៕
ចែករំលែកព័តមាននេះ